¿A wujilix ba?
¿Chucoch weñʌch tiʼ tojlel jiñi israelitajob cheʼ Jehová tsiʼ yʌlʌ chaʼan miʼ mejlel i yʌcʼob xpuruwoc yicʼot xʼujcuts?
JIÑI Mandar tsaʼ bʌ aqʼuenti Moisés miʼ yʌl chaʼan Jehová miʼ chʼʌm bajcheʼ majtan jiñi xʼujcuts yicʼot xpuruwoc. Jiñi mandar tac muʼ bʌ i taj ti tʼan jiñi majtañʌl tac miʼ laja taj ti tʼan ili chaʼcojt xmateʼmut. Baqui jach bʌ miʼ mejlel i yʌcʼob jiñi israelitajob (Lv. 1:14; 12:8; 14:30). Weñʌch iliyi come an i tajol maʼañic miʼ mejlel ti tajtʌl jiñi xpuruwoc. Laʼ laj qʼuel chucoch.
Xpuruwoc
Jiñi xpuruwoc an ti Israel cheʼ bʌ wen i yorajlel ticwal. Cheʼ ti octubre miʼ majlelob ti sur ti jiñi país tac baqui ñumen an ticwal i miʼ chaʼ sujtelob ti lsrael cheʼ bʌ chaʼ i yorajlelix ticwal (Cnt. 2:11, 12; Jer. 8:7). Jin chaʼan, cheʼ tiʼ yorajlel tsʌñal wocol miʼ yubiñob jiñi israelitajob chaʼan miʼ tajob xpuruwoc chaʼan miʼ yʌcʼob bajcheʼ majtan.
Xʼujcuts
Pero jiñi xʼujcuts maʼañic baqui yambʌ miʼ majlel, jin chaʼan tiʼ pejtelel ora an ti Israel. Cheʼ jaʼel, an ti ototʌl tac (laja yicʼot Juan 2:14, 16). Jumpʼejl libro miʼ yʌl chaʼan ti jiñi alʌ tejclum tac o colem tejclum tac am bʌ yaʼi, «jiñi lac piʼʌlob añob i chaʼan jiñi xʼujcuts. Tiʼ pejtelel ototʌl tac miʼ cosañob xʼujcuts, jowol i chaʼañob jiñi pared i yaʼʌch miʼ yajñel jiñi xʼujcuts tac» (laja yicʼot Isaías 60:8).
Xʼujcuts am bʌ tiʼ met
¿Chuqui miʼ pʌsbeñonla tiʼ tojlel Jehová iliyi? Chaʼan juntiquilʌch Dios yujil bʌ cʼuxbiya yicʼot muʼ bʌ i chʼʌmbeñonla i sujm, come tsiʼ yʌcʼʌ chaʼan jiñi israelitajob miʼ yʌcʼob bajcheʼ majtañʌl jiñi xmateʼmut muʼ bʌ i mejlel i tajob tiʼ pejtelel ora.