Jiñi ticʼojel tac am bʌ ti Biblia mucʼʌch i coltañonla

1. Jiñi ñujpuñel

Mach junlajalic chuqui miʼ ñaʼtʌntel chaʼan jiñi ñujpuñel yicʼot bajcheʼ miʼ mejlel i tajob i tijicñʌyel jiñi ñujpuñemoʼ bʌ.

YOM BɅ I YɅL: Dios yujil chuqui miʼ mejlel i yʌqʼueñob i tijicñʌyel jiñi ñujpuñemoʼ bʌ come jiñʌch tsiʼ mele (Marcos 10:6-9). Tijicña miʼ mejlelob ti ajñel jiñi ñujpuñemoʼ bʌ mi mucʼʌch sʌclañob bajcheʼ miʼ pʼʌtʼesañob i ñujpuñel. Jiñi wiñic muʼ bʌ i cʼuxbin i yijñam miʼ cʌntan i maʼañic miʼ ticʼlan. Jiñi ijñamʌl muʼ bʌ i qʼuel ti ñuc i ñoxiʼal miʼ coltan yicʼot wen jach miʼ pejcan.

JIÑI BIBLIA MUCʼɅCH I COLTAÑONLA: Quang yicʼot i yijñam i cʼabaʼ Thi, chʼoyoloʼ bʌ ti Vietnam, mach tijicñayobic tiʼ ñujpuñel. An i tajol Quang wen jontol (maña). Miʼ yʌl: «Mach c wentajic bajcheʼ yubil miʼ yubin quijñam, an i tajol mic suben chaʼan junyajl maʼañix i cʼʌjñibal». Thi yomix i chaʼlen i bʌ ti divorciar. Miʼ yʌl: «Mach comix ajñel quicʼot tsaʼ cubi i maʼañix mij qʼuel ti ñuc».

Pero ili xñujpuñel tsaʼ cajiyob ti estudio i tsaʼ caji i jacʼob muʼ bʌ i yʌl Efesios 5:33. ¿Baqui bʌ wenlel tsiʼ tajayob? Quang miʼ yʌl: «Ili versículo tsiʼ coltayon j qʼuel chaʼan yom utson tiʼ tojlel quijñam yicʼot chaʼan mij cʼuxbin. Cheʼ jaʼel, tsaʼ j cʌñʌ chaʼan yom mij cʌntan, mi cʌqʼuen chuqui i cʼʌjñibal i chaʼan yicʼot mic chʼʌmben i sujm bajcheʼ yubil miʼ yubin. I cheʼ bʌ mic mel iliyi, miʼ cʼuxbiñon yicʼot miʼ qʼuelon ti ñuc». Thi miʼ yʌl: «Mic chaʼlen wersa chaʼan mic ñumen qʼuel ti ñuc c ñoxiʼal cheʼ bajcheʼ miʼ yʌl Efesios 5:33. Jiñi c ñoxiʼal miʼ pʌs chaʼan mucʼʌch i cʼuxbiñon yicʼot miʼ cʌntañon».

2. Bajcheʼ yilal yom mi laj qʼuel yambʌlob

An i tajol jiñi lac piʼʌlob miʼ tsʼaʼlen yañoʼ bʌ tiʼ caj baqui chʼoyolob, chaʼan bajcheʼ yilalob, chaʼan yʌñʌlob i ñopbal o chaʼan homosexualob.

YOM BɅ I YɅL: Jiñi Biblia maʼañic miʼ yʌl chaʼan mi lac tsʼaʼlen yañoʼ bʌ, mi jiñicto jiñi homosexualob. Muʼ bʌ i subeñonla jiñʌch chaʼan mi laj qʼuel ti ñuc pejtelel lac piʼʌlob, mach yʌlʌyic bajcheʼ yilalob, baqui tilemob, mi an o maʼañobic i taqʼuin (Hechos 10:34). Cheʼ jaʼel, mi mach lajalic lac ñopbal la quicʼotob o maʼañic mi lac mulan bajcheʼ yilalob i melbal (chaʼlibal), yomʌch mi lac pʌsbeñob la cutslel yicʼot mi laj qʼuelob ti ñuc (Mateo 7:12).

JIÑI BIBLIA MUCʼɅCH I COLTAÑONLA: Daniel tsaʼ cʌntesʌnti chaʼan jiñi chʼoyoloʼ bʌ ti Asia miʼ mejlel i techob wocol tiʼ país. Jin chaʼan, tsaʼ caji i wen tsʼaʼleñob i chuqui jax miʼ ñiqʼuisubeñob mach yʌlʌyic baqui an. Daniel miʼ yʌl: «Maʼañic tsaʼ ñumi ti col chaʼan mach weñic woli (choncol) bʌ c mel come woli j coltan c país tsaʼ c ñaʼta».

Ti wiʼil, Daniel tsiʼ cʌñʌ chuqui miʼ yʌl jiñi Biblia. Daniel miʼ yʌl: «Tsaʼ c junyaj j qʼuexta c pensar, tsaʼ j cʌñʌ chaʼan Dios junlajal miʼ qʼuel jiñi lac piʼʌlob. I cheʼʌch tsaʼ caji j qʼuelob jaʼel». ¿Chuqui miʼ ñaʼtan Daniel cheʼ an majqui miʼ cʌn ili ora? Miʼ yʌl: «Wʌle muqʼuix j cʼuxbin tiʼ pejtelel lac piʼʌlob i añix camigojob ti yan tac bʌ país».

Mi a womto a ñumen cʌn, cucu ti jw.org i pejcan jiñi revista ¡Jamʌx a wut! número 3, 2020, am bʌ i títulojlel «¿Muʼ ba caj laj cʌy lac tsʼaʼlen lac bʌ?».

3. Jiñi taqʼuin

Cabʌl lac piʼʌlob miʼ sʌclañob cabʌl taqʼuin come miʼ ñaʼtañob chaʼan mi caj i yʌqʼueñob i tijicñʌyel i chaʼan wen mi caj i chumtʌlob.

YOM BɅ I YɅL: Tiʼ sujm, i cʼʌjñibalʌch lac chaʼan jiñi taqʼuin, pero mach jiñic muʼ bʌ i yʌqʼueñonla lac tijicñʌyel mi jiñicto laj cuxtʌlel (Proverbios 18:11; 23:4, 5). Chaʼan tijicña mi la cajñel yicʼot mi lac taj jiñi laj cuxtʌlel ti talto bʌ qʼuin yom mi lac jacʼ jiñi ticʼojel tac am bʌ ti Biblia (1 Timoteo 6:17-19).

JIÑI BIBLIA MUCʼɅCH I COLTAÑONLA: Juntiquil wiñic ti Indonesia i cʼabaʼ Cardo tsiʼ chaʼle wersa chaʼan miʼ sujtel ti rico i tsaʼʌch sujti, miʼ yʌl: «Tsaʼ c wen chaʼle viaje chaʼan mij cʌn yan tac bʌ país, tsaʼ c mʌñʌ j carro tac, cotot. . . Wen utsʼatax bajcheʼ tsaʼ c ñusa». Pero tsaʼ c laj sʌtʌ chuqui am bʌ c chaʼan. Cardo miʼ yʌl: «Tsiʼ laj xujchʼibeñoñob jiñi c taqʼuin, mach tsiquilic tsaʼ jili anquese cabʌl jab tsaʼ c chaʼle eʼtel (troñel). Maʼañix j cʼʌjñibal tsaʼ cubi c bʌ come maʼañix chuqui an c chaʼan».

Cardo tsaʼ caji i jacʼ jiñi ticʼojel am bʌ ti Biblia chaʼan jiñi taqʼuin i wʌle mach jiñix miʼ chʌn qʼuel ti ñuc. Miʼ mulan cheʼ mach cabʌlix chuqui an i chaʼan. Cardo miʼ yʌl: «Tsaʼ j cʌñʌ chaʼan jiñi ñumen ñuc bʌ i cʼʌjñibal jiñʌch cheʼ lʌcʼʌl an quicʼot Dios, wʌle maʼañix chuqui miʼ chilbeñon c wʌyel, tijicñayoñix tiʼ sujm».

Mi a womto a ñumen cʌn chuqui miʼ yʌl jiñi Biblia chaʼan jiñi taqʼuin, cucu ti jw.org i pejcan jiñi artículo «¿Muʼ ba i mejlel i yʌqʼueñet wem bʌ a cuxtʌlel jiñi escuela yicʼot jiñi taqʼuin?», am bʌ ti jiñi revista Lac tsictesʌbentel número 3, 2021.

4. Jiñi piʼleya

Mach junlajalic chuqui miʼ ñaʼtʌntel chaʼan jiñi piʼleya.

YOM BɅ I YɅL: Jiñi Biblia miʼ yʌl chuqui mach bʌ yomic mi lac mel chaʼan mi lac ñusan lac bʌ ti jiñi piʼleya. Jiñi tʼan «tsʼiʼlel», yaʼ ochem cheʼ bʌ juntiquil wiñic o juntiquil xʼixic miʼ piʼlen mach bʌ i yijñamic o i ñoxiʼalic, o cheʼ bʌ juntiquil wiñic yicʼot juntiquil xʼixic miʼ piʼleñob i bʌ i mach ñujpuñemobic, jiñi xʼixicob muʼ bʌ i choñob i bʌ, jiñi homosexualob yicʼot muʼ bʌ i piʼleñob añimal tac (1 Corintios 6:9, 10). Jiñi piʼleya jiñʌch jumpʼejl majtañʌl tsaʼ bʌ i yʌcʼʌ Dios i cojach miʼ mejlel i mel juntiquil wiñic yicʼot juntiquil xʼixic ñujpuñemoʼ bʌ (Proverbios 5:18, 19).

JIÑI BIBLIA MUCʼɅCH I COLTAÑONLA: Kylie, chʼoyol bʌ ti Australia, miʼ yʌl: «Cheʼ bʌ c bajñelto, tsaʼ c ñaʼta chaʼan tijicña mi caj cajñel cheʼ mi cʌcʼ bʌ ti piʼlentel ti juntiquil wiñic, pero mach cheʼiqui».

Ti wiʼil, Kylie tsaʼ caji i jacʼ jiñi ticʼojel muʼ bʌ i yʌl jiñi Biblia chaʼan jiñi piʼleya. Kylie miʼ yʌl: «Mij qʼuel chaʼan jiñi i ticʼojel tac Dios miʼ coltañonla chaʼan maʼañic mi lac ñusan wocol. Wʌle mic mel muʼ bʌ i mulan Jehová. Wʌle cheʼ bʌ añix c ñoxiʼal miʼ pʌsbeñon chaʼan miʼ cʼuxbiñon yicʼot miʼ cʌntañon. Jiñi Biblia tsiʼ coltayon chaʼan tijicña mi cajñel».