Jesús miʼ sʌqʼuesan jiñi templo

Cheʼ bʌ ti abril ti jabil 30, Jesús tsaʼ majli ti Jerusalén. Cabʌl tsaʼ majliyob yaʼ ti tejclum chaʼan miʼ melob jiñi qʼuiñijel chaʼan Pascua. Ti jiñi qʼuiñijel, miʼ yʌcʼob añimal tac yaʼ ti templo. An muʼ bʌ i chʼʌmob tilel, i yambʌlob miʼ mʌñob yaʼ ti Jerusalén.

Cheʼ bʌ Jesús tsaʼ cʼoti yaʼ ti templo, tsiʼ qʼuele xchon añimalob. ¡Woli i wen tajob taqʼuin yaʼ baqui miʼ chʼujutesʌntel Jehová! ¿Chuqui tsiʼ mele (chaʼle) Jesús? Tsiʼ pʌcʌ jumpʼejl lazo, i tsiʼ cʼʌñʌ chaʼan miʼ locʼsan tiñʌmeʼ tac yicʼot wacax tac yaʼ ti templo. Tsiʼ chʼaʼ chocbeyob i mesa tac jiñi aj qʼuex taqʼuiñob, i tsaʼ yajli jiñi taqʼuin tac. Jesús tsiʼ sube jiñi woli bʌ i choñob xʼujcuts: «¡Chocola loqʼuel iliyi! ¡Mach laʼ sutqʼuin i yotot c Tat ti choñoñibʌl!».

Tsaʼ toj sajtiyob i pusicʼal jiñi yaʼ bʌ añob ti templo chaʼan tiʼ caj tsaʼ bʌ i mele Jesús. Jiñi xcʌntʼañob i chaʼan tsiʼ chaʼ cʼajtesayob jiñi profecía tiʼ tojlel jiñi Mesías muʼ bʌ i yʌl cheʼi: «Mi caj c wen qʼuel ti ñuc i yotot Jehová».

Ti wiʼil, cheʼ ti jabil 33, Jesús tiʼ chaʼ sʌqʼuesa jiñi templo. Tsiʼ wen acʼʌ ti qʼuelol ti ñuc i yotot i Tat.