Ubin bajcheʼ yubil miʼ yubiñob i bʌ
Jiñi wocol
Mi cojach mi laj qʼuel chaʼan jiñi yambʌlob qʼuexelob bajcheʼ joñonla, maʼañic mi caj i mejlel laj qʼuel chaʼan añʌch chuqui wem bʌ tiʼ tojlelob. Miʼ mejlel i cʼotel lac ñaʼtan chaʼan jiñi qʼuexeloʼ bʌ bajcheʼ joñonla maʼañobic i cʼʌjñibal. Mi tsaʼ cʼoti lac ñaʼtan bajcheʼ iliyi, maʼañic mi caj la cubin bajcheʼ miʼ yubiñob i bʌ yambʌlob. Iliyi mi caj i pʌs chaʼan wolix (choncolix) lac tsʼaʼlen yambʌlob.
Principio am bʌ ti Biblia
«Yom tijicñayetla yicʼot jini tijicñayoʼ bʌ. Chaʼlenla uqʼuel yicʼot jini muʼ bʌ i chaʼleñob uqʼuel» (ROMANOS 12:15).
¿Chuqui yom i yʌl ili? Chaʼan yom mi la cubin muʼ bʌ i yubiñob yambʌlob.
¿Bajcheʼ miʼ coltañonla cheʼ la cujil ubintel bajcheʼ miʼ yubiñob i bʌ yambʌlob?
Miʼ coltañonla laj qʼuel chaʼan wen lajaloñʌchla yicʼot jiñi yambʌlob. Miʼ cʼotel laj cʌn chaʼan lajalʌch miʼ yubiñob i bʌ bajcheʼ joñonla yicʼot chuqui miʼ melob (chaʼleñob). Cheʼ bʌ mi la cubin bajcheʼ yubil miʼ yubiñob i bʌ yambʌlob miʼ coltañonla lac chʼʌmben i sujm chaʼan lac familia lac bʌ i mach yʌlʌyic majquiyonla. Cheʼ mucʼʌch lac chaʼlen wersa laj qʼuel chuqui tac lajalonla yicʼotob, ñumen wen chuqui mi caj lac ñaʼtan tiʼ tojlelob.
Cheʼ mi la cubin bajcheʼ yubil miʼ yubiñob i bʌ yambʌlob mi caj i coltañonla laj qʼuelob ti ñuc. Anne-Marie, chʼoyol bʌ ti Senegal, ti ñaxan tiʼ tsʼaʼle jiñi lac piʼʌlob muʼ bʌ i wen qʼuejlelob chaʼan maʼañobic i cʼʌjñibal. I miʼ yʌl bajcheʼ tsiʼ colta cheʼ bʌ tsiʼ yubi bajcheʼ miʼ yubiñob i bʌ yambʌlob: «Cheʼ bʌ tsaʼ j qʼuele chaʼan miʼ wen ñusañob wocol, tsaʼ caji c ñaʼtan bajcheʼ yubil mi caj cubin c bʌ cheʼ joñoñic wolic ñusan jiñi wocol. I tsaʼ caji j qʼuel chaʼan mach ñumen ñucoñic bajcheʼ jiñi yambʌlob i chaʼan maʼañic chuqui an c mele chaʼan ñumen ñuc yom mi cubin c bʌ tiʼ tojlelob». Mi mucʼʌch lac chaʼlen wersa lac chʼʌmben i sujm i wocolob jiñi wiñicob xʼixicob (quixtañujob), mi caj lac ñumen chʼʌmben i sujm yambʌlob i maʼañic mi caj la cʌlob.
¿Chuqui yom maʼ mel?
Mach cojic jach yom maʼ qʼuel bajcheʼ yʌñʌlob ti a tojlel jiñi mach bʌ a womic a qʼuelob, yom maʼ qʼuel chuqui tac lajal a wicʼotob. Jumpʼejl ejemplo, ¿bajcheʼ miʼ yubiñob i bʌ cheʼ miʼ melob ili tac?
Cheʼ bʌ mi la cubin muʼ bʌ i yubin yambʌlob miʼ coltañonla laj qʼuel chaʼan lac familia lac bʌ.
Cheʼ temel miʼ chaʼleñob uchʼel yicʼot i familia.
Cheʼ bʌ miʼ yujtelob ti eʼtel.
Cheʼ bʌ miʼ ñusañob qʼuin yicʼot i yamigojob.
Cheʼ bʌ miʼ ñʌchʼtañob jiñi cʼay muʼ bʌ i wen mulañob.
Wʌle ñopo a wubin bajcheʼ yubil miʼ yubiñob i bʌ. Cʼajtiben a bʌ:
¿Chuqui mi caj c mel mi an majqui miʼ subeñon chaʼan maʼañic j cʼʌjñibal?
¿Bajcheʼ mi caj cubin c bʌ cheʼ bʌ an majqui miʼ yʌlob mach bʌ weñic tic tojlel i mach i cʌñʌyobic?
¿Bajcheʼ com chaʼan mic melbentel cheʼ joñoñic jiñi mach bʌ yomic qʼuejlel?