¿Bajcheʼ miʼ tijicñesan Dios lac pusicʼal?

Jiñi apóstol Pablo tsiʼ yʌlʌ chaʼan Jehováa jiñʌch jiñi Dios «muʼ bʌ i ñuqʼuesan lac pusicʼal tiʼ pejtelel wocol» (2 Corintios 1:3, 4). Jiñi Biblia miʼ subeñonla chaʼan Dios, jiñi lac Tat, miʼ mejlel i ñuqʼuesan o i tijicñesan lac pusicʼal anquese wen tsʌts jiñi wocol woli (choncol) bʌ lac ñusan.

Pero an chuqui yom mi lac mel jaʼel chaʼan Dios miʼ tijicñesan lac pusicʼal. Ñaʼtancu awilan: ¿Bajcheʼ mi caj i coltañonla juntiquil doctor mi maʼañic miʼ majlel laj qʼuel yaʼ ti hospital? Jin chaʼan, jiñi Tsʼijbujel miʼ subeñonla: «Lʌcʼtesan laʼ bʌ baʼan Dios. Cheʼ jini mi caj i lʌcʼtesan i bʌ baʼ añetla» (Santiago 4:8).

¿Chucoch miʼ mejlel lac ñop chaʼan mucʼʌch caj i lʌcʼtesan i bʌ Dios ti lac tojlel? Ñaxam bʌ, come mach junyajlic jach miʼ subeñonla chaʼan yom i coltañonla (qʼuele jiñi recuadro). I chaʼpʼejlel, come añʌch quixtañujob tsaʼ bʌ coltʌntiyob ti Dios ti wajali yicʼot ti ili ora.

Cheʼ bajcheʼ cabʌlob ili ora, jiñi rey David tsiʼ ñusa cabʌl wocol i tsiʼ sʌcla i coltʌntel ti Dios. Tsiʼ cʼajtibe: «Ubibeñon c tʼan cheʼ cʼam mic pejcañet». ¿Tsaʼ ba i jacʼbe Jehová? Tsaʼʌch, come tsiʼ yʌlʌ: «Tsiʼ xucʼchocoyon. Jini chaʼan ñuquix c pusicʼal» (Salmo 28:2, 7).

¿CHUQUI MIʼ MEL JESÚS CHAʼAN I TIJICÑESɅNTEL LAC PUSICʼAL?

Dios tsiʼ yʌqʼue i yeʼtel Jesús chaʼan miʼ tijicñesʌben i pusicʼal yambʌlob, tsiʼ yʌqʼue i yeʼtel chaʼan miʼ «lajmesʌbeñob i chʼijiyemlel i pusicʼal jini chʼijiyemoʼ bʌ» yicʼot chaʼan miʼ «ñuqʼuesʌbeñob i pusicʼal pejtel woliyoʼ bʌ ti uqʼuel» (Isaías 61:1, 2). Cheʼ bajcheʼ tsaʼ wʌn ajli, Jesús tsiʼ ñumen acʼʌ ti ñuc jiñi woliyoʼ bʌ ti wocol eʼtel yicʼot añoʼ bʌ al bʌ i cuch (Mateo 11:28-30).

Jesús tsiʼ yʌcʼʌ wem bʌ ticʼojel tac chaʼan miʼ tijicñesan jiñi wiñicob xʼixicob (quixtañujob), tsiʼ pʌsbeyob i yutslel yicʼot tsaʼto i lajmesʌbeyob i cʼamʌjel. Ti jumpʼejl bʌ qʼuin, juntiquil wiñic am bʌ lecoj bʌ i tsoy tsiʼ sube: «Mi a wom miʼ mejlel a lajmesañon [cʼoqʼuesañon]». Jesús tsiʼ pʼunta i tsiʼ sube: «Com cu. Laʼ lajmiquet» (Marcos 1:40, 41). I jiñi wiñic tsaʼ lajmi.

Jehová, jiñi Dios «muʼ bʌ i ñuqʼuesan lac pusicʼal tiʼ pejtelel wocol», wolito i tijicñesʌben i pusicʼal jiñi muʼ bʌ i ñusañob wocol anquese maʼañix wʌʼ an ti Lum i Yalobil (2 Corintios 1:3). ¿Bajcheʼ miʼ mel? Laʼ laj qʼuel chʌnchajp.

• Jiñi Biblia. «Jini tsʼijbubil bʌ ti wajali tsaʼ tsʼijbunti chaʼan mi laj cʌntesʌntel. I Tsʼijbujel Dios miʼ yʌqʼueñonla i xucʼtilel yicʼot i ñuqʼuesʌntel lac pusicʼal chaʼan mi lac pijtan jini tal to bʌ» (Romanos 15:4).

• Jiñi chʼujul bʌ espíritu. ¿Chucoch tsiʼ jumucʼ tajayob i ñʌchʼtʌlel jiñi xñoptʼañob cheʼ bʌ tsaʼ chʌmi Jesús? Jiñi Biblia miʼ yʌl chaʼan jiñi xñoptʼañob «tsiʼ chʌn bʌcʼñayob lac Yum. Tsaʼ ñucʼayob i pusicʼal chaʼan Chʼujul bʌ Espíritu» (Hechos 9:31). Jiñi chʼujul bʌ i yespíritu Dios wen pʼʌtʌl, i miʼ mejlel i cʼʌn chaʼan miʼ tijicñesʌben i pusicʼal majqui jach woli (yʌquel) i ñusan wocol.

• Jiñi oración. Jiñi Biblia miʼ yʌl: «Mach mi laʼ chaʼlen tsic pusicʼal». I miʼ subeñonla: «Subenla Dios chuqui tac yom ti oración. Chʌn cʼajtibenla. Subenla wocolix i yʌlʌ. Cheʼ jini, i ñʌchʼtʌlel laʼ pusicʼal chʼoyol bʌ ti Dios mi caj i cʌntan laʼ pusicʼal yicʼot laʼ ñaʼtʌbal» (Filipenses 4:6, 7).

• Jiñi hermanojob. An xñoptʼañob muʼ bʌ i sujtelob ti wem bʌ la camigo i miʼ mejlel i tijicñesañob lac pusicʼal. Pablo tsiʼ yʌlʌ chaʼan jiñi i piʼʌlob ti subtʼan tsiʼ ‹ñuqʼuesʌbeyob i pusicʼal› cheʼ bʌ tsiʼ ñusa wocol yicʼot ticʼlʌntel (Colosenses 4:11; 1 Tesalonicenses 3:7).

Tajol maʼ cʼajtiben a bʌ mi mucʼʌch i coltañonla ili tsaʼ bʌ la cʌlʌ. Laʼ lac ñumen cʌn bajcheʼ tsiʼ ñusayob jiñi tsaʼ bʌ lac tajayob ti tʼan yaʼ ti ñaxam bʌ temaj. Mi caj a qʼuel chaʼan Dios choncolʌch i bej tsʼʌctesan ili tʼan: «Cheʼ bajcheʼ miʼ xixban [wʌysan] i yalobil xʼixic, cheʼʌch mi caj c tijicñesañetla jaʼel» (Isaías 66:13).