Cʌntesʌntel 89
Tsiʼ choco loqʼuel xchoñoñelob
JESÚS wen michʼ mi laj qʼuel ila ti dibujo, ¿ñomach? ¿Awujil ba chucoch? Come jini winicob yaʼ bʌ añob tiʼ templo Dios, ti Jerusalén, taqʼuin jach miʼ wen mulañob. Woliʼ wen tajob taqʼuin tiʼ tojlel jini winicob xʼixicob tsaʼ bʌ cʼoti i chʼujutesañob Dios.
¿Muʼ baʼ qʼuel yaʼ ti dibujo jini alʌ wacax tac, tiñʌmeʼ tac yicʼot xʼujcuts tac? Weno, jini winicob woliyob ti choñoñel yaʼ ti templo. ¿Awujil ba chucoch? Come jini israelob miʼ cʼʌñob jini añimal tac yicʼot xteʼlemut tac chaʼan miʼ yʌqʼueñob i majtan Dios.
Jini mandar tsaʼ bʌ yʌcʼʌ Dios mi yʌl chaʼan jini israelob muʼ bʌ i chaʼleñob mulil yom mi yʌqʼueñob i majtan Dios. Pero jini yambʌ israelob yom miʼ yʌcʼob i majtan jaʼel, anquese maʼañobic i mul. Pero, ¿baqui miʼ mejlel i tajob jini xteʼlemut tac yicʼot jini añimal tac chaʼan miʼ yʌqʼueñob i majtan Dios?
Lamitalob añobʌch i teʼlemut yicʼot añimal tac chaʼan miʼ yʌqʼueñob i majtan Dios. Pero cabʌl israelob maʼañobic i chaʼan. Jini ñajt bʌ chumulob ti Jerusalén, wocol miʼ chʼʌmob majlel jini majtañʌl tac yaʼ ti templo. Jin chaʼan jini winicob xʼixicob miʼ mʌñob jini añimal tac yaʼ ti templo. Pero jini xchoñoñelob wen lets miʼ choñob. Woli jach i xujchʼibeñob i taqʼuin jini muʼ bʌ i cʼotelob yaʼ ti templo. Pero, mach i wentʌlelic miʼ chaʼleñob choñoñel yaʼ tiʼ templo Dios.
Jiñʌch chaʼan Jesús tsaʼ wen michʼa. Jin chaʼan tsiʼ chʼaʼ chocobeyob i mesa tac yicʼot tsiʼ wejtubeyob i taqʼuin jini xchoñoñelob. Yicʼot jaʼel, tsiʼ pʌcʌ jumpʼejl soga chaʼan miʼ cʼʌn i choc loqʼuel añimal tac. Tsaʼ subentiyob jini muʼ bʌ i choñob xʼujcuts: ‹¡Locʼsanla majlel iliyi! Mach mi laʼ sutqʼuin ti choñoñibʌl i yotot c Tat chaʼan jach mi laʼ wen taj taqʼuin›.
Lamital jini woli bʌ i tsajcañob majlel Jesús, yaʼañob i yicʼot ti templo yaʼ ti Jerusalén. Toj sajtelob i pusicʼal cheʼ bʌ tsiʼ qʼueleyob chuqui tsiʼ mele Jesús. Jin chaʼan tsaʼ cʼajtiyi i chaʼañob chuqui mi yʌl jini Biblia tiʼ tojlel i Yalobil Dios: ‹Mi caj i jisʌntel chaʼan i bʌxlel tiʼ yotot Dios›.
Cheʼ bʌ Jesús yaʼan ti Jerusalén cheʼ ti yorajlel Pascua, tsiʼ mele cabʌl milagro tac. Ti wiʼil, Jesús tsaʼ loqʼui ti Judea i tsaʼ chaʼ majli ti Galilea. Pero tsaʼ ñumi yaʼ ti Samaria. Laʼ laj qʼuel chuqui tsaʼ ujti yaʼi.