Cʌntesʌntel 21

I yʌscuñolb José mi tsʼaʼleñob

¡Q’UELE cu ili chʼiton chʼijiyem i yujil chaʼan maʼanic majqui miʼ mejlel i coltan! Jiñʌch José. Jini i yʌscuñob tsaʼ jaxto ujti i chombeñob ili winicob woli bʌ i majlelob yaʼ ti Egipto. Yaʼi mi caj i yotsañob ti moso jini José. ¿Chucoch cheʼ tsiʼ meleyob jini i majan yʌscuñob bajcheʼ jini? Chucoch tsiʼ tsʼaʼleyob jini José.

Jini i tatob i cʼabaʼ, Jacob, miʼ wen cʼuxbin jini José. Tsiʼ pʌsbe i yutslel i pusicʼal cheʼ tsiʼ melbe utsʼatax bʌ pʌl bʌ i bujc. Cheʼ bʌ tsiʼ qʼueleyob jini lujuntiquil i yʌscuñob chaʼan miʼ wen cʼuxbin Jacob jini José, tsaʼ cajiyob ti tsʌytsʌñiyel i pusicʼal yicʼot tsaʼ caji i tsʼaʼleñob jini José. Pero an yambʌ chucoch mi tsʼaʼleñob jini José.

José tsiʼ chaʼle chaʼyajl ñajal. Tiʼ chaʼpʼejlel i ñajal jini José tsiʼ qʼuele chaʼan jini i yʌscuñob woli i lijchocoñob i bʌ tiʼ tojlel. Jini yʌscuñob José ñumento tsaʼ caji i tsʼaʼleñob cheʼ tsiʼ yʌlʌ chuqui tsiʼ ñajle.

Jumpʼejl bʌ qʼuin, cheʼ bʌ jini i yʌscuñob José woli i cʌntañob i tiñʌmeʼ i tat, Jacob tsiʼ sube José chaʼan miʼ majlel i qʼuel bajcheʼ añob jini i yʌscuñob. Cheʼ bʌ jini i yʌscuñob José tsiʼ qʼueleyob cheʼ ñajt to i tilel, lamital tsaʼ caji i yʌlob: ‹¡Laʼ lac tsʌnsan!› Pero jini ñumen ascuñʌl bʌ, Rubén, tsiʼ yʌlʌ: ‹¡Maʼanic, mach yomic mi lac tsʌnsan!› Cheʼ maʼanic tsiʼ meleyob jini, tsiʼ chocoyob ochel José ti tiquin bʌ pozo. Cheʼ jini tsaʼ buchleyob chaʼan mi ñaʼtañob chuqui mi caj i tumbeñob jini José i yijtsʼiñob.

Cheʼ jini tsiʼ qʼueleyob yaʼ tilelob jini ismaelob. Judá tsiʼ subeyob jini i majan yerañob: ‹Laʼ lac chombeñob jini ismaelob›. Cheʼʌch tsiʼ meleyob. ¡Tsiʼ choñoyob José ti juncʼal plata taqʼuin! ¡Wen jontolob yicʼot maʼañobic i yutslel i pusicʼalob!

¿Chuqui mi caj i subeñob i tat jini i yʌscuñob José? Tsiʼ tsʌnsayob juncojt chivo i tsiʼ wen tsʼajayob tiʼ chʼichʼel chivo jini utsʼatax bʌ i bujc José. Cheʼ jini tsiʼ chʼʌmbeyob majlel jini i bujc José baʼan i tatob i cʼabaʼ Jacob i tsiʼ subeyob: ‹Tsaʼ c taja lojon ili. Qʼuele cu, mi mach i bujquic José›.

Jacob tsiʼ qʼuele chaʼan jiñʌchi. ‹Melelʌch juncojt jontol bʌ bʌteʼel tsiʼ tsʌnsa José›, cheʼen. Jiñʌch yomoʼ bʌ i yʌscuñob José chaʼan cheʼ mi ñaʼtan jini i tatob. Jacob tsiʼ wen taja i chʼijiyemlel. Cabʌl qʼuin tsiʼ yucʼta. Pero José maʼanic chʌmen. Laʼ laj qʼuel chuqui tsiʼ chaʼle yaʼ baqui tsiʼ pʌyʌyob majlel.

Génesis 37:1-35.