Lajin jiñi ángelob

1, 2. a) ¿Chucoch wen qʼuexelob jiñi ángelob cheʼ bajcheʼ joñonla? b) ¿Chuqui lajal bʌ la quicʼotob?

CHEʼ bʌ Jehová tsiʼ pʌyʌyonla tilel tiʼ yorganización tsiʼ yotsayonla tiʼ familia. Pero mach cojachi, yaʼ ochemob jaʼel jiñi ángelob. Jiñi i familia miʼ wen pʌsob cʼuxbiya i mach junlajalobic (Dn. 7:​9, 10). Cheʼ mi lac ñaʼtan tiʼ tojlel jiñi ángelob, añʌch chuqui qʼuexel yicʼotonla come ñaxan tsaʼ mejliyob (Job 38:​4, 7). Wen pʼʌtʌlob, tojob i joñonla xmulilonla, i maʼañic baʼ ora lajal mi caj lac sujtel bajcheʼob (Luc. 9:26).

² Pero anquese jiñi ángelob wen qʼuexelob bajcheʼ joñonla, añʌch chuqui lajal bʌ la quicʼotob. Jiñi ángelob miʼ lajiñob jiñi utsʼatax tac bʌ i melbal Jehová, librejob chaʼan miʼ yajcañob chuqui yomob i mel (chaʼlen), añob i cʼabaʼ, mach junlajalic bajcheʼ yilalob i qʼuexel tac jiñi eʼtel (troñel) muʼ bʌ i melob. Cheʼʌch joñonla jaʼel, i cheʼ bajcheʼ jiñi ángelob, joñonla mi lac mulan lac chʼujutesan Jehová (1 Ped. 1:12).

3. ¿Chuqui miʼ mejlel laj cʌn tiʼ tojlel jiñi ángelob?

³ Cheʼ bajcheʼ mi laj qʼuel, cabʌl chuqui lajal bʌ la quicʼot jiñi ángelob. Jin chaʼan, an chuqui miʼ mejlel laj cʌn tiʼ tojlelob yicʼot miʼ mejlel i coltañonla. Ti ili estudio mi caj laj qʼuel bajcheʼ miʼ mejlel lac lajibeñob i pecʼlel, i cʼuxbiyajob ti lac piʼʌlob, cheʼ an i lʌtʼʌyob jiñi wocol tac yicʼot cheʼ an i chaʼleyob wersa i cʌntañob jiñi congregación.

JIÑI ÁNGELOB MIʼ PɅSOB I PECʼLEL

4. a) ¿Bajcheʼ miʼ pʌsob i pecʼlel jiñi ángelob? b) ¿Chucoch wen añob i pecʼlel? (Salmo 89:7).

⁴ Jiñi ángelob wen añob i pecʼlel. Anquese cabʌlob i ñaʼtʌbal yicʼot i pʼʌtʌlel, miʼ melob chuqui miʼ subentelob ti Jehová (Sal. 103:20). Maʼañic miʼ qʼuelob i bʌ ti ñuc chaʼan jiñi eʼtel tac muʼ bʌ i yʌqʼuentelob o chaʼan wen pʼʌtʌlob. Tijicña miʼ melob chuqui yom Dios, anquese maʼañic majqui yujil chuqui i cʼabaʼob (Gn. 32:​24, 29; 2 R. 19:35).a Yujilob chaʼan cojach Jehová yom bʌ miʼ chʼujutesʌntel. ¿Chucoch wen añob i pecʼlel? Come miʼ cʼuxbiñob Jehová yicʼot miʼ wen qʼuelob ti ñuc (pejcan Salmo 89:7).

5. ¿Bajcheʼ tsiʼ pʌsʌ i pecʼlel juntiquil ángel cheʼ bʌ jiñi apóstol Juan tsiʼ ñopo i chʼujutesan? (Qʼuele jaʼel jiñi dibujo).

⁵ Yaʼ ti Biblia miʼ tilel jumpʼejl relato wen tsiquil bʌ miʼ pʌs i pecʼlel jiñi ángelob. Tajol jiñʌch jiñi jabil 96, juntiquil ángel maʼañic bʌ miʼ yʌjlel i cʼabaʼ an chuqui wen utsʼatax bʌ tsiʼ pʌsbe jiñi apóstol Juan (Apoc. 1:1). ¿I chuqui tsiʼ mele jiñi apóstol cheʼ bʌ tsiʼ qʼuele jiñi tsaʼ bʌ pʌsbenti? Tsiʼ ñocchoco i bʌ chaʼan miʼ chʼujutesan jiñi ángel. Pero jiñi ángel ti ora tsiʼ yʌlʌ: «¡Tsajalet! ¡Mach a mel jiñi! Joñon xyaj eʼtelon jaʼel bajcheʼ jatet yicʼot bajcheʼ a wermañujob. [ . . . ] ¡Chʼujutesan Dios!» (Apoc. 19:10). ¡Tsaʼʌch i wen pʌsʌ i pecʼlel jiñi ángel! Mach yomic chaʼan miʼ chʼujutesʌntel. Ti ora jach tsiʼ yʌlʌ chaʼan yom miʼ chʼujutesʌntel Jehová. Cheʼ jaʼel, mach ñumen ñuquic tsiʼ yubi i bʌ tiʼ tojlel jiñi apóstol Juan anquese ñumen añix ora woli (choncol) i melben i yeʼtel Jehová yicʼot ñumen pʼʌtʌl. Tsaʼ jach i yʌlʌ: «Joñon xyaj eʼtelon jaʼel bajcheʼ jatet». I anquese tsaʼʌch i tiqʼui jiñi apóstol, ti wen jach bʌ tʼan tsiʼ mele, mach ti tsʌtsic bʌ tʼan. Tajol tsiʼ qʼuele chaʼan Juan tsiʼ mele bajcheʼ jiñi come tsaʼ toj sajti i pusicʼal chaʼan tsaʼ bʌ pʌsbenti.

6. ¿Bajcheʼ miʼ mejlel lac pʌs lac pecʼlel cheʼ bajcheʼ jiñi ángelob?

⁶ ¿Bajcheʼ miʼ mejlel lac lajin i pecʼlel jiñi ángelob? Cheʼ mi lac mel jiñi eʼtel aqʼuebilonbʌla mach lac pʌs chaʼan mi laj qʼuel lac bʌ ti ñuc o chaʼan an chuqui ñumen la cujil bajcheʼ yambʌlob (1 Cor. 4:7). Cheʼ jaʼel, mach lac ñaʼtan chaʼan ñumen la cujil chaʼan jach añix ora cajel lac melben i yeʼtel Jehová o chaʼan an lac chaʼan jumpʼejl privilegio mach bʌ añic i chaʼan yambʌyob. Maʼañic, yom bʌ jiñʌch chaʼan mi lac ñumen pʌs lac pecʼlel mi ñumen an lac privilegio (Luc. 9:48). Cheʼ bajcheʼ jiñi ángelob, la com lac chaʼlen eʼtel chaʼan i wenlel yambʌlob, mach chaʼañic la com la cʌqʼueñob i yubin chaʼan ñumen ñuconla bajcheʼob.

7. ¿Bajcheʼ miʼ mejlel lac pʌs lac pecʼlel cheʼ bʌ an majqui mi lac ticʼ?

⁷ Miʼ mejlel lac pʌs lac pecʼlel jaʼel cheʼ bʌ yom mi lac ticʼ juntiquil hermano o jiñi la calobilob. An i tajol yom mi la cʌcʼ jumpʼejl ticʼojel jamʌ tsiquil bʌ, lajal bʌ bajcheʼ tsiʼ yʌcʼʌ jiñi ángel. Pero yom mi lac mel yicʼot cʼuxbiya chaʼan maʼañic mi la cʌqʼuen i chʼijyemlel jiñi woli bʌ (yʌquel bʌ) lac ticʼ, jin chaʼan yomʌch mi lac pʌs lac pecʼlel. Cheʼ bajcheʼ jiñi, jiñi lac ticʼojel yaʼʌch mi caj i loqʼuel yaʼ ti Biblia i wen jach bajcheʼ mi caj la cʌcʼ (Col. 4:6).

JIÑI ÁNGELOB MIʼ CʼUXBIÑOB LAC PIʼɅLOB

8. a) Cheʼ bajcheʼ miʼ yʌl Lucas 15:​10, ¿bajcheʼ miʼ pʌsob jiñi ángelob chaʼan miʼ cʼuxbiñob lac piʼʌlob? b) ¿Bajcheʼ miʼ chaʼleñob coltaya ti subtʼan jiñi ángelob? (Qʼuele jaʼel jiñi foto).

⁸ Jiñi ángelob miʼ cʼuxbiñoñobla, miʼ qʼuelob ti ñuc cheʼ bʌ an majqui miʼ ñusan wocol. Cheʼ bʌ juntiquil tsaʼ bʌ i ñajtʼesa i bʌ tiʼ tojlel Jehová miʼ chaʼ lʌcʼtesan i bʌ, tijicña miʼ yubiñob. Cheʼʌch miʼ yubiñob jaʼel cheʼ bʌ juntiquil lac piʼʌl miʼ chaʼlen estudio, miʼ chaʼlen wersa i miʼ tech i melben i yeʼtel Jehová (pejcan Lucas 15:10). Cheʼ jaʼel, miʼ wen chaʼleñob coltaya ti subtʼan (Apoc. 14:6). Anquese mach jiñic miʼ pejcañob jiñi lac piʼʌloʼbi, miʼ coltañoñobla chaʼan miʼ mejlel lac tajob jiñi yomoʼ bʌ i cʌn Jehová. Maʼañic miʼ mejlel lac jamʌ al baqui ora tsiʼ coltayonla jiñi ángelob chaʼan miʼ mejlel lac taj juntiquil lac piʼʌl. Cheʼ jaʼel, Jehová an chuqui tac yambʌ miʼ mejlel i cʼʌn, bajcheʼ jiñi i yespíritu, chaʼan miʼ coltan jiñi lac piʼʌlob o chaʼan miʼ coltañonla lac tajob (Hech. 16:​6, 7). Pero Jehová mucʼʌch i wen cʼʌn jiñi ángelob. Jin chaʼan miʼ mejlel lac ñop chaʼan cheʼ bʌ woliyonla ti subtʼan, yaʼʌch añob chaʼan miʼ coltañonla. (Qʼuele jiñi recuadro «Tsaʼ jacʼbentiyob i yoración»).b

9. ¿Bajcheʼ miʼ mejlel lac pʌsben laj cʼuxbiya jiñi lac piʼʌlob cheʼ bajcheʼ miʼ melob jiñi ángelob?

⁹ ¿Bajcheʼ miʼ mejlel lac pʌsben laj cʼuxbiya jiñi lac piʼʌlob cheʼ bajcheʼ miʼ melob jiñi ángelob? Cheʼ bʌ miʼ chaʼlentel ti readmitir juntiquil loqʼuem bʌ ti congregación, miʼ mejlel la cubin lac tijicñʌyel jaʼel. Mi lac pʌsben la cutslel i mi la cʌqʼuen i yubin chaʼan mucʼʌch laj cʼuxbin (Luc. 15:​4-7; 2 Cor. 2:​6-8). Cheʼ jaʼel, miʼ mejlel lac chaʼlen wersa chaʼan mi lac ñumen chaʼlen subtʼan (Ec. 11:6). I lajal bajcheʼ jiñi ángelob miʼ coltañoñobla ti subtʼan, joñonla jaʼel miʼ mejlel lac sʌclan bajcheʼ miʼ mejlel laj coltan ti subtʼan jiñi yambʌ hermanojob. Tajol mi lac mejlel ti loqʼuel la quicʼot juntiquil tsijib publicador o mi laj coltan juntiquil hermano ñoxix bʌ o cʼam bʌ chaʼan miʼ chaʼlen subtʼan.

10. ¿Chuqui miʼ pʌsbeñonla jiñi experiencia chaʼan Sara?

¹⁰ ¿Maʼañix ba maʼ wen mejlel ti subtʼan maʼ wubin cheʼ bajcheʼ cʼamel maʼ mulan? Añixto chuqui miʼ mejlel lac mel chaʼan maʼañic mi laj cʌy comol eʼtel la quicʼot jiñi ángelob. Laʼ laj qʼuel tsaʼ bʌ ujti tiʼ tojlel Sara,c juntiquil hermana chumul bʌ ti India. Sara añix 20 jab i cajel bajcheʼ precursora, pero tsaʼ cʼamʼa i maʼañix miʼ mejlel ti tejchel tiʼ wʌyib. Wen chʼijyem tsiʼ yubi i bʌ come mi muqʼuicto i mejlel ti buchtʌl i tsʼijbun carta. Pero tsaʼ bʌ i wen colta jiñʌch jiñi hermanojob yicʼot cheʼ bʌ tsiʼ chʌn pejca jiñi Biblia, cheʼ bajcheʼ jiñi tsaʼ chaʼ chʼejlʼa. I cheʼ jaʼel, tiʼ sʌcla chuqui miʼ mejlel i mel chaʼan miʼ bej chaʼlen subtʼan. Jin chaʼan, tsaʼ caji ti subtʼan ti teléfono, tsaʼ caji i pejcan jiñi i cʌñʌyoʼ bʌ i cabʌl tsaʼ cajiyob ti estudio. ¿I chuqui tsaʼ ujti? Ti chaʼpʼej uxpʼejl uw, jiñi hermana añix i chaʼan 70 estudio. Come wen oñix jiñi i estudio, maʼañix miʼ tajben i yorajlel chaʼan miʼ luʼ qʼuelob. Jin chaʼan tsiʼ ñusʌbe jiñi yambʌ hermanojob tiʼ congregación. Cabʌl estudiantejob muqʼuix i majlelob ti tempa bʌ. ¿Bajcheʼ yubil miʼ yubin i bʌ jiñi ángelob? Wen tijicña miʼ yubiñob i bʌ jaʼel cheʼ miʼ chaʼleñob comol eʼtel yicʼot yambʌ hermanojob cheʼoʼ bʌ bajcheʼ Sara, muʼ bʌ i chaʼleñob wersa chaʼan miʼ bej chaʼleñob subtʼan.

JIÑI ÁNGELOB MIʼ LɅTʼOB JIÑI WOCOL TAC

11. ¿Chuqui tac an i lʌtʼʌyob jiñi ángelob?

¹¹ Jiñi ángelob an i wen lʌtʼʌyob jaʼel jiñi wocol tac. An i qʼueleyob cabʌl jontolil ila ti pañimil cʼʌlʌl wajali. Tsiʼ qʼueleyob cheʼ bʌ Satanás yicʼot cabʌl ángelob tsiʼ cʌyʌ i chʼujutesañob Jehová i tsiʼ yʌcʼʌyob i bʌ tiʼ contra (Gn. 3:1; 6:​1, 2; Jud. 6). Jiñi Biblia miʼ taj ti tʼan juntiquil ángel tsaʼ bʌ i chaʼle guerra yicʼot juntiquil pʼʌtʌl bʌ xiba (Dn. 10:13). I cʼʌlʌl wajali cʼʌlʌl ili ora, jiñi ángelob an i qʼueleyob chaʼan mach cabʌlic lac piʼʌlob yomoʼ bʌ i melben i yeʼtel Jehová. Pero anquese cheʼ bajcheʼ jiñi, chʌn xucʼul woliʼ melbeñob i yeʼtel Jehová i yicʼotob i tijicñʌyel come yujilob chaʼan mi caj i cʼotel i yorajlel chaʼan Dios mi caj i jisan pejtelel jiñi wocol yicʼot ticʼlʌntel.

12. ¿Chuqui mi caj i coltañonla lac lʌtʼ jiñi wocol tac?

¹² ¿Bajcheʼ miʼ mejlel lac lajin jiñi ángelob? Tajol mi lac ticʼlʌntel o mi laj contrajintel, pero la cujil i mi lac wen ñop chaʼan mi caj i cʼotel i yorajlel chaʼan Dios miʼ jisan jiñi jontolil. Jin chaʼan, cheʼ bajcheʼ jiñi ángelob, «mach laj cʌy lac mel chuqui wen» (Gál. 6:9). Jehová miʼ yʌcʼ i tʼan chaʼan mi caj i coltañonla laj cuch (1 Cor. 10:13). Miʼ mejlel laj cʼajtiben i yespíritu chaʼan mi lac chʌn chaʼlen pijt yicʼot chʌn tijicñayonla (Gál. 5:22; Col. 1:11). Ixcu mi an a contrajintel, ¿chuqui miʼ mejlel a mel? Wen ñopo ti Jehová i mach a chaʼlen bʌqʼuen. Mi caj i yajñel yicʼotet yicʼot mi caj i yʌqʼueñet a pʼʌtʌlel (Heb. 13:6).

JIÑI ÁNGELOB MIʼ CHAʼLEÑOB COLTAYA CHAʼAN SɅC JIÑI CONGREGACIÓN

13. ¿Chuqui ñuc bʌ eʼtel miʼ melob jiñi ángelob ti ili cojix bʌ qʼuin? (Mateo 13:​47-49).

¹³ Ti ili cojix bʌ qʼuin, Jehová an i yʌqʼue wen ñuc bʌ i yeʼtel jiñi ángelob (pejcan Mateo 13:​47-49). Cabʌl lac piʼʌlob tiʼ petol pañimil yom i cʌñob muʼ bʌ i yʌl jiñi Biblia. An mucʼʌch bʌ i qʼuextañob i melbal i miʼ jacʼbeñob i mandar tac Jehová, i an maʼañic bʌ. Jin chaʼan, jiñi ángelob miʼ «tʼoxob jiñi jontoloʼ bʌ yicʼot jiñi tojoʼ bʌ». Cheʼ bajcheʼ jiñi miʼ coltañob chaʼan sʌc miʼ yajñel jiñi congregación. Ili mach yomic i yʌl chaʼan jiñi muʼ bʌ i cʌyob Jehová maʼañic miʼ mejlelob ti chaʼ sujtel o chaʼan maʼañix wocol yaʼ ti congregación. Miʼ mejlel lac ñop chaʼan jiñi ángelob miʼ chaʼleñob coltaya chaʼan sʌc miʼ yajñel jiñi congregación tac.

14, 15. ¿Bajcheʼ miʼ mejlel lac lajin jiñi ángelob chaʼan sʌc miʼ yajñel jiñi congregación? (Qʼuele jaʼel jiñi foto tac).

¹⁴ ¿Bajcheʼ miʼ mejlel lac lajin jiñi ángelob chaʼan sʌc miʼ yajñel jiñi congregación? Jiñʌch cheʼ mi lac chaʼlen wersa chaʼan chʌn lʌcʼʌl mi la cajñel la quicʼot Jehová. ¿Bajcheʼ mi lac mel iliyi? Jiñʌch cheʼ mi lac yajcan wem bʌ la camigojob mach bʌ añic miʼ ñajtʼesañoñobla ti Jehová. Cheʼ bajcheʼ jiñi mi lac chaʼlen coltaya chaʼan sʌc miʼ yajñel jiñi congregación (Sal. 101:3). Cheʼ jaʼel, miʼ mejlel laj coltan jiñi hermanojob chaʼan chʌn lʌcʼʌl miʼ yajñelob tiʼ tojlel Jehová. ¿Chuqui miʼ mejlel lac mel mi tsaʼ la cubi chaʼan juntiquil hermano tsiʼ chaʼle tsʌts bʌ mulil? Come mi laj cʼuxbin jiñi hermano, mi lac suben chaʼan miʼ pejcan jiñi ancianojob. Pero mi maʼañic miʼ mel, joñonla miʼ mejlel lac subeñob jiñi ancianojob, come jiñi hermano tsaʼ bʌ i chaʼle mulil mach pʼʌtʌlic tiʼ chaʼan bʌ Jehová i yom miʼ coltʌntel (Sant. 5:​14, 15).

¹⁵ Pero an muʼ bʌ i chaʼleñob tsʌts bʌ mulil i yom miʼ chojquelob loqʼuel ti congregación. Cheʼ bʌ miʼ yujtel jiñi, mi laj cʌy lac ñochtañob (1 Cor. 5:​9-13).d Cheʼ bajcheʼ jiñi mi lac chaʼlen coltaya chaʼan sʌc miʼ yajñel jiñi congregación. Cheʼ maʼañic mi lac ñochtan jiñi loqʼuemoʼ bʌ ti congregación mi laj coltañob i qʼuel chaʼan yom miʼ chaʼ sujtelob ti Jehová. Cheʼ bʌ mi chaʼ sujtelob, mi la cubin lac tijicñʌyel cheʼ bajcheʼ Jehová yicʼot jiñi ángelob (Luc. 15:7).

16. ¿Bajcheʼ mi caj a chaʼlen wersa a lajin jiñi ángelob?

¹⁶ Jumpʼejlʌch ñuc bʌ privilegio cheʼ Jehová miʼ yʌcʼ chaʼan mi laj comol chaʼlen eʼtel la quicʼot jiñi ángelob i mi laj cʌn tiʼ tojlelob. Cheʼ bajcheʼ jiñi ángelob, laʼ lac chaʼlen wersa lac pʌs lac pecʼlel, laj cʼuxbin lac piʼʌlob, lac lʌtʼ jiñi wocol tac yicʼot mi lac chaʼlen coltaya chaʼan sʌc miʼ yajñel jiñi congregación. Cheʼ mi lac mel iliyi, mi caj lac mejlel lac chʼujutesan Jehová temel yicʼot i familia tiʼ pejtelel ora.