Laʼ lac bej colel bajcheʼ xsubtʼan
1. Cheʼ ti ñaxam bʌ siglo, an ejemplo tac muʼ bʌ i pʌsbeñonla chaʼan yom to mi lac bej colel tiʼ chaʼan bʌ Dios bajcheʼ xsubtʼañob, ¿baqui tac bʌ jiñi ejemplo?
1 Jiñi xñoptʼañob yom miʼ bej colelob tiʼ chaʼan bʌ Dios bajcheʼ xsubtʼañob. Jin chaʼan, Jesús tsiʼ wen cʌntesa jiñi xcʌntʼañob ti wajali chaʼan miʼ sujtesañob ti xcʌntʼan jiñi quixtañujob (Lc. 9:1-5; 10:1-11). Cheʼ jaʼel, cheʼ bʌ Aquila yicʼot Priscila tsiʼ qʼueleyob ti cʌntesa jiñi Apolos «tsiʼ pʌyʌyob chaʼan miʼ tsictesʌbeñob i bijlel Dios ti toj» (Hch. 18:24-26). Jin chaʼan, jiñi apóstol Pablo tsiʼ pʼʌtʼesa Timoteo, juntiquil xsubtʼan wen añix bʌ i ñaʼtʌbal, chaʼan miʼ chʌn chaʼlen cʌntesa yicʼot i bʌxlel «chaʼan miʼ laj qʼuelob» (1 Ti. 4:13-15). Anquese añix cabʌl o maxto cabʌlic ora laj cajel lac sub jiñi wen tʼan cheʼ bajcheʼ xʼeʼtelob i chaʼan lac Yum, pero yom to mi lac ñumen weñʼesan bajcheʼ mucʼonla ti subtʼan.
2. ¿Bajcheʼ miʼ mejlel laj cʌn muʼ bʌ i mel jiñi yambʌlob?
2 Cʌñʌ muʼ bʌ i mel yambʌlob. Chaʼan mi lac ñumen weñʼesan lac subtʼan yom mi laj cʌmben bajcheʼ miʼ melob yambʌlob (Pr. 27:17). Jin chaʼan, wen ñʌchʼtan cheʼ bʌ woli ti subtʼan jiñi a piʼʌl. Cʼajtiben ticʼojel tac jiñi wen añobix bʌ i ñaʼtʌbal ti subtʼan yicʼot wen ñʌchʼtan chuqui miʼ subeñetob (Pr. 1:5). ¿Wocol ba ti melol jumpʼejl revisita maʼ wubin, ti techol jumpʼejl estudio loqʼuem bʌ ti Biblia, o chaʼan maʼ mel yambʌ a weʼtel ti subtʼan? Cʼajtiben jiñi am bʌ tiʼ wenta jiñi grupo chaʼan subtʼan o juntiquil wen añix bʌ i ñaʼtʌbal ti subtʼan chaʼan miʼ cʌntesañet. Cʼajtesan jaʼel chaʼan miʼ mejlel i coltañonla jiñi chʼujul bʌ i yespíritu Jehová chaʼan mi lac weñʼesan jiñi lac subtʼan. Jin chaʼan, chʌn pejcan Jehová ti oración chaʼan miʼ coltañet yicʼot i yespíritu (Lucas 11:1).
3. ¿Bajcheʼ yom mi lac jacʼ mi tsaʼ aqʼuentiyonla jumpʼejl ticʼojel, anquese maʼañic tsaʼ laj cʼajti?
3 Mi tsaʼ subentiyet jumpʼejl ticʼojel chaʼan a subtʼan, anquese maʼañic tsaʼ cʼajti, mach michʼaquet (Ec. 7:9). Cheʼ yom maʼ mel bajcheʼ Apolos, tsaʼ bʌ i jacʼʌ jiñi coltʌntel yicʼot i pecʼlel, i tsiʼ wen qʼuele ti ñuc. Mi cheʼʌch mi lac mel bajcheʼ jiñi, woli lac pʌs chaʼan añʌch lac ñaʼtʌbal (Pr. 12:15).
4. ¿Chucoch tsiʼ yʌlʌ Jesús chaʼan yom cheʼ mi lac chʌn colel majlel tiʼ chaʼan bʌ Dios bajcheʼ xsubtʼañob?
4 Cheʼ bʌ mi lac bej colel miʼ yʌqʼuen i ñuclel Dios. Jesús tsiʼ cʼʌñʌ lajiya tac chaʼan miʼ ñuqʼuesʌben i pusicʼal jiñi xcʌntʼañob chaʼan miʼ chʌn colelob majlel tiʼ chaʼan bʌ Dios bajcheʼ xsubtʼañob. Tsiʼ laja i bʌ bajcheʼ tsʼusubil, i jiñi bombiloʼ bʌ xcʌntʼañob i chaʼan tsiʼ lajayob bajcheʼ i teʼel jiñi tsʼusubil. Jesús tsiʼ yʌlʌ chaʼan i Tat miʼ sʌqʼuesʌben i teʼel jiñi tsʼusubil «chaʼan ñumen cabʌl miʼ yʌcʼ i wut» (Juan 15:2). I yum jiñi tsʼusubil miʼ mulan chaʼan miʼ ñumen acʼ i wut jiñi i tsʼusubil, cheʼ jaʼel Jehová miʼ mulan cheʼ mi cʌcʼ lac wut ti subtʼan (He. 13:15). ¿Baqui bʌ wenlel mi lac taj cheʼ bʌ mi lac chʌn colel majlel tiʼ chaʼan bʌ Dios bajcheʼ xsubtʼañob? Jesús miʼ yʌqʼueñonla i jacʼbal: «Miʼ caj ti pʌstʌl i ñuclel c Tat, cheʼ mi laʼ wʌcʼ cabʌl la wut» (Juan 15:8).