Cʌntesʌntel 25
I familia José tsaʼ majliyob ti chumtʌl ti Egipto
JOSÉ maʼanix tsaʼ mejli i chʌn ticʼ i bʌ. Tsiʼ sube tiʼ pejtelel i winicob chaʼan miʼ laj loqʼuelob yaʼ ti tsalʌl. Cheʼ i bajñel jax yicʼotob i yʌscuñob, José tsaʼ caji ti uqʼuel. Miʼ mejlel lac ñaʼtan bajcheʼ tsaʼ toj sajtiyob i pusicʼal jini i yʌscuñob, come mach yujilobic chucoch woli ti uqʼuel. Ti wiʼil, tsaʼ yʌlʌ: ‹Joñon José. ¿Cuxul to ba c tat?›
Jini i yʌscuñob tsaʼ toj sajtiyob i pusicʼal, maʼanic tsaʼ mejliyob i jacʼob. Woliyob tiʼ bʌqʼuen. Pero José tsaʼ yʌlʌ: ‹Laʼ wocolic laʼla, ñochtañonla›. Tsaʼ caji i ñochtañob majlel, tsiʼ subeyob: ‹Joñon José laʼ wijtsʼiñon, tsaʼ bʌ laʼ choñoyon chaʼan miʼ pʌyoñob majlel yaʼ ti Egipto›.
José tsaʼ caji i chʌn subeñob ti uts bʌ tʼan: ‹Mach yomic mi laʼ mel laʼ pusicʼal chaʼan tsaʼ laʼ choñoyon wʌʼi. Tiʼ sujmlel jiñʌch Dios tsaʼ bʌ i chocoyon tilel ila ti Egipto chaʼan mij coltan winicob xʼixicob chaʼan maʼanic miʼ chʌmelob ti wiʼñal. Faraón tsiʼ waʼchocoyon chaʼan mic chaʼlen yumʌntel ti pejtelel ili tejclum. Jini chaʼan sujtenla ti ora baʼan c tat yicʼot subenla iliyi. I subenla chaʼan miʼ tilel ti chumtʌl wʌʼi›.
Cheʼ jini José tsiʼ tul meqʼue pejtelel jini i yʌscuñob, yicʼot tsiʼ tsʼujtsʼu ti pejtelelob. Cheʼ bʌ tsaʼ yubi Faraón chaʼan jini i yʌscuñob José julemobix, tsiʼ sube José: ‹La i chʼʌmob majlel carreta tac yicʼot la i pʌyob tilel i tat yicʼot i piʼʌlob i laʼ chaʼ sujticob tilel. Mi caj cʌqʼueñob jini ñumen wem bʌ lum ti Egipto›.
Cheʼʌch tsiʼ meleyob. Ila ti dibujo miʼ mejlel a qʼuel chaʼan José woli i mecʼ i tat cheʼ tsaʼ tili ti Egipto yicʼot pejtelel i familia.
Jini i familia Jacob tsaʼix wen pʼojliyob. Tiʼ pejtelelob jini Jacob yicʼot i yalobilob yicʼot i buts añobix lujuntiquil i chʌncʼal (70), cheʼ bʌ tsaʼ majliyob ti chumtʌl yaʼ ti Egipto. Pero yaʼan jaʼel i yijñamob, yicʼot tajol cabʌl i winicob. Tiʼ pejtelelob yaʼ tsaʼ cajiyob ti chumtʌl yaʼ ti Egipto. Tsaʼ pejcʌntiyob ti israelob, come Dios tsiʼ qʼuextʌbe i cʼabaʼ Jacob ti Israel. Tsaʼ sujtiyob tiʼ cojach bʌ i tejclum Dios, cheʼ bajcheʼ mi caj laj cʌn tiʼ wiʼil.
Génesis 45:1-28; 46:1-27.