Dios miʼ mejlel i yʌqʼueñet cabʌl bendición tiʼ pejtelel ora

Dios tsiʼ wʌn sube jiñi xʼaltʼan Abrahán chaʼan ti juntiquil i pʼolbal mi caj i taj cabʌl bendición jiñi «winicob xʼixicob tiʼ pejtelel pañimil» (Génesis 22:18). ¿Majqui woliʼ taj ti tʼan?

Lʌcʼʌ añix cheʼ bʌ 2 mil jab, Dios tsiʼ yʌqʼue i pʼʌtʌlel Jesús chaʼan miʼ mel milagro tac. Jiñi milagro tac tsiʼ pʌsʌ chaʼan Dios tiʼ coltaya Jesús mi caj i tsʼʌctesan jiñi tsaʼ bʌ i wʌn sube Abrahán chaʼan jiñi wiñicob xʼixicob (quixtañujob) tiʼ pejtelel pañimil mi caj i tajob bendición (Gálatas 3:14).

Jiñi i milagro tac Jesús tsiʼ colta jiñi quixtañujob i cʌñob chaʼan jiñʌch jiñi xʼaltʼan yajcʌbil bʌ ti Dios chaʼan miʼ yʌqʼueñonla cabʌl bendición. Tsiʼ pʌsʌ jaʼel bajcheʼ Dios mi caj i cʼʌn Jesús ti talto bʌ qʼuin chaʼan miʼ yʌqʼueñonla cabʌl bendición tiʼ pejtelel ora. Laʼ laj qʼuel bajcheʼ jiñi i milagro tac Jesús miʼ pʌs wen tac bʌ i melbal (chaʼlibal).

Tsiʼ pʌsʌ i cʼuxbiya i tsiʼ lajmesa jiñi cʼamoʼ bʌ.

Ti jumpʼejl bʌ qʼuin, juntiquil wiñic am bʌ leco bʌ i tsoy tiʼ sube Jesús miʼ yom i lajmesan. Jesús tsiʼ tʌlʌ i tiʼ sube: «Com cu». Ti jin jach bʌ ora tsaʼ lajmi i tsoy (Marcos 1:40-42).

Tsiʼ pʌsʌ i yutslel i tsiʼ weʼsa jiñi wiʼñayoʼ bʌ.

Jesús mach yomic chaʼan jiñi quixtañujob miʼ yubiñob wiʼñal. Mach ti junsujtel jach tsiʼ mele milagro chaʼan miʼ weʼsan quixtañujob cheʼ bʌ tsiʼ cʼʌñʌ pan yicʼot chʌy (Mateo 14:17-21; 15:32-38). Tsaʼ luʼ ñajʼayob, i tsaʼto colobʌyi.

Tsiʼ pʌsʌ i pʼuntaya i tsiʼ chaʼ tejchesa jiñi chʌmeñoʼ bʌ.

Cheʼ bʌ tsiʼ qʼuele chaʼan juntiquil mebaʼ xʼixic tsaʼ chʌmi cojach bʌ i yalobil i maʼañic majqui yambʌ miʼ mejlel i cʌntan, Jesús «tsiʼ pʼunta» i tsiʼ chaʼ cuxtesʌbe i yalobil (Lucas 7:12-15).