Tʼan tac mucʼʌch bʌ caj i tsʼʌctiyel
Jiñi wen tʼan chaʼan i Yumʌntel Dios woliyʌch (choncolʌch) i sujbel tiʼ pejtelel Pañimil cheʼ bajcheʼ tsiʼ wʌn alʌ Jesús (Mateo 24:14). Jiñi libro chaʼan Daniel miʼ tsictesan chaʼan ili Yumʌntel tilemʌch ti Dios. Yaʼ ti capítulo 2 chaʼan jiñi libro miʼ taj ti tʼan cabʌl pʼʌtʌloʼ bʌ yumʌl tsaʼ bʌ tejchi ti Babilonia wajali cʼʌlʌl jiñi yumʌlob ili ora, jiñi versículo 44 miʼ subeñonla chuqui miʼ cajel ti wiʼil:
«Jini Dios am bʌ ti panchan mi caj i waʼchocon yambʌ Yumʌl, mach bʌ yujilic jilel. Mi caj i mʌjlel i chaʼan. Mi caj i laj jisan pejtel jini yumʌlob. Mi caj i yajñel tiʼ pejtelel ora».
Ili profecía yicʼot jiñi yan tac bʌ am bʌ ti Biblia miʼ wʌn al chaʼan jiñi i Yumʌntel Dios mi caj i yochel tiʼ qʼuexol jiñi yumʌlob, mi caj i chʼʌm tilel ñʌchʼtʌlel yicʼot tijicñʌyel. ¿Bajcheʼ yilal mi caj la cajñel ti jiñi bʌ ora? Laʼ laj qʼuel jiñi wenlel tac lʌcʼʌlix bʌ miʼ cajel ti tsʼʌctiyel.
MAʼAÑIX MIʼ CAJEL GUERRA
Salmo 46:9. Dios «miʼ yujtesan guerra cʼʌlʌl tiʼ pejtelel pañimil. Miʼ bicʼti cʼʌs jini jalʌjb, miʼ cʼʌs jini lanza. Miʼ pulbeñob i carreta tac muʼ bʌ i cʼʌñob ti guerra».
Cheʼ muqʼuic i cʼʌjñel chaʼan miʼ coltʌntel wiñicob xʼixicob (quixtañujob) pejtelel chuqui cʌmbil ili ora yicʼot jiñi muʼ tac bʌ i cʼʌjñel chaʼan miʼ mejlel eʼtijibʌl chaʼan guerra, ¿bajcheʼ yilal maʼ ñaʼtan ili pañimil (mulawil)? Jiñi guerra tac mucʼʌch caj i jilel yaʼ tiʼ Yumʌntel Dios, cheʼ bajcheʼ wʌn albil.
MI CAJ I JILEL JIÑI CʼAMɅJEL
Isaías 33:24. «Maʼanix mi juntiquilic muʼ bʌ caj i yʌl: ‹Cʼamon›».
Ñaʼtancu jumpʼejl pañimil baqui maʼañix jiñi cáncer, diabetes, cʼamʌjel ti lac pusicʼal o yan tac bʌ. Ti jumpʼejl pañimil bajcheʼ jiñi, mach cʼʌñʌlix hospital yicʼot tsʼac tac. Jiñʌch muʼ bʌ caj i taj pejtelel jiñi quixtañujob: I cʼocʼlelob.
MAʼAÑIX MIʼ CAJEL WIʼÑAL
Salmo 72:16. «Mi caj i yʌcʼ cabʌl i cuch jini cholel yaʼ ti joctʌl cʼʌlʌl tiʼ pam tac jini wits».
Jiñi Lum mi caj i wen acʼ ti pʼojlel bʌlñʌcʼʌl chaʼan ti lac pejtelel, i junlajal mi caj lac taj. Maʼañix miʼ cajel wiʼñal mi cʼamʌjelic tiʼ caj iliyi.
MAʼAÑIX MIʼ CAJEL CʼUXYAJIYEL, ILAYA WOCOL YICʼOT CHɅMEL (SAJTEL)
Apocalipsis (Revelación) 21:4. «Dios mi caj i sujcubeñob i yaʼlel i wut. Maʼanix majch miʼ caj ti chʌmel. Maʼanix ucʼtaya mi uqʼuel mi wocol tiʼ pejtelel ora. Come tsaʼix ñumi jini ñaxan tac bʌ».
Jiñi quixtañujob mach xmulilobix miʼ cajel yicʼot mi caj i chumtʌlob tiʼ pejtelel ora ila ti Pañimil cheʼ jumpʼejlix paraíso. Ili jiñʌch albil bʌ i chaʼan Jehová, jiñi tsaʼ bʌ i Meleyonla (Pʌtʌyonla).
DIOS MACH YUJILIC LOT
¿Ñumeñix ba ti pʼis maʼ ñaʼtan pejtelel iliyi? Anquese yonlel quixtañujob mucʼʌch bʌ i mulañob chuqui miʼ yʌl jiñi Biblia chaʼan laj cuxtʌlel, cabʌlob maʼañic bʌ miʼ chʼʌmbeñob isujm bajcheʼ mi lac mejlel ti chumtʌl tiʼ pejtelel ora. Isujmʌch come maʼañic majqui ujtem bajcheʼ jiñi.
Jiñi quixtañujob cabʌlix ora chuculob ti mulil yicʼot chʌmel, jin chaʼan, an cʼotemoʼ bʌ i ñaʼtan chaʼan i tilelʌch cheʼ mi la quilan wocol yicʼot cʼuxyajiyel. Pero iliyi mach jiñic lon ñaʼtʌbil bʌ i chaʼan Dios tiʼ tojlel quixtañujob.
Chaʼan mi lac pʼʌtʼesan lac ñopoñel ti jiñi albil tac bʌ i chaʼan Dios, tsiʼ yʌlʌ: «Cheʼʌch jaʼel c tʼan muʼ bʌ c sub. Mach lolomic jach. Mach toʼo sujtic. Miʼ mel chuqui tac com. Miʼ jolontesan i yeʼtel tsaʼ bʌ cʌqʼue i mel» (Isaías 55:11).
Jiñi Biblia miʼ yʌl chaʼan Dios «mach [...] yujilic lot» (Tito 1:2). Come jiñʌch Dios tsaʼ bʌ i yʌlʌ pejtelel jiñi muʼ bʌ i cajel, yom mi lac wen ñaʼtan ili cʼajtiya tac: «¿Mucʼʌch ba lac mejlel ti chumtʌl tiʼ pejtelel ora ti jumpʼejl paraíso? ¿Chuqui yom mi lac mel chaʼan mi lac taj pejtelel chuqui albil i chaʼan Dios?». Jiñi yan tac bʌ temaj mi caj i coltañet a cʌmben i jacʼbal.