Cʌntesʌntel 20

Dina tsaʼ yajli ti wocol

¿MUʼ ba a qʼuel majqui woliʼ majlel i julaʼtan Dina? Woli i majlel i julaʼtan jini xchʼocob chumuloʼ bʌ tiʼ lumal Canaán. ¿Utsʼat ba tsiʼ yubi jini Jacob? Muʼ bʌ caj i coltañet a jacʼ iliyi cʼajtiya jiñʌch cheʼ maʼ poj cʼajtesan tsaʼ bʌ i ñaʼtayob Abraham yicʼot Isaac chaʼan jini xʼixicob ti Canaán.

¿Yom ba jini Abraham chaʼan jini i yalobil i cʼabaʼ Isaac miʼ pʌy jini xchʼoc chʼoyol bʌ yaʼ ti Canaán? Mach yomic. ¿Yomoʼ ba jini Isaac yicʼot Rebeca chaʼan jini i yalobil i cʼabaʼ Jacob miʼ pʌy juntiquil xcananea? Mach yomobic. ¿Awujil ba chucoch?

Come ili winicob xʼixicob ti Canaán miʼ chʼujutesañob diostac mach bʌ isujmic. Mach weñobic chaʼan miʼ pʌyob tiʼ ñoxiʼalob yicʼot tiʼ yijñamob, yicʼot mach wenic cheʼ mi sujtelob ti yamigojob i bʌ. Jini chaʼan melelʌch mi la cʌl chaʼan Jacob maʼanic tsiʼ mula chaʼan jini xchʼoc bʌ i yalobil mi piʼlen ti xʌmbal jini xcananeajob.

Dina tsaʼ yajli ti wocol, tsaʼʌch. ¿Muʼ ba a qʼuel ila ti dibujo jini cananeo woli bʌ i qʼuel jini Dina? I cʼabaʼ jiñʌch Siquem. Jumpʼejl bʌ qʼuin cheʼ bʌ Dina tsaʼ tili ti julaʼ, Siquem tsiʼ xiqʼui Dina chaʼan miʼ piʼlen. Iliyi jiñʌch mach bʌ wenic, come cojach jini winicob yicʼot xʼixicob ñujpuñemoʼ bʌ miʼ mejlelob i piʼleñob i bʌ. Ili mach bʌ utsʼatic tsiʼ melbe Dina jini Siquem tsaʼ to i ñumen otsa ti wocol.

Cheʼ bʌ tsiʼ i yubiyob i yeran jini Dina chuqui tsaʼ bʌ ujti, tsaʼ wen michʼayob. An chaʼtiquilob tsaʼ bʌ wen michʼayob, Simeón yicʼot Leví, i tsiʼ chʼʌmʌyob majlel i yespada, i mach yʌxʌlobic i yo tsaʼ ochiyob yaʼ ti tejclum. Iliyobi yicʼot i yerañob tsiʼ tsʌnsayob Siquem yicʼot pejtelel jini yañoʼ bʌ winicob. Ili mach bʌ wenic tsiʼ meleyob i yalobil Jacob tsiʼ wen michʼesayob i tat.

¿Bajcheʼ tsaʼ tejchi ili wocol? Chaʼañʌch jini Dina tsiʼ piʼle tiʼ xʌmbal winicob xʼixicob mach bʌ anic mi jacʼbeñob i mandar Dios. Joñonla maʼanic mi caj lac sajcan lac piʼʌl ti xʌmbal cheʼoʼ bʌ bajcheʼ jini, ¿ñomach?

Génesis 34:1-31.