Ñuc bʌ i cʼʌjñibal chuqui ujtem

Jiñi Biblia mach wis lajalic bajcheʼ yan tac bʌ libro chaʼan bʌ ñopbalʌl. Cʼʌlʌl ti wajali, yonlel wiñicob xʼixicob (quixtañujob) an i yʌcʼʌyob ti ñuc ti chuqui miʼ ñopob. Cheʼ jaʼel, cojach jiñi libro am bʌ wen tsajinti yicʼot am bʌ i yʌcʼʌ chaʼan miʼ tech tʼan quixtañujob.

Jumpʼejl ejemplo, jiñi wen yujiloʼ bʌ an miʼ yʌlob chaʼan jiñi Biblia tac ili ora mach lajalix bajcheʼ jiñi ñaxam bʌ tsʼijbujel tac. Juntiquil wen yujil bʌ chaʼan ñopbalʌl tac tsiʼ yʌlʌ: «Mach wen la cujilic mi tojix to melbil bajcheʼ an jiñi ñaxam bʌ tsʼijbujel. Cabʌl chuqui mach tojic miʼ chʼʌm tilel lac Biblia ili ora, an tsaʼ bʌ mejli cheʼ bʌ añix ora ujtem ti mejlel jiñi ñaxan tac bʌ tsʼijbujel, i an cabʌl bajcheʼ mach lajalic».

Tiʼ caj bajcheʼ cʌntesʌbil yambʌlob, maʼañic miʼ wen ñopob chaʼan tojʌch bajcheʼ melbil. Mi laj qʼuel tiʼ tojlel Faizal, mach bʌ xñoptʼañobic i familia. Tsaʼ cʌntesʌnti chaʼan chʼujulʌch jiñi Biblia, pero chaʼan wen qʼuextʌyemix muʼ bʌ i yʌl. Faizal miʼ yʌl: «Jin chaʼan, maʼañix mic wen ñopbeñob i tʼan jiñi lon yomoʼ bʌ i cʌntesañon chaʼan Biblia. Cheʼ jaʼel, jiñi Biblia añoʼ bʌ i chaʼan mach jiñix jiñi ñaxam bʌ tsʼijbujel».

Pero ¿am ba i wocolel mi tsaʼ qʼuextʌyi jiñi Biblia? Ñaʼtancu iliyi: Jiñi Biblia wen utsʼatax chuqui miʼ yʌl chaʼan ti talto bʌ qʼuin. ¿Muʼ ba caj a wʌcʼ ti ñuc maʼ wʌl jiñi tʼan mi maʼañic maʼ wen ñop chaʼan mucʼʌch i yʌl yaʼ ti ñaxan bʌ tsʼijbujel? (Romanos 15:4). Mi mach weñic bajcheʼ melbil jiñi Biblia tac am bʌ ili ora, ¿muʼ ba caj a chʼʌm ti ñuc ti a weʼtel (troñel), ti a familia o ti a chʼujutesaya ti Dios jiñi principio tac muʼ bʌ i chʼʌm tilel?

Anquese jilemix yaʼ baqui tsaʼ ñaxan tsʼijbunti, an cabʌl i copiajlel muʼ bʌ i mejlel laj qʼuel wajalix bʌ tsʼijbubil. Mi jiñi jun baqui tsaʼ mejli wen tsʼaʼlebil yicʼot mach weñic bajcheʼ melbil tac, ¿chucoch maʼañic chuqui an i chaʼle? ¿Chucoch miʼ mejlel i coltañet a wʌcʼ ti ñuc jiñi Biblia tac am bʌ ili ora cheʼ maʼ cʌn ili i sujmlel? Mi caj a qʼuelben i jacʼbal ti jiñi muʼ bʌ caj laj cʌn chaʼan chuqui ñusʌbil i chaʼan jiñi Biblia.