Cʌntesʌntel 5

Wen wocol tsaʼ cajiyob ti chumtʌl

CHEʼ mach yaʼix añob yaʼ ti pʌcʼʌbʌl i cʼabaʼ Edén, Adán yicʼot Eva tsaʼ tejchiyob cabʌl i wocol. Tsaʼ cajiyob ti tsʌts bʌ eʼtel chaʼan mi tajob chuqui mi cʼux. Cheʼ mach jiñix tsaʼ caji ti colel jini teʼ i tʼojol jax bʌ muʼ bʌ yʌcʼ tac i wut, tsaʼ caji ti colel chʼixol, yicʼot wisinqʼuin tiʼ joytilel. Ili tsaʼ ujti cheʼ bʌ Adán yicʼot Eva tsiʼ ñusʌbeyob i tʼan Dios, i mach chʌn I yamigojobix.

Pero ñumen tsʌts bʌ chaʼan Adán yicʼot Eva jiñʌch cheʼ tsaʼ cajiyob ti chʌmel. Yom cʼajal a chaʼan: Dios tsiʼ subeyob chaʼan mi caj i chʌmelob mi tsiʼ cʼuxbeyob i wut jini juntejc teʼ. Weno, ti jini jach bʌ qʼuin cheʼ tsiʼ cʼuxuyob tsaʼ cajiyob ti chʌmel. ¡Wen tonto tsiʼ meleyob i bʌ chaʼan maʼanic tsiʼ jacʼbeyob i tʼan Dios!

Pejtelel i yalobilob jini Adán yicʼot Eva tsiʼ yilayob pañimil cheʼ bʌ Dios tsiʼ chocoyob loqʼuel yaʼ ti pʌcʼʌbʌl i cʼabaʼ Edén. Ili yom yʌl chaʼan jini i yalobilob wersa miʼ ñoxʼañob jaʼel yicʼot mi chʌmelob.

Tsaʼic i jacʼbeyob i tʼan Jioba jini Adán yicʼot Eva, tsaʼ mejliyob ti chumtʌl tiʼ tijicñʌyel i cheʼ jaʼel i yalobilob. Cheʼ jaʼel tsaʼ mejliyob ti chumtʌl tiʼ tijicñʌyel tiʼ pejtelel ora ila ti Pañimil. Maʼanic majqui miʼ ñoxʼan miʼ cʼamʼan yicʼot miʼ chʌmel.

Dios yom chaʼan jini winicob xʼixicob miʼ chumtʌlob tiʼ tijicñʌyel tiʼ pejtelel ora, yicʼot mi wʌn al chaʼan cheʼʌch miʼ cajel ti ujtel jumpʼejl bʌ qʼuin. Mach jinic jach jini Pañimil i tʼojol jax mi caj i yajñel, yicʼot jaʼel pejtelel jini winicob xʼixicob maʼanix mi caj i cʼamʼañob. Tiʼ pejtelelob laj i yamigojob i bʌ miʼ cajel yicʼotob Dios jaʼel.

Pero Eva mach i yamigajix Dios. Jini chaʼan, wocol tsaʼ caji i yʌcʼ ti pañimil i yalobil. Tsiʼ yila wocol. Cheʼʌchi, chaʼan tsiʼ ñusʌbe i tʼan Jioba tsaʼ tili cabʌl i wocol, ¿mach ba cheʼic maʼ qʼuel?

Adán yicʼot Eva tsaʼ tili yonlel chʼiton bʌ yicʼot xchʼocoʼ bʌ i yalobil. Cheʼ tsiʼ yila pañimil ñaxam bʌ i yalobilob, tsiʼ yotsʌbeyob i cʼabaʼ Caín. Jini i chaʼticlel i yalobilob i cʼabaʼ jiñʌch Abel. ¿Awujil ba chuqui tsiʼ chaʼleyob iliyobi?

Génesis 3:16-23; 4:1, 2; Apocalipsis 21:3, 4.