CɅNTESɅNTEL 08
Maʼ mejlel ti sujtel tiʼ yamigo Jehová
Jehová yom chaʼan maʼ ñumen cʌn, ¿chucoch? Come yujil chaʼan mi tsaʼ cʼoti lac ñumen cʌn bajcheʼ yilal i melbal (chaʼlibal) yicʼot chuqui yom ti lac tojlel, ñumento mi caj lac mulan sujtel tiʼ yamigo. Pero ¿muʼ ba lac mejlel ti sujtel tiʼ yamigo Dios? (Pejcan Santiago 2:23). ¿Chuqui miʼ mejlel a mel chaʼan maʼ sujtel tiʼ yamigo? Jiñi Biblia miʼ yʌqʼueñonla i jacʼbal ili cʼajtiya tac, i miʼ subeñonla chucoch ñumen wento cheʼ mi lac sujtel tiʼ yamigo Jehová.
1. ¿Chuqui miʼ subeñet Jehová?
«Lʌcʼtesan laʼ bʌ ti Dios i mi caj i lʌcʼtesan i bʌ ti laʼ tojlel» (Santiago 4:8). ¿Chuqui yom i yʌl ili tʼan tac? Chaʼan Jehová woli (choncol) i subeñet sujtel tiʼ yamigo. Tajol an wocol bʌ miʼ yubiñob chaʼan miʼ sujtesañob tiʼ yamigo Dios come maʼañic miʼ tajob i qʼuel. Pero yaʼ ti Biblia an i cʌybeyonla jiñi i cʼʌjñibal bʌ lac chaʼan chaʼan miʼ cʼotel lac ñumen cʌn bajcheʼ yilal i melbal yicʼot chaʼan mi lac lʌcʼtesan lac bʌ tiʼ tojlel. Cheʼ bʌ mi lac pejcan jiñi Biblia ñumen lʌcʼʌl mi caj la cajñel tiʼ tojlel Jehová anquese maʼañic miʼ mejlel laj qʼuel.
2. ¿Chucoch jiñʌch Jehová ñumen wem bʌ a wamigo miʼ mejlel a taj?
Jehová miʼ wen cʼuxbiñet. Yom chaʼan tijicñayet yicʼot chaʼan maʼ sʌclʌben i coltaya tiʼ pejtelel ora. Miʼ mejlel a suben pejtelel chuqui maʼ cʼojoʼtan come mucʼʌch i ñaʼtañet (1 Pedro 5:7). Jehová tiʼ pejtelel ora miʼ coltan, miʼ ñʌchʼtan yicʼot miʼ ñuqʼuesʌben i pusicʼal jiñi i yamigojob (pejcan Salmo 94:18, 19).
3. ¿Chuqui miʼ pijtan Jehová tiʼ tojlel i yamigojob?
Jehová miʼ cʼuxbin pejtelel lac piʼʌlob, pero «wem bʌ i yamigojob jiñi tojoʼ bʌ» (Proverbios 3:32, TNM). Jehová miʼ pijtan chaʼan jiñi i yamigojob miʼ chaʼleñob wersa i melob chuqui wem bʌ, i chaʼan maʼañic miʼ melob jiñi mach tac bʌ weñic. Tajol an muʼ bʌ i ñaʼtañob chaʼan maʼañic mi caj i wis mejlelob i mel muʼ bʌ i pijtan Jehová tiʼ tojlelob, pero Jehová miʼ chʼʌmben i sujm yicʼot miʼ qʼuel ti ñuc cheʼ mi laj cʼuxbin yicʼot cheʼ mi lac chaʼlen wersa lac mel muʼ bʌ i mulan (Salmo 147:11; Hechos 10:34, 35).
LAʼ LAC ÑUMEN ÑAʼTAN
Laʼ lac ñumen cʌn bajcheʼ mi lac mejlel ti sujtel tiʼ yamigo Jehová i chucoch jiñʌch jiñi ñumen wem bʌ la camigo miʼ mejlel ti sujtel.
4. Abrahán ti sujti tiʼ yamigo Jehová
Jiñi muʼ bʌ i yʌl jiñi Biblia tiʼ tojlel Abrahán (cʌmbil bʌ jaʼel bajcheʼ Abram) miʼ yʌqʼueñonla laj qʼuel chuqui yom i yʌl cheʼ i yamigojonla Dios. Pejcanla Génesis 12:1-4 i tem alʌla iliyi:
¿Chuqui tsiʼ cʼajtibe Jehová jiñi Abrahán?
¿Chuqui tsiʼ yʌlʌ Jehová chaʼan mi caj i mel tiʼ tojlel Abrahán?
¿Bajcheʼ tsiʼ jacʼʌ Abrahán tsaʼ bʌ subenti ti Jehová?
5. Jehová an chuqui miʼ pijtan tiʼ tojlel i yamigojob
Lʌcʼʌ tiʼ pejtelel ora an chuqui mi lac pijtan tiʼ tojlel la camigojob.
¿Chuqui maʼ pijtan jatet tiʼ tojlel a wamigojob?
Pejcanla 1 Juan 5:3 i tem alʌla iliyi:
¿Chuqui miʼ pijtan Jehová tiʼ tojlel i yamigojob?
Chaʼan mi lac jacʼben i tʼan Jehová yom mi laj qʼuextan lac melbal yic’ot bajcheʼ yilalonla. Pejcanla Isaías 48:17, 18 i tem alʌla iliyi:
¿Chucoch Jehová miʼ cʼajtiben jiñi i yamigojob chaʼan yom miʼ qʼuextañob i melbal?
Juntiquil wem bʌ la camigo miʼ cʼajtesʌbeñonla chuqui yom mi lac mel chaʼan maʼañic chuqui mi lac chaʼlen yicʼot chaʼan wen mi la cajñel. Jehová cheʼʌch miʼ mel jaʼel tiʼ tojlel i yamigojob.
6. Muʼ bʌ i mel Jehová tiʼ tojlel i yamigojob
Jehová miʼ coltan jiñi i yamigojob chaʼan miʼ lʌtʼob jiñi wocol tac. Qʼuelela jiñi VIDEO i tem alʌla iliyi:
¿Chuqui an i mele Jehová chaʼan miʼ coltan juntiquil xʼixic chaʼan maʼañic miʼ ñaʼtan mach tac bʌ weñic yicʼot chaʼan wen miʼ yubin i bʌ?
Pejcanla Isaías 41:10, 13 i tem alʌla iliyi:
¿Chuqui miʼ yʌl Jehová chaʼan mi caj i mel tiʼ tojlel i yamigojob?
¿Muʼ ba i mejlel ti sujtel ti wem bʌ a wamigo Jehová maʼ wʌl? ¿Chucoch?
Jiñi i sujm bʌ la camigojob miʼ coltañoñobla cheʼ i cʼʌjñibal lac chaʼan. Cheʼʌch mi caj i mel Jehová ti a tojlel jaʼel.
7. Mi la camigo Jehová yom mi lac chaʼlen tʼan la quicʼot
Mi lac ñumen lʌcʼtesan lac bʌ tiʼ tojlel la camigojob cheʼ mi lac chaʼlen tʼan yicʼotob. Pejcanla Salmo 86:6, 11 i tem alʌla iliyi:
¿Bajcheʼ miʼ mejlel lac pejcan Jehová?
¿Bajcheʼ miʼ pejcañonla Jehová?
Joñonla mi lac pejcan Jehová ti oración, i Jehová miʼ pejcañonla ti Biblia.
AN MUʼ BɅ I YɅLOB: «Mach mejliconla ti sujtel tiʼ yamigo Dios».
¿Chuqui ti texto miʼ mejlel a cʼʌn chaʼan maʼ pʌs chaʼan mucʼʌch lac mejlel ti sujtel tiʼ yamigo Jehová?
TSAʼ BɅ LAJ CɅÑɅ
Jehová yom chaʼan maʼ sujtel tiʼ yamigo, i mi caj i coltañet chaʼan maʼ lʌcʼtesan a bʌ tiʼ tojlel.
¿Chuqui tsaʼ cʌñʌ?
¿Bajcheʼ miʼ coltan Jehová jiñi i yamigojob?
¿Chucoch Jehová miʼ suben jiñi i yamigojob chaʼan yom miʼ qʼuextañob i melbal?
¿Ñumeñix ba ti pʼis chuqui miʼ cʼajtin Jehová tiʼ tojlel i yamigojob? ¿Chucoch cheʼ maʼ ñaʼtan bajcheʼ jiñi?
CɅÑɅ YAN TAC BɅ
¿Bajcheʼ miʼ mejlel i coltañet cheʼ a wamigo Dios?
«Jehová, juntiquil Dios yom bʌ mi laj cʌn» (Lac Tsictesʌbentel, 15 i chaʼan febrero, 2003)
Qʼuele chuqui yom maʼ mel chaʼan maʼ sujtel tiʼ yamigo Dios.
Qʼuele chucoch juntiquil xʼixic miʼ yʌl chaʼan tsaʼ bʌ i colta jiñʌch cheʼ tsaʼ sujti tiʼ yamiga Jehová.
«¡Mach comic chʌmel tsaʼ cʌlʌ!» (Tema am bʌ ti Lac Tsictesʌbentel)
Ubin chuqui miʼ yʌlob chaʼtiqui uxtiquil xcolelob tiʼ tojlel Jehová.