I cʌntesa tac yambʌ ñopbalʌl

Hinduismo

Jiñi hinduistajob miʼ yʌlob chaʼan cheʼ bʌ mi la quilan wocol tiʼ cajʌch chuqui woli lac mel ili ora o chaʼan an chuqui tsaʼ lac mele ti yambʌ laj cuxtʌlel. Juntiquil lac piʼʌl miʼ cʌy i yilan wocol cheʼ bʌ miʼ taj jiñi moksha, ili yom i yʌl cheʼ ba ora yaʼix jaxʌl miʼ cʌy chaʼ chʼocʼan. Chaʼan miʼ mejlel i taj iliyi, yom miʼ locʼsan tiʼ pensar jiñi wocol tac am bʌ ti ili pañimil (mulawil).

Islam

Jiñi musulmañob miʼ yʌlob chaʼan cheʼ bʌ mi la quilan wocol jiñʌch i tojol mulil, i cheʼ jaʼel miʼ qʼuejlel mi pʼʌtʌlʌch lac ñopoñel (chʼujbiya). Jiñi Sayyid Syeed, presidente de la Sociedad Islámica de América del Norte, miʼ yʌl chaʼan jiñi wocol miʼ cʼajtesʌbeñonla chaʼan «tiʼ pejtelel ora yom mi la cʌqʼuen wocolix i yʌlʌ Dios chaʼan jiñi bendición tac muʼ bʌ i yʌqʼueñonla i chaʼan yom mi laj coltan jiñi yomoʼ bʌ coltʌntel».

Judaísmo

Jiñi judíojob miʼ yʌlob chaʼan cheʼ mi la quilan wocol tiʼ cajʌch chuqui mi lac mel. An judíojob muʼ bʌ i yʌlob chaʼan mucʼʌch i cajel jiñi chaʼ (chʼojyel) tejchel i mi caj i melbentelob chuqui wem bʌ jiñi tsaʼ bʌ i toʼol ñusayob wocol. Pero i cʌntesa jiñi judaísmo místico o cabalístico jiñʌch chaʼan jiñi reencarnación,a baqui mach junsujtel jach miʼ yʌqʼuentel i tojʼesan i mul jiñi lac piʼʌl tsaʼ bʌ chʌmi.

Budismo

Jiñi budistajob miʼ yʌlob chaʼan mach junsujtel jach mi la quilan pañimil i jajayajl mi la cujtel bajcheʼ iliyi mi lac ñusan wocol, cʼʌlʌl jinto cheʼ miʼ mejlel lac ticʼ chuqui mi lac mulan, lac melbal o pejtelel muʼ bʌ i mejlel i ticʼlañonla. Chaʼan jiñi lac piʼʌl miʼ taj jiñi cʌmbil bʌ bajcheʼ Nirvana, yom bʌ i yʌl baqui maʼañix miʼ ñusan wocol, yomʌch miʼ taj i ñaʼtʌbal, miʼ mel chuqui wem bʌ yicʼot miʼ ticʼ i pensar.

Confucionismo

Cheʼ bajcheʼ miʼ yʌl jiñi Diccionario de religiones comparadas, jiñi muʼ bʌ i ñopob chuqui miʼ yʌl Confucio miʼ yʌlob chaʼan jiñi wocol tilemʌch «tiʼ caj chuqui mach bʌ weñic miʼ melob jiñi wiñicob xʼixicob (quixtañujob)». Yujilobʌch chaʼan jiñi wocol miʼ mejlel ti tsʼitaʼ jilel cheʼ bʌ miʼ pʌsob «wem bʌ i melbal». Pero miʼ yʌlob jaʼel chaʼan lʌcʼʌl tiʼ pejtelel jiñi wocol tac tilemʌch tiʼ caj jiñi pʼʌtʌloʼ bʌ espíritu. Jin chaʼan, jiñi quixtañujob cojach miʼ mejlel i ñopob chaʼan cheʼʌch wʌn ñaʼtʌbil chuqui mi caj i yujtel tiʼ tojlelob.

Ñopbalʌl tac chuqui jach bʌ miʼ chʼujutesañob

An ñopbalʌl tac muʼ bʌ i yʌl chaʼan jiñi wocol tac tilemʌch tiʼ caj chuqui miʼ melob jiñi xwujtob. An quixtañujob muʼ bʌ i ñopob chaʼan jiñi xwujtob añʌch chuqui miʼ mejlel i melob chaʼan wen chuqui miʼ yujtel tiʼ tojlel juntiquil quixtañu o chaʼan miʼ ñusan jumpʼejl wocol, i jiñi wocol muʼ bʌ i techob miʼ mejlel ti jisʌntel yicʼot costumbre tac ñʌmʌl bʌ ti melol. Jin chaʼan, cheʼ bʌ jiñi quixtañujob miʼ cʼamʼañob miʼ majlelob baqui an jiñi xtsʼʌcayajob chaʼan miʼ poj aqʼuentelob i tsʼʌcal jiñi ticʼlʌntel tsaʼ bʌ melbentiyob ti jiñi xwujtob.

Cristianismo

An yambʌ xñoptʼañob muʼ bʌ i yʌlob chaʼan jiñi wocol tilem ti jiñi mulil tsaʼ bʌ i yotsa jiñi ñaxañoʼ bʌ lac piʼʌlob, cheʼ bajcheʼ miʼ yʌl jiñi Génesis. Pero cabʌl ñopbalʌl tsaʼix i yotsayob chuqui miʼ bajñel ñaʼtañob. Jumpʼejl ejemplo, an católicojob muʼ bʌ i ñopob chaʼan miʼ mejlel i yʌqʼueñob Dios jiñi i wocolob chaʼan miʼ taj bendición jiñi iglesia o chaʼan miʼ coltʌntel yambʌ lac piʼʌl.