¿Bajcheʼ miʼ mejlel a taj a wenlel chaʼan i cʼuxbiya Dios?
Dios wen utsʼatax bajcheʼ tsiʼ mele (pʌtʌ) jiñi lac bʌcʼtal chaʼan miʼ mejlel i bajñel tojʼesan i bʌ. Cheʼ bʌ juntiquil quixtañu miʼ tsep i bʌ o miʼ low i bʌ, jiñi i bʌcʼtal ti orajach miʼ mʌc i bʌ chaʼan maʼañic miʼ cʌlʌx loqʼuel jiñi chʼichʼ, miʼ tʌquin jiñi i lojweñal yicʼot miʼ chaʼ tojʼan.
ÑAʼTANCU ILIYI: Mi jiñi tsaʼ bʌ i Meleyonla tsiʼ mele jiñi lac bʌcʼtal chaʼan miʼ bajñel tojʼesan i bʌ, ¿yom ba mi lac ñaʼtan chaʼan mach mejlic i tsʼʌcan jiñi i lojweñal lac pusicʼal? Juntiquil tsaʼ bʌ i tsʼijbu jiñi salmo tsaʼʌch i ñopo chaʼan Dios miʼ mejlel i tsʼʌcan jiñi chʼijiyemoʼ bʌ yicʼot jiñi lojweñoʼ bʌ i pusicʼal (Salmo 147:3). Pero, ixcu mi jatet ñusʌbil a chaʼan jumpʼejl wocol maʼañic bʌ miʼ ñajʌyel a chaʼan, ¿chuqui miʼ yʌqʼueñet a ñop chaʼan Dios mucʼʌch caj i tsʼʌcʌbeñet ili ora yicʼot ti talto bʌ qʼuin?
JIÑI BIBLIA MIʼ CɅNTESAÑONLA CHAʼAN JIÑI I CʼUXBIYA DIOS
Dios miʼ subeñonla: «Mach a chaʼlen bʌqʼuen, come añon quicʼotet. Mach yomic maʼ lij a bʌ come a Dioson. Mi caj c wen pʼʌtʼesañet. Mi caj j coltañet. Mi caj j cʌntañet ti pʼʌtʌl bʌ j cʼʌb jini ñoj bʌ» (Isaías 41:10). Cheʼ la cujil chaʼan Jehová miʼ cʼuxbiñonla miʼ yʌqʼueñonla i ñʌchʼtʌlel lac pusicʼal yicʼot lac pʼʌtʌlel chaʼan miʼ mejlel lac ñusan jiñi wocol tac. Isaías tsiʼ yʌlʌ jeʼel: «[Dios] miʼ chaʼ pʼʌtʼesan jini cʼuñoʼ bʌ. Miʼ chaʼ aqʼueñob i wersa jini mach bʌ pʼʌtʌlobix» (Isaías 40:28, 29). Jiñi apóstol Pablo tsiʼ yʌlʌ chaʼan jiñi ñʌchʼtʌlel jiñʌch jiñi ‹i ñʌchʼtʌlel lac pusicʼal chʼoyol bʌ ti Dios muʼ bʌ i caj i cʌntan lac pusicʼal› (Filipenses 4:4-7, 9).
Jiñi Biblia miʼ pʼʌtʼesan lac ñopoñel ti jiñi wʌn albil bʌ i chaʼan Dios chaʼan chuqui mi caj i mel tiʼ tojlel wiñicob xʼixicob (quixtañujob). Jumpʼejl ejemplo, Apocalipsis 21:4, 5 miʼ subeñonla chuqui mi caj i mel Dios i chucoch miʼ mejlel lac ñop.
‹Mi caj i sujcubeñonla i yaʼlel lac wut›. Jehová mi caj i jisan pejtelel chuqui miʼ yʌcʼonla ti wocol yicʼot muʼ bʌ i yʌcʼonla ti cʌlʌx pensal, anquese mach wen ñuquic yilal.
«Buchul bʌ tiʼ yumʌntel» yaʼ ti panchan, jiñi Rey wen pʼʌtʌl bʌ tsaʼ bʌ i meleyonla mi caj i cʼʌn i pʼʌtʌlel yicʼot i yeʼtel chaʼan maʼañic ba ora mi lac chʌn ñusan wocol yicʼot chaʼan miʼ coltañonla baqui ora la com.
Jehová miʼ subeñonla chaʼan ‹xucʼul jiñi i tʼan yicʼot isujm jaʼel›. Ili yom i yʌl chaʼan Jehová, jiñi cojach bʌ isujm bʌ Dios, miʼ cʼʌn jiñi i cʼabaʼ chaʼan miʼ pʌs chaʼan mucʼʌch caj i tsʼʌctesan jiñi wʌn albil bʌ i chaʼan.
«Dios mi caj i sujcubeñob i yaʼlel i wut. Maʼanix majch miʼ caj ti chʌmel. Maʼanix ucʼtaya mi uqʼuel mi wocol tiʼ pejtelel ora. Come tsaʼix ñumi jini ñaxan tac bʌ, cheʼen. Jini buchul bʌ tiʼ yumʌntel tsiʼ yʌlʌ: Awilan, mic mel ti tsijib pejtelel chuqui tac an, cheʼen. Tsiʼ subeyon jaʼel: Tsʼijban, come xucʼul jini tʼan, isujm jaʼel» (Apocalipsis 21:4, 5).
Pejtelel chuqui am bʌ ti panchan yicʼot ti pañimil yicʼot jaʼel jiñi Biblia miʼ coltañonla laj cʌn jiñi lac Tat am bʌ ti panchan. Anquese jiñi an tac bʌ ti panchan yicʼot ila ti pañimil mach yujilic tʼan miʼ coltañonla chaʼan mi lac sujtel tiʼ yamigo Dios, i jiñi Biblia miʼ subeñonla: «Lʌcʼtesan laʼ bʌ baʼan Dios. Cheʼ jini mi caj i lʌcʼtesan i bʌ baʼ añetla» (Santiago 4:8). I jiñi Hechos 17:27 miʼ yʌl: «Mach ñajtic an Dios ti lac tojlel ti jujuntiquilonla».
Cheʼ maʼ ñumen aqʼuen i yorajlel a cʌn Dios mi caj a ñumen ñop chaʼan i wentajetʌch (1 Pedro 5:7). ¿Chuqui i wenlel an cheʼ mi lac ñop Jehová?
Laʼ laj qʼuel tiʼ tojlel Toru, juntiquil wiñic chʼoyol bʌ ti Japón. Anquese jiñi i ñaʼ tsiʼ cʌntesa chuqui miʼ yʌl jiñi Biblia, Toru tsaʼ ochi yicʼotob jiñi cʌmbiloʼ bʌ bajcheʼ yakuza, junmojt xtsʌnsajob yaʼ ti Japón. Miʼ yʌl: «Tsaʼ c ñaʼta chaʼan Dios miʼ tsʼaʼleñon i cheʼ mij qʼuel bajcheʼ miʼ chʌmel (sajtel) jiñi añoʼ bʌ tic joytʌlel jiñʌch bajcheʼ miʼ yʌqʼueñon c toj c mul, ñumento cheʼ miʼ chʌmel juntiquil muʼ bʌ c wen cʼuxbin». Toru miʼ yʌl chaʼan tsaʼ sujti ti «juntiquil quixtañu wen jontol bʌ» tiʼ caj pejtelel jiñi jontolil tsaʼ bʌ i qʼuele. Cheʼ miʼ yʌl jiñi yom bʌ i taj ti ñaxan, miʼ cʼajtesan: «Tsaʼ c mulaj chʌmel cheʼ chʼitoñonto yicʼot com chaʼan mic wen cʌjñel chaʼan tsaʼ c tsʌnsa juntiquil ñumen pʼʌtʌl bʌ bajcheʼ joñon».
Pero cheʼ bʌ Toru yicʼot i yijñam i cʼabaʼ Hannah, tsaʼ caji i cʌñob muʼ bʌ i yʌl jiñi Biblia, Toru tsiʼ wen qʼuexta i melbal yicʼot bajcheʼ yilal. Hannah miʼ yʌl: «Toj sajtel c pusicʼal bajcheʼ tsiʼ qʼuexta i melbal (chaʼleya) jiñi c ñoxiʼal». Ili ora, Toru miʼ yʌl tiʼ jumpʼejl i pusicʼal: «Añʌch juntiquil Dios i wentajonbʌla ti jujuntiquil. Mach yomic cheʼ an majqui miʼ chʌmel i yomʌch i ñusʌben i mul jiñi muʼ bʌ i cʌy ti jumpʼejl i pusicʼal. Miʼ mejlel lac suben pejtelel chuqui la com tajol mach bʌ lac subeyic yambʌlob i mach bʌ i chʼʌmbeyobic isujm. Jehová mach jalix mi caj i jisan jiñi wocol tac yicʼot tiʼ pejtelel muʼ bʌ i yʌqʼueñonla lac chʼijiyemlel. Ili ora cabʌl bajcheʼ miʼ coltañonla jaʼel. I wentajoñʌchla yicʼot miʼ cʌntañonla cheʼ bʌ wen chʼijiyemonla».
Cheʼ bajcheʼ miʼ pʌs tiʼ tojlel Toru, cheʼ la cujil chaʼan Dios miʼ mejlel i jisan pejtelel jiñi wocol muʼ bʌ i yʌcʼonla ti uqʼuel i chaʼan lʌcʼʌlix mi caj i mel miʼ yʌqʼueñonla utsʼatax bʌ lac pijtaya, cheʼ jaʼel miʼ coltañonla chaʼan utsʼat mi la cajñel ti laj cuxtʌlel. Cheʼʌchi, anquese ili pañimil (mulawil) butʼul ti wocol, jiñi i cʼuxbiya Dios mucʼʌch i mejlel i yʌqʼueñet a wenlel.