¿Chucoch ñuc i cʼʌjñibal muʼ bʌ i yʌjlel chaʼan jiñi Edén?

YAMBɅ lot muʼ bʌ i yʌlob jiñi wen yujiloʼ bʌ jiñʌch chaʼan tiʼ pejtelel jiñi Biblia maʼañic miʼ yʌl chaʼan jiñi pʌcʼʌbʌl Edén. Juntiquil maestro chaʼan jiñi ñopbalʌl tac i cʼabaʼ Paul Morris tiʼ tsʼijbu: «Yaʼ ti Tsʼijbujel tac maʼañic baqui mi chaʼ taj ti tʼan chaʼan jiñi pʌcʼʌbʌl Edén». An yambʌlob mucʼʌch bʌ i yʌlob chaʼan i sujmʌch jiñi, pero jiñi mach melelic.

Tiʼ sujm, muʼ bʌ i yʌl jiñi Biblia chaʼan Adán, Eva, jiñi lucum yicʼot jiñi pʌcʼʌbʌl Edén cabʌlʌch baqui chucul.a Jiñi maestrojob chaʼan jiñi ñopbalʌl tac, añʌch chuqui an i yʌlʌyob jaʼel mach bʌ i sujmic, pero jiñi wen yujiloʼ bʌ chaʼan Biblia yicʼot jiñi añoʼ bʌ i yeʼtel ti ñopbalʌl, ñumen anto i chaʼleyob tsʌts bʌ mulil come an i yʌlʌyob chaʼan mach i sujmic jiñi pʌcʼʌbʌl Edén. ¿Chucoch mi la cʌl bajcheʼ iliyi? Come woliʼ contrajiñob jiñi Biblia.

Cheʼ maʼañic mi lac ñaʼtan chuqui tsaʼ ujti ti jiñi pʌcʼʌbʌl Edén, wocol chaʼan mi lac chʼʌmben i sujm chuqui miʼ yʌl i Tʼan Dios. Cheʼ bajcheʼ mi caj laj qʼuel, jiñi Biblia miʼ yʌqʼuen i jacʼbal jiñi cʼajtiya tac ñumen ñuc bʌ i cʼʌjñibal ti laj cuxtʌlel, i jiñi i jacʼbal yaʼʌch cʌyʌl yicʼot tsaʼ bʌ ujti yaʼ ti Paraíso.

● ¿Chucoch mi lac ñoxʼan yicʼot mi lac chʌmel? Cheʼ tsaʼic i jacʼbeyob i tʼan Jehová jiñi Adán yicʼot Eva cuxulob tiʼ pejtelel ora. Pero cheʼ bʌ tsiʼ ñusʌbeyob i mandar tac Jehová tsaʼ sujtiyob ti xmulil i tsaʼ cajiyob ti chʌmel (Génesis 2:16, 17; 3:19). Jin chaʼan, ili ora xmulilonla jaʼel ti lac pejtelel. I jiñi Biblia miʼ yʌl: «Tiʼ tojlel juntiquil wiñic, jiñi mulil tsaʼ ochi ti pañimil i tiʼ caj jiñi mulil tsaʼ ochi jiñi chʌmel, i cheʼʌch tsaʼ pam pujqui jiñi chʌmel tiʼ tojlel pejtelel wiñicob come tiʼ pejtelelob tsiʼ chaʼleyob mulil» (Romanos 5:12).

● ¿Chucoch Dios miʼ yʌcʼ chaʼan bej anto jiñi jontolil? Yaʼ ti pʌcʼʌbʌl Edén, Satanás tsiʼ yʌlʌ chaʼan Jehová juntiquilʌch xlot yicʼot chaʼan woliʼ mʌctan jiñi Adán yicʼot Eva chaʼan miʼ ñusañob i bʌ ti chuqui tac wem bʌ (Génesis 3:3-5). Woli bʌ i yʌcʼ ti ñaʼtʌntel jiñʌch chaʼan Jehová mach weñic bʌ yumʌl. Adán yicʼot Eva tsiʼ temeyob i bʌ yicʼot jiñi Diablo i tiʼ tsʼaʼleyob Jehová bajcheʼ yumʌl, cheʼ bʌ tsiʼ meleyob bajcheʼ iliyi tsiʼ yʌcʼʌyob ti ñaʼtʌntel chaʼan jiñi quixtañujob añob tiʼ wenta i ñaʼtan chuqui wem bʌ yicʼot jiñi mach bʌ weñic. ¿Bajcheʼ tsiʼ jacʼʌ Jehová jiñi? Jehová tsiʼ cʼʌñʌ i ñaʼtʌbal yicʼot i tojel come tsiʼ yʌcʼʌ chaʼan jiñi quixtañujob miʼ jumucʼ chaʼleñob yumʌntel wʌʼ ti Lum. Pero tsiquil chaʼan maʼañic miʼ mejlelob come cabʌl jax jiñi wocol i lamital jiñʌch tiʼ caj jiñi Satanás (Jeremías 10:23).

● ¿Chucoch Dios tsiʼ mele ili Lum? Jiñi pʌcʼʌbʌl Edén miʼ pʌs chaʼan Dios yom ti ñaxan chaʼan ili Pañimil miʼ sujtel ti wen utsʼatax bʌ ajñibʌl. Tiʼ subeyob Adán yicʼot Eva chaʼan miʼ pʼolob i bʌ yicʼot chaʼan miʼ sujtesañob ti jumpʼejl paraíso ili pañimil (Génesis 1:28). Jin chaʼan Dios yom chaʼan ili pañimil miʼ sujtel tiʼ jumpʼejl paraíso yicʼot chaʼan i yalobilob Adán yicʼot Eva mach xmulilobix, tijicña miʼ chumtʌlob yicʼot muchʼulob. Lʌcʼʌl tiʼ pejtelel muʼ bʌ i yʌl jiñi Biblia miʼ taj ti tʼan bajcheʼqui Dios mi caj i tsʼʌctesan jiñi ñaʼtʌbil bʌ i chaʼan.

● ¿Chucoch tsaʼ tili Jesucristo ila ti Pañimil? Tiʼ caj jiñi ñusatʼan tsaʼ bʌ ujti yaʼ ti pʌcʼʌbʌl Edén, Adán yicʼot Eva tsaʼ cajiyob ti chʌmel i cheʼ jaʼel jiñi i pʼolbalob. Come Dios miʼ wem cʼuxbiñonla tsiʼ choco tilel i Yalobil chaʼan miʼ yʌqʼueñonla jiñi lac pijtaya. Jesús tsiʼ yʌcʼʌ i cuxtʌlel chaʼan i tojol laj coltʌntel (Mateo 20:28). ¿Chuqui ochem ti jiñi i tojol laj coltʌntel? Yom cʼajal lac chaʼan chaʼan Jesús tiʼ pejtelel ora tsiʼ jacʼbe i tʼan Jehová, mach cheʼic bajcheʼ jiñi ñaxam bʌ wiñic. Jesús tojʌch jin chaʼan tsaʼ mejli i yʌcʼ i cuxtʌlel chaʼan miʼ locʼsan ti mulil jiñi quixtañujob. Cheʼ bajcheʼ jiñi, pejtelel jiñi quixtañujob miʼ mejlelob tiʼ ñusʌbentel i mul ti Dios i miʼ mejlel i tajob i cuxtʌlel tsaʼ bʌ i sʌtʌyob jiñi Adán yicʼot Eva (1 Corintios 15:22, 45; Juan 3:16). Jesús tsaʼ tili ila Pañimil chaʼan miʼ tsʼʌctiyel jiñi ñaʼtʌbil bʌ i chaʼan Dios.b

Jiñi ñaʼtʌbil bʌ i chaʼan Dios i sujmʌch i mach wocolic ti chʼʌmbentel i sujm. Cheʼ bajcheʼ añʌch jiñi pʌcʼʌbʌl Edén ti wajali, jiñi quixtañujob yicʼot añimal tac, jiñi wʌn albil bʌ i chaʼan Dios chaʼan jiñi talto bʌ qʼuin i sujmʌch yicʼot tsʼitaʼ jax yom chaʼan miʼ tsʼʌctiyel. Chaʼan mi laj qʼuel bajcheʼ miʼ tsʼʌctiyel iliyi joñoñʌch an ti lac wenta. Dios yom chaʼan pejtelel lac piʼʌlob miʼ qʼuelob miʼ tsʼʌctiyel jiñi ñaʼtʌbil bʌ i chaʼan, jinto jaʼel jiñi tsaʼ bʌ i ñajtʼesayob i bʌ (1 Timoteo 2:3, 4). ¿Bajcheʼ la cujil chaʼan i sujmʌch iliyi?

Cheʼ bʌ Jesús muqʼuix caj i chʌmel tsiʼ chaʼle tʼan yicʼot juntiquil xujchʼ. Jiñi wiñic yujil chaʼan yomʌch miʼ tsʌnsʌntel, pero tsiʼ chaʼle tʼan yicʼot Jesús chaʼan miʼ taj i ñʌchʼtʌlel i pusicʼal yicʼot i pijtaya. Cristo tiʼ sube: «Mi caj a wajñel a wicʼoton ti Paraíso» (Lucas 23:43). Mi Jesús yom chaʼan juntiquil xujchʼ bʌ ti wajali miʼ chumtʌl tiʼ pejtelel ora ila ti Pañimil, ¿mach ba jiñʌch yom ti lac tojlel jaʼel? Jiñʌchi. I jiñʌch yom bʌ i Tat jaʼel. Mi jatet a wom a qʼuel bajcheʼ miʼ tsʼʌctiyel jiñi ñaʼtʌbil bʌ i chaʼan Dios, mach a cʌy a chaʼlen wersa a bej cʌn tiʼ tojlel Jehová, tsaʼ bʌ i mele jiñi pʌcʼʌbʌl Edén.

[Nota tac]

[Recuadro yicʼot foto tac]

JIÑI ÑAXAM BɅPROFECÍA JUMPʼEJL PROFECÍA MUʼ BɅ I COLTAÑONLA LAJ CɅN MUʼ BɅ I YɅL JIÑI BIBLIA

«Mi caj cʌqʼueñet laʼ contrajin laʼ bʌ jatet [jiñi lucum] yicʼot jini xʼixic. Cheʼ jaʼel mi caj i contrajiñob i bʌ i pʼolbal jini xʼixic yicʼot a pʼolbal. I pʼolbal jini xʼixic mi caj i low a jol. Jatet mi caj a lowben i tunʼoc» (Génesis 3:15.)

Ili jiñʌch jiñi ñaxam bʌ profecía tsaʼ bʌ i yʌlʌ Dios yaʼ ti pʌcʼʌl Edén. Pero ¿majqui jiñi xʼixic, jiñi lucum yicʼot i pʼolbalob? ¿Chucoch miʼ contrajiñob i bʌ?

JIÑI LUCUM

Satanás (Apocalipsis 12:9).

JIÑI XʼIXIC

I yorganización Jehová am bʌ ti panchan, ochemob jiñi ángelob (Gálatas 4:26, 27). Isaías tsiʼ yʌlʌ chaʼan jiñi «xʼixic» mi caj i yʌcʼ ti pañimil jiñi i yalobilob muʼ bʌ caj i yajñelob ti panchan (Isaías 54:1; 66:8).

I PʼOLBAL JIÑI LUCUM

Jiñobʌch muʼ bʌ i melob chuqui yom bʌ jiñi Diablo (Juan 8:44).

I PʼOLBAL JIÑI XʼIXIC

Jiñʌch Jesucristo, tsaʼ bʌ loqʼui yaʼ tiʼ yorganización Jehová am bʌ ti panchan. Yaʼʌch ochemob jaʼel i yermañujob Cristo. Ili xñoptʼañob tsaʼ yajcʌntiyob chaʼan miʼ chaʼleñob yumʌntel yicʼot Jesús ti panchan i cʌmbilob jaʼel bajcheʼ «Israel i chaʼan bʌ Dios» (Gálatas 3:16, 29; 6:16; Génesis 22:18).

LOJWEÑAL TIʼ TUNʼOC

Cheʼ bʌ tsajñi i Yalobil Dios ila ti Pañimil, Satanás tsaʼ mejli i yʌcʼ chaʼan miʼ tsʌnsʌntel. Wen tsʌts tsaʼ bʌ ujti, pero iliyi maʼañic tsaʼ jali come Jesús tsaʼ chaʼ cuxtʌyi.

LOJWEÑAL TIʼ JOL

Jesús mi caj i junyajl jisan Satanás, pero Jesús mi caj i ñaxan tojʼesan tsaʼ bʌ i jeme jiñi Diablo yaʼ ti pʌcʼʌbʌl Edén. (1 Juan 3:8; Apocalipsis 20:10).

Ti jiñi folleto Jiñi  Biblia yicʼot i tʼan, melbil bʌ i chaʼan i testigojob Jehová, mi caj a taj chuqui muʼ bʌ i tsʼitaʼ tsictesan chuqui muʼ bʌ i yʌl jiñi Biblia.

[Foto]

Adán yicʼot Eva tsiʼ tajbeyob i wocolel chaʼan jiñi tsaʼ bʌ i meleyob