1. ¿I mul ba Dios cheʼ an lac wocol?

¿Chucoch ñuc i cʼʌjñibal cheʼ la cujil i jacʼbal?

Cabʌl wiñicob xʼixicob (quixtañujob) maʼañic miʼ jacʼbeñob i tʼan Dios come miʼ ñaʼtañob chaʼan jin an tiʼ mul jiñi lac wocol tac.

Ñaʼtancu iliyi

Cabʌl jiñi ñaxam bʌ miʼ yʌcʼob i bʌ ti ñopbalʌl an i yʌlʌyob tiʼ cʌntesa chaʼan jiñi wocol tilemʌch ti Dios. Jumpʼejl ejemplo, an muʼ bʌ i yʌlob chaʼan...

• cheʼ bʌ miʼ ñumel butʼjaʼ, yujquel lum o yan tac bʌ jiñʌch Dios tsiʼ choco tilel chaʼan mi lac toj lac mul.

• cheʼ bʌ miʼ chʌmel jiñi xbiʼtalob chaʼañʌch bej yomto Dios i yángelob ti panchan.

• Dios mucʼʌch i yotsan i bʌ jaʼel ti jiñi guerra tac.

Pero ¿ixcu mi jiñi ñaxam bʌ miʼ yʌcʼob i bʌ ti ñopbalʌl an i yʌlʌyob mach bʌ i sujmic tiʼ tojlel Dios? ¿Ixcu mi maʼañic miʼ mulan Dios jiñi woli bʌ i yʌjlel tiʼ tojlel?

Muʼ bʌ i yʌl jiñi Biblia

Mach tilemic ti Dios jiñi lac wocol

Cheʼ muqʼuic i yʌcʼ ti wocol jiñi wiñicob xʼixicob (quixtañujob) maʼañic miʼ taj i bʌ yicʼot jiñi i melbal tac. Jumpʼejl ejemplo, jiñi Biblia miʼ yʌl tiʼ tojlel Dios:

«Tojʌch pejtelel muʼ bʌ i mel. Xucʼulʌch, maʼanic i mul» (DEUTERONOMIO 32:4).

«Tiʼ pejtelel ora maʼanic miʼ wis chaʼlen mulil Dios. Jini Pʼʌtʌl bʌ Mach bʌ Anic i Pʼisol i Pʼʌtʌlel mach yujilic jontolil» (JOB 34:10).

«Jini Pʼʌtʌl bʌ Mach bʌ Anic i Pʼisol i Pʼʌtʌlel miʼ melonla ti toj» (JOB 34:12).

Dios miʼ tsʼaʼlen jiñi ñopbalʌl tac muʼ bʌ i yʌl tac lot tiʼ tojlel

Jumpʼejl ejemplo, miʼ tsʼaʼlen jiñi ñopbalʌl tac muʼ bʌ i yʌlob chaʼan jiñʌch Dios muʼ bʌ i yʌcʼonla ti wocol yicʼot jiñi muʼ bʌ i chaʼleñob coltaya ti jiñi guerra, jatsʼ yicʼot tsʌnsa.

«Jini xʼaltʼañob woliʼ lon cʼʌñob j cʼabaʼ [i chaʼan Dios] cheʼ miʼ chaʼleñob lot. Maʼanic tsac chocoyob ti subtʼan. Maʼanic tsac pejcayob. Lot jach chuqui woliʼ qʼuelob cheʼ bajcheʼ ti ñajal [...]. Chʼoyol jach tiʼ bajñel pusicʼal» (JEREMÍAS 14:14).

Jesús tsiʼ jamʌ alʌ tac i lot jiñi ñopbalʌl

«Mach tiʼ pejtelobic muʼ bʌ i pejcañoñob tiʼ yum mi caj i yochelob tiʼ yumʌntel jini am bʌ ti panchan. Jini jach muʼ bʌ i melob bajcheʼ yom c Tat ti panchan mi caj i yochelob. Ti jini qʼuin cabʌl mi caj i subeñoñob: ‹C Yum, c Yum, ¿mach ba anic tsac chaʼle lojon subtʼan ti a cʼabaʼ? Ti a cʼabaʼ tsac choco lojon loqʼuel xibajob. Ti a cʼabaʼ tsac chaʼle lojon cabʌl ñuc bʌ c melbal›. Cheʼ mi caj i yʌlob. Cheʼ jini mi caj c subeñob: ‹Mach j cʌñʌyeticla. Loqʼuenla tic tojlel jatetla muʼ bʌ laʼ chaʼlen jontolil›» (MATEO 7:21-23).