¿BAJCHEʼ MIʼ MEJLEL LAC JISAN JIÑI TSʼAʼLEYA?

2 | Mach laʼ qʼuextan muʼ bʌ laʼ melbentel

Jiñi Biblia miʼ yʌl:

«Mach yomic mi laʼ qʼuextan chuqui mach bʌ weñic mi laʼ melbentel […]. Mi mucʼʌch i mejlel, yaʼ baqui chilil ti laʼ tojlel, ajñenla ti ñʌchʼtʌlel laʼ wicʼot yambʌlob. Cʼuxbibiletbʌla, mach laʼ chaʼ qʼuextan chuqui mi laʼ tumbentel […]. Come tsʼijbubil: ‹Joñon mi caj j qʼuextʌbeñob, joñon mi caj cʌqʼueñob i tojob i mul, cheʼʌch miʼ yʌl Jehová›» (ROMANOS 12:17-19).

¿Chuqui yom i yʌl?

Mucʼʌch lac michʼan cheʼ bʌ mi lac melbentel mach bʌ weñic, pero Dios miʼ subeñonla chaʼan mach yomic mi lac chaʼ qʼuextan. Miʼ subeñonla chaʼan mi lac pijtan come jiñʌch muʼ bʌ caj i tojʼesan jiñi toʼol ticʼlʌntel (Salmo 37:7, 10).

Miʼ mejlel a mel iliyi:

Cheʼ bʌ juntiquil miʼ mel mach bʌ weñic i mi laj qʼuextʌben mucʼ jach i bej pʼojlel jiñi tsʼaʼleya. Jin chaʼan, mi an majqui tsiʼ melbet mach bʌ weñic mach a chaʼ qʼuextʌben. Tiqʼui a bʌ i mele chuqui wen, i an tajol ñumen wen cheʼ mucʼ jach a wʌcʼ ti ñumel (Proverbios 19:11). Cheʼ jaʼel, tajol ñumen wen cheʼ maʼ sʌclan bajcheʼ miʼ tojʼan jiñi wocol. Jumpʼejl ejemplo, mi tsaʼ melbentiyet mach bʌ weñic, ñumen wen cheʼ maʼ sub ti policía o tiʼ tojlel añoʼ bʌ i yeʼtel.

Cheʼ bʌ mi laj qʼuextʌben chuqui miʼ tumbeñonla juntiquil mucʼ jach i yʌcʼonla ti wocol

¿Ixcu mi tsaʼ qʼuele chaʼan maʼañic mi caj i mejlel a tojʼesan jiñi wocol ti wen? ¿Ixcu mi tsaʼ qʼuele chaʼan maʼañix yambʌ chuqui miʼ mejlel a mel chaʼan maʼ tojʼesan jiñi wocol? Pero mach a qʼuextʌben jiñi tsaʼ bʌ i melbet mach bʌ weñic, cʌyʌx a tsʼaʼlen. Ñopo chaʼan Dios mi caj i tojʼesan jiñi wocol. Ti Salmo 37:3-5, miʼ yʌl: «Ñopo lac Yum. Mi caj i jolontesan chuqui maʼ ñaʼtan a mel».

Tsaʼ bʌ ujti tiʼ tojlel juntiquil lac piʼʌl: ADRIÁN

Maʼañix tsaʼ chaʼ caji i qʼuextan chuqui miʼ tumbentel

Cheʼ bʌ xcolelto Adrián butʼul i pusicʼal ti tsʼaʼleya i miʼ mulan i chaʼ qʼuextʌben muʼ bʌ i ticʼlan. Miʼ yʌl: «Mach junsujtel jach yaʼañon ñumel baʼ miʼ yujtel julbʌl, an i tajol chʌmeñoñix yilal miʼ tajoñob yaʼ ti calle».

Cheʼ bʌ 16 i jabilel Adrián, tsaʼ caji i chʼʌm estudio. Miʼ chaʼ al: «Cheʼ bʌ tsaʼ caji j cʌn majlel muʼ bʌ i yʌl jiñi Biblia, tsaʼ cʼoti j qʼuel chaʼan yom mij qʼuextan c melbal». Yomʌch miʼ cʌy tsʼaʼleya yicʼot jontolil. Jumpʼejl texto tsaʼ bʌ wen cʼoti tiʼ pusicʼal jiñʌch am bʌ ti Romanos 12:17-19, baqui miʼ yʌl chaʼan mach yomic miʼ chaʼ qʼuextan chuqui miʼ tumbentel. Miʼ bej al: «Tsiʼ coltayon j qʼuel chaʼan jiñʌch Jehová muʼ bʌ caj i tojʼesan jiñi toʼol ticʼlʌntel i jiñʌch yujil jala mi caj i mel, tsaʼ caji j cʌy majlel jiñi jontolil».

Ti jumpʼejl bʌ acʼʌlel, tsiʼ taja jiñi junmojt xcolelob i contra bʌ ti wajali cheʼ bʌ ochemto yicʼot yambʌ junmojt xcolelob jontoloʼ bʌ jaʼel, i jiñi poj i yum bʌ i contrajoʼ bʌ ti wajali, tiʼ sube: «¡Coltan a bʌ!». Adrián miʼ yʌl chaʼan yomʌch i coltan i bʌ, pero maʼañic tsiʼ mele, tsiʼ melbe oración Jehová i tsaʼ mejli ti putsʼel.

Adrián miʼ yʌl: «Tiʼ yijcʼʌlel tsaʼ c taja jiñi poj i yum bʌ j contrajob ti wajali, pero ti jiñi bʌ ora i bajñel jach. Wen michʼon i colel c chaʼ qʼuextʌbeñob tsaʼ bʌ i melbeyoñob. Pero tsaʼ c chaʼ melbe oración Jehová chaʼan miʼ coltañon c ticʼ c bʌ. Toj sajtel c pusicʼal cheʼ bʌ tsaʼ caji i lʌcʼtesan i bʌ tic tojlel i tiʼ subeyon: ‹Ñusʌbeñon chaʼan tsaʼ bʌ ujti acʼbi ti acʼʌlel, tiʼ sujm com sujtel bajcheʼ jatet, com j cʌn muʼ bʌ i yʌl jiñi Biblia›. ¡I wenlel tsaʼ bʌ c taja cheʼ tic tiqʼui c michʼajel jiñʌch cheʼ jiñi chʼiton tsaʼ caji ti estudio jaʼel».