3 Miʼ coltañonla lac lʌtʼ jiñi wocol tac

CʼAMɅJEL MAʼAÑIX BɅ I TSʼɅCAL

Rosa miʼ yʌl: «An jumpʼejl j cʼamʌjel wen cʼux bʌ ti bele ora. Mach wen bajcheʼ mic ñusan qʼuin». Junchajp muʼ bʌ i wen pensalin jiñʌch cheʼ maʼañic miʼ mejlel i yʌcʼ i pensar cheʼ woli (choncol) i pejcan jiñi Biblia yicʼot tiʼ chaʼan bʌ Dios. Pero miʼ tijicñesan i tʼan Jesús am bʌ ti Mateo 19:26: «Pero Dios miʼ mejlel i mel tiʼ pejtelel». Rosa tsiʼ qʼuele chaʼan cabʌl bajcheʼ miʼ mejlel i pejcan jun. An i tajol wen wocol miʼ yubin chaʼan miʼ pejcan jun come cabʌl i cʼuxel jiñi cʼamʌjel, jin chaʼan tsaʼ caji i ñʌchʼtan jiñi Biblia am bʌ ti audio yicʼot yambʌ jun tac loqʼuem bʌ ti Biblia.a Rosa tsiʼ yʌlʌ: «Cheʼ maʼañic jiñi coltʌntel, maʼañic tsaʼ mejli c pʼʌtʼesan c bʌ tiʼ chaʼan bʌ Dios».

Cheʼ bʌ Rosa miʼ yubin i chʼijiyemlel chaʼan maʼañix miʼ wen mejlel i mel tiʼ chaʼan bʌ Dios bajcheʼ ti ñaxan, miʼ taj i tijicñʌyel yaʼ ti 2 Corintios 8:12: «Mi an majqui yom i yʌcʼ majtañʌl, laʼ i yʌcʼ loqʼuem bʌ tiʼ chubʌʼan, mi on o mi mach onic. Mach mejlic i yʌcʼ chuqui mach i chaʼanic». Ili miʼ cʼajtesʌben chaʼan Dios tijicñayʌch chaʼan jiñi muʼ bʌ i mel, come jiñʌch muʼ bʌ i mejlel i mel anquese cʼam.

CHEʼ BɅ MIʼ CHɅMEL JUNTIQUIL TI LAC FAMILIA

Diana, tsaʼix bʌ la cʌlʌ ti ñaxan, miʼ yʌl: «Cheʼ bʌ tsaʼ chʌmi quixicʼal (quixicpʼeñal), an jaxto 18 i jabilel, tsiʼ wen aqʼueyon c chʼijiyemlel i tsaʼ c ñaʼta chaʼan maʼañic mi caj i mejlel j cuch yicʼot chaʼan mach chʌn lajalix bajcheʼ ti ñaxan». Diana tsiʼ taja i pʼʌtʼesʌntel yaʼ ti Salmo 94:19, baqui jiñi salmista tsiʼ cʼʌyibe Dios: «Cheʼ woliyon (yʌquelon) ti tsic pusicʼal chaʼan cabʌl chuqui mic ñaʼtan, maʼ ñuqʼuesʌbeñon c pusicʼal». Miʼ chaʼ al: «Tsaʼ j cʼajtibe Jehová chaʼan miʼ coltañon c taj jumpʼejl eʼtel (troñel) muʼ bʌ i coltañon c lajmesan c chʼijiyemlel».

Diana tsaʼ caji ti eʼtel baqui maʼan miʼ chʼʌm i tojol, i tsiʼ colta chaʼan miʼ taj i tijicñʌyel. Ti wiʼil, tsiʼ laja i bʌ bajcheʼ jiñi gis, anquese xujlemix, muʼto i bej cʼʌjñibʌyel ti tsʼijb. I cheʼʌch woliʼ ñusan jaʼel, anquese cheʼ an tsiʼ yubi bajcheʼ jiñi gis, muʼto i mejlel i coltan yambʌlob. Miʼ yʌl: «Cheʼ bʌ mij cʼʌn principio tac yicʼot jiñi Biblia chaʼan mic tijicñesʌbeñob i pusicʼal jiñi muʼ bʌ cʌqʼueñob estudio, tsaʼ cʼoti c ñaʼtan chaʼan Jehová wolʌch i coltañon jaʼel». Tiʼ tsʼijbu ti jun i cʼabaʼob muʼ bʌ i yʌjlelob yaʼ ti Biblia tsaʼ bʌ i ñusayob wocol tac jaʼel. ¿Chuqui tsiʼ cʌñʌ? «Chaʼan tiʼ pejtelelob miʼ wen melob oración» yicʼot chaʼan «miʼ maʼañic maʼ pejcan jiñi Biblia, maʼan mi caj a taj jiñi a wom bʌ a ñaʼtan».

Pero Diana anto yambʌ chuqui tsaʼ cʼoti i cʌn yaʼ ti Biblia: Cojach yom miʼ ñaʼtan jiñi talto bʌ qʼuin i mach jiñic tsaʼix bʌ ñumi. Tsiʼ wen colta jiñi pijtaya muʼ bʌ i yʌl Hechos 24:15: «Mi caj i chʼojyelob jini chʌmeñoʼ bʌ, jini tojoʼ bʌ yicʼot jini mach bʌ tojobic». ¿Muʼ ba i ñop tiʼ sujm chaʼan Jehová mi caj i chaʼ techben i yixicʼal? Laʼ laj qʼuel chuqui miʼ yʌl: «Cujilʌch chaʼan mi caj c chaʼ qʼuel jiñi quixicʼal. Jiñi c Tat am bʌ ti panchan tsʼijbubilix i chaʼan tiʼ ‹jun› chuqui ti tsic mi caj c chaʼ taj lon c bʌ. Muqʼuix j qʼuel c bʌ quicʼot yaʼ ti utsʼatax bʌ lon c pʌcʼʌbʌl, i wen tijicña mi caj cubin cheʼ bajcheʼ tsaʼ cubi cheʼ tsiʼ yila pañimil».