¿A wujilix ba?

¿Añʌch ba i sujmlel cheʼ jiñi xchoñoñelob ti templo am bʌ ti Jerusalén tsaʼ subentiyob ti «xujchʼob»?

JIÑI Evangelio i chaʼan Mateo miʼ yʌl: «Jesús tsaʼ ochi ti Templo. Tsaʼ caji i choc loqʼuel jini woliyoʼ bʌ ti choñoñel yicʼot mʌñoñel ti Templo. Jesús tsiʼ chʼaʼ chocobeyob i mesa tac xqʼuex taqʼuiñob yicʼot i buchlib tac jini woli bʌ i choñob xʼujcuts. Jesús tsiʼ subeyob: Tsʼijbubil ti jun: ‹Miʼ caj ti ajlel cotot tiʼ yotlel oración›. Pero jatetla wolix laʼ sutqʼuin tiʼ chʼeñal xujchʼob» (Mt. 21:12, 13).

Jiñi tsʼijbubil bʌ tiʼ tojlel judíojob miʼ yʌl chaʼan jiñi xchoñoñelob yaʼ ti templo miʼ ticʼ lañob jiñi xmʌñoñelob come cʌlʌx lets i tojol chuqui miʼ choñob. Jumpʼejl ejemplo, jiñi tsʼijbubil bʌ i chaʼan judíojob wajali miʼ yʌl chaʼan cheʼ ti ñaxam bʌ siglo tsaʼ cʼoti i yorajlel cheʼ bʌ chaʼcojt xʼujcuts miʼ chojñel ti jumpʼejl denario melbil bʌ ti oro. Chaʼan miʼ tajtʌl iliyi, juntiquil wiñic yom miʼ chaʼlen eʼtel 25 qʼuin. Jiñi Mandar miʼ yʌl chaʼan jiñi pʼumpʼuñoʼ bʌ miʼ mejlel i yʌcʼob xmucuy o xʼujcuts bajcheʼ tsʌnsʌbil bʌ majtañʌl, pero wocolix tsaʼ caji i tajob come tsaʼ wen letsi i tojol (Lv. 1:14; 5:7; 12:6-8). Juntiquil wen yujil bʌ chaʼan i mandar judíojob i cʼabaʼ Simeón ben Gamaliel mach weñic tsiʼ qʼuele bajcheʼ woli ti ujtel, i tsʼitaʼ jax tsaʼ caji i cʼajtin jiñi majtañʌl yom bʌ miʼ wersa ajqʼuel. Tiʼ caj jiñi, juntiquil quixtañu uxpʼejl jax ora yom miʼ chaʼlen eʼtel chaʼan miʼ mejlel i mʌn chaʼcojt xʼujcuts.

Cheʼ bajcheʼ tsaʼix laj qʼuele, Jesús tiʼ sube ti «xujchʼob» jiñi xchoñoñelob yaʼ ti templo come mucʼ jach i mulan i ticʼlañob jiñi quixtañujob yicʼot miʼ mulañob taqʼuin.