¿Bajcheʼ miʼ mejlel a taj a wenlel yicʼot a tijicñʌyel cheʼ maʼ pejcan jiñi Biblia?
JOSUÉ tsaʼ aqʼuenti ñuc bʌ i yeʼtel: Yom miʼ coltan ochel jiñi israelob yaʼ ti Lum tsaʼ bʌ wʌn Subentiyob. Pero añʌch i wocolel chaʼan miʼ mejlel i mel iliyi. Jehová miʼ suben chaʼan mucʼʌch caj i mejlel i miʼ suben chaʼan yom chʼejl yicʼot pʼʌtʌl. Miʼ suben chaʼan yom miʼ jacʼben i Mandar yicʼot miʼ pejcan ti jujumpʼejl qʼuin chaʼan miʼ mejlel i tsʼʌctesan tiʼ pejtelel chuqui tsʼijbubil. Tiʼ sube jaʼel, chaʼan mi mucʼʌch i mel iliyi, mi caj i taj i wenlel i toj chuqui mi caj i mel (Jos. 1:7, 8).
«Ti cojix bʌ qʼuin tac tal i yorajlel bʌbʌqʼuen tac bʌ» i mi caj lac ñusan tsʌts tac bʌ wocol jaʼel (2 Ti. 3:1). Wen mi caj la cujtel jaʼel mi mucʼʌch lac mel tsaʼ bʌ i sube Jehová jiñi Josué. Cheʼ mi lac pejcan jiñi Biblia tiʼ pejtelel ora, mi caj i coltañonla chaʼan mi laj cʼʌn ti wen jiñi principio tac cheʼ bʌ miʼ tilel wocol.
Tiʼ sujm, cabʌlonla mach la cujilic bajcheʼ yom mi lac pejcan jiñi jun tac i an maʼañic bʌ mi lac mulan. Wen ñuc i cʼʌjñibal cheʼ mi lac pejcan jiñi Biblia, jin chaʼan, yom mi laj qʼuel yaʼ baqui miʼ yʌl «Ñopo a mel iliyi». Yaʼi mi caj lac taj wen tac bʌ ticʼojel chaʼan mi lac ñumen taj lac wenlel yicʼot lac tijicñʌyel cheʼ mi lac pejcan jiñi Biblia.
Juntiquil salmista tsiʼ cʼʌyi: «Tojʼesañon majlel ti a bijlel, come tijicña mi cubin a mandar» (Sal. 119:35). Miʼ mejlel a wen taj a tijicñʌyel jaʼel cheʼ bʌ maʼ pejcan i Tʼan Dios. Mi caj a taj ñuc tac bʌ i cʼʌjñibal cheʼ bʌ maʼ ñumen cʌn majlel.
Anquese jatet maʼañic maʼ coltan jumpʼejl tejclum cheʼ bajcheʼ Josué, añʌch a bajñel wocol tac. Jin chaʼan, lajal bajcheʼ Josué, pejcan jiñi Biblia chaʼan maʼ taj a wenlel i pʌsʌ ti a melbal. Mi cheʼʌch maʼ mel, wen mi caj a wujtel i toj chuqui mi caj a mel.