Jiñi cʼuxbiya miʼ yʌqʼueñonla lac ñaxan ñaʼtan yambʌlob i mach ñaxañic joñonla.
¿Bajcheʼ mi lac pʌsbeñob cʼuxbiya jiñi yambʌlob?
Ti lac pejtelel tilemonla ti Adán. Ili yom i yʌl chaʼan jumpʼejl jach familiajonla. Anquese ti jumpʼejl familia yom miʼ cʼuxbiñob i bʌ yicʼot miʼ qʼuelob i bʌ ti ñuc, ili ora maʼañic woli laj qʼuel jiñi cʼuxbiya. Pero mach jiñic yom bʌ Dios.
¿CHUQUI MIʼ YɅL JIÑI I TʼAN DIOS CHAʼAN JIÑI CʼUXBIYA?
«Yom maʼ cʼuxbin a piʼʌl cheʼ bajcheʼ maʼ cʼuxbin a bʌ» (LEVÍTICO 19:18, TNM).
«Cʼuxbin laʼ contrajob» (MATEO 5:44).
¿BAJCHEʼ MI LAC PɅS CHAʼAN MI LAJ CʼUXBIN YAMBɅLOB?
Yaʼ ti 1 Corintios 13:4-7 Dios miʼ yʌl bajcheʼ yilal jiñi cʼuxbiya.
«Jini yujil bʌ cʼuxbiya jal miʼ cuchben i mul yañoʼ bʌ, wen uts i pusicʼal».
Ñaʼtancu ili: ¿Bajcheʼ yubil maʼ wubin cheʼ bʌ juntiquil yujil pijt, uts yicʼot mach ti orajic miʼ michʼan cheʼ bʌ mach weñic chuqui maʼ mel?
«Mach tsʌytsʌyñayic i pusicʼal».
Ñaʼtancu ili: ¿Bajcheʼ yubil maʼ wubin cheʼ bʌ an juntiquil mach bʌ añic miʼ ñop a tʼan o miʼ tsʼaʼleñet chaʼan chuqui an a chaʼan?
«Maʼanic miʼ sajcan chuqui yom tiʼ bajñel pusicʼal».
Ñaʼtancu ili: ¿Bajcheʼ yubil maʼ wubin cheʼ bʌ an majqui miʼ qʼuel ti ñuc muʼ bʌ a wʌl i mach tiʼ pejtelelic ora jin miʼ bajñel qʼuel i bʌ ti ñuc?
«Maʼanic miʼ lot tiʼ pusicʼal i contrajintel».
Ñaʼtancu ili: Dios yomʌch i ñusʌbeñonla lac mul. «Mach tiʼ pejtelelic ora mi caj i ticʼonla. Maʼanic miʼ cʌntan i michʼajel tiʼ pejtelel ora» (Salmo 103:9). Miʼ laj qʼuel ti ñuc cheʼ bʌ an majqui miʼ ñusan lac mul. Jin chaʼan, joñonla jaʼel yom mi lac ñusʌben i mul jiñi yambʌlob (Salmo 86:5).
«Mach tijicñayic miʼ yubin cheʼ miʼ ticʼlʌntel jini toj bʌ».
Ñaʼtancu ili: Maʼañic mi lac mulan cheʼ tijicñayob jiñi yambʌlob tiʼ caj chuqui mach bʌ weñic mi lac ñusan. Jin chaʼan, mach yomic tijicñayonla cheʼ bʌ jiñi yambʌlob miʼ ñusañob wocol, anquese miʼ melbeñoñobla mach bʌ weñic.
Mi la com chaʼan Dios miʼ yʌqʼueñonla i bendición, yom mi laj cʼuxbin yambʌlob i mach yʌlʌyic jaypʼejl i jabilelob, baqui chʼoyolob yicʼot baqui bʌ i ñopbalob. Junchajp bajcheʼ mi lac pʌs cʼuxbiya jiñʌch cheʼ mi laj coltan jiñi yomoʼ bʌ coltʌntel.