¿Am ba baqui miʼ mejlel a taj a coltʌntel chaʼan wen maʼ wajñel ti talto bʌ qʼuin?

Cheʼ bajcheʼ tsaʼix laj qʼuele, jiñi lac piʼʌlob an i chaʼleyob wersa chaʼan wen miʼ yajñelob ti talto bʌ qʼuin tiʼ coltaya jiñi destino, jiñi escuela, jiñi taqʼuin o cheʼ mach jontolobic (mañajobic). Pero cheʼ miʼ melob (chaʼleñob) iliyi lajal bajcheʼ woli (choncol) i cʼʌñob jumpʼejl mapa mach bʌ weñic chaʼan an baqui miʼ cʼotelob. Pero jiñi mach yomic i yʌl chaʼan maʼañic jumpʼejl laj coltʌntel muʼ bʌ i mejlel lac ñop chaʼan miʼ coltañonla chaʼan bʌ jiñi talto bʌ qʼuin.

I COLTAYA JUNTIQUIL ÑUMEN AM BɅ I ÑAʼTɅBAL

Cheʼ bʌ an chuqui mi caj lac mel, lʌcʼʌ tiʼ pejtelel ora mi laj cʼajtiben i coltaya juntiquil ñumen añix bʌ i ñaʼtʌbal o ñumen añix bʌ i jabilel. Jin chaʼan, chaʼan ñumen wen mi la cajñel ti talto bʌ qʼuin, weñʌch cheʼ mi laj cʼajtiben i coltaya juntiquil ñumen añix bʌ i ñaʼtʌbal bajcheʼ joñonla. Ili laj coltʌntel jiñʌch jiñi chʼujul bʌ tsʼijbujel añix bʌ cheʼ bʌ 3 mil 500 jab tsaʼ caji ti tsʼijbuntel. Ili jiñʌch jiñi Biblia.

¿Chucoch miʼ mejlel a ñop ti jiñi Biblia? Come jiñi tsaʼ bʌ i mele jiñʌch ñumen am bʌ i ñaʼtʌbal. Jiñʌch «jini Am bʌ Cabʌl i Jabilel», añix bʌ «cʼʌlʌl wajali cʼʌlʌl tiʼ pejtelel ora» (Daniel 7:9; Salmo 90:2). Jiñʌch «lac Yum, jiñʌch Dios. Tsiʼ mele panchan yicʼot pañimil, yicʼot pejtelel chuqui tac an» (Isaías 45:18). I miʼ subeñonla chuqui i cʼabaʼ: Jehová (Salmo 83:18, TNM).

Jiñi Biblia tilem ti jiñi tsaʼ bʌ i mele pejtelel lac piʼʌlob, jin chaʼan maʼañic miʼ pʌs chaʼan jumpʼejl cultura o junmojt lac piʼʌlob ñumen ñuc bajcheʼ yambʌ. Añʌch i cʼʌjñibal jiñi i ticʼojel tac i an i colta cabʌl lac piʼʌlob. Jiñʌch jiñi libro ñumen melbil (pʌtbil) bʌ ti yambʌ tʼan tac yicʼot ñumen pucbil bʌ tiʼ pejtelel pañimil.a Jin chaʼan, majqui jach miʼ mejlel i chʼʌmben i sujm ti ora i miʼ taj i coltʌntel. Jiñi Biblia miʼ yʌl:

«Dios junlajal miʼ qʼuel pejtelel lac piʼʌlob, miʼ chʼʌm pejtelel muʼ bʌ i bʌcʼñan yicʼot muʼ bʌ i mel chuqui wen, mach yʌlʌyic baqui chʼoyol» (HECHOS 10:34, 35).

Cheʼ bajcheʼ juntiquil tatʌl miʼ cʼuxbin yicʼot miʼ coltan i yalobilob, Jehová juntiquilʌch Tatʌl yujil bʌ cʼuxbiya muʼ bʌ i coltañonla ti jiñi i Tʼan, jiñi Biblia (2 Timoteo 3:16). Jatet miʼ mejlel a ñop ti jiñi i Tʼan Dios. Cheʼ jaʼel, jiñʌch tsiʼ meleyonla i yujil chuqui ñumen wem bʌ chaʼañonla.

¿Chuqui yom maʼ mel chaʼan maʼ taj iliyi? Mi caj a qʼuel ti jiñi yambʌ tema.