Cʌntesʌntel 23

I ñajal tac Faraón

TSAʼ ñumi chaʼpʼejl jab, i yaʼto an José ti mʌjquibʌl. Jini xñusa vino maxto anic cʼajal i chaʼan. Cheʼ jini Faraón tsiʼ chaʼle chaʼyajl cojach bʌ ñajal ti jumpʼejl acʼʌlel, i tsiʼ cʼajtibe i bʌ chuqui i sujmlel i ñajal. ¿Muʼ ba a qʼuel yaʼ baqui wʌyʌl? Ti yijcʼʌlal cheʼ ti sʌcʼan jini Faraón tsiʼ choco ti pʌyol jini añoʼ bʌ cabʌl i ñaʼtʌbal chaʼan miʼ subeñob chuqui tsiʼ ñajle. Pero maʼanic tsaʼ mejli i subeñob chuqui i sujmlel tac jini i ñajal.

Wʌle jini xñusa vino tsaʼ cʼun cʼajtiyi i chaʼan José. Tsiʼ sube jini Faraón: ‹Cheʼ bʌ yaʼ añon ti mʌjquibʌl yaʼan juntiquil winic muʼ bʌ i mejlel i tsictesʌben i sujmlel tac jini ñajal›. Faraón tsiʼ locʼsa ti ora jini José yaʼ ti mʌjquibʌl.

Faraón tsiʼ sube José jini i ñajal tac: ‹Tsaʼ j qʼuele wuccojt wacax jujpʼem tac bʌ, i wen i tʼojol jax. Ti wiʼil tsaʼ j qʼuele yambʌ wuccojt wacax wen yajyaj jax bʌ. Jini yajyaj jax bʌ wacax tsiʼ cʼuxuyob jini jujpʼem tac bʌ wacax.

‹Tiʼ chaʼyajlel c ñajal tsaj qʼuele wuctsʼijt i cuch trigo ti juntejc jach i teʼel tsaʼ coli wen tʼuñul bʌ i wut yicʼot utsʼatax bʌ. Cheʼ jini tsaʼ j qʼuele yambʌ wuctsʼijt i cuch trigo yajyaj bʌ yicʼot tiquin bʌ. Jini yajyaj bʌ i cuch tsaʼ caji i jisan jini wuctsʼijt wen tac bʌ.›

José tsaʼ i sube Faraón: ‹Junchajp jach i sujmlel a ñajal. Jini wuccojt jujpʼem bʌ wacax yicʼot jini wuctsʼijt wem bʌ i cuch trigo jiñʌch wucpʼejl jab, yicʼot jini wuccojt yajyaj bʌ wacax yicʼot jini wuctsʼijt yajyaj bʌ i cuch trigo jiñʌch yambʌ wucpʼejl jab. Tal wucpʼejl jab cheʼ mi caj i yʌcʼ cabʌl i wut pʌcʼʌbʌl ti pejtelel i lumal Egipto. Ti wiʼil tal wucpʼejl jab cheʼ maʼanic mi caj i wen colel i wut pʌcʼʌbʌl›.

Jini chaʼan, José tsaʼ i sube Faraón: ‹Sajcan juntiquil winic am bʌ i ñaʼtʌbal yicʼot aqʼuen tiʼ wenta chaʼan mi tempan bʌlñʌcʼʌl cheʼ cabʌl i wut pʌcʼʌbʌl wucpʼejl jab. Cheʼ jini, jini winicob xʼixicob maʼanic mi caj i chʌmelob ti wiʼñal ti wucpʼejl jab cheʼ maʼanic cabʌl i wut pʌcʼʌbʌl›.

Faraón utsʼat tsiʼ yubi. Tsiʼ yajca José chaʼan mi tempan jini bʌlñʌcʼʌl, yicʼot chaʼan miʼ lot. Jini i chaʼticlel winic ñuc bʌ bajcheʼ Faraón yaʼ ti Egipto, jiñʌch José.

Waxʌcpʼejl jab i ñumel cheʼ jini, cheʼ ti i yorajlel wiʼñal, José tsiʼ qʼuele yaʼ tilel winicob. ¿Awujil ba majquiyob? ¡Jiñobʌch lujuntiquil bʌ i yʌscuñob! Jacob jini i tatob tsiʼ chocoyob majlel yaʼ ti Egipto come wolix ti sʌjlel i bʌl i ñʌcʼob yaʼ tiʼ lumal Canaán. José tsiʼ cʌñʌ jini i yʌscuñob, pero jini i yʌscuñob maʼanic tsiʼ cʌñʌyob. ¿Awujil ba chucoch? Come ñumen anix i jabilel jini José, yicʼot qʼuexel i pislel lʌpbil bʌ i chaʼan.

José cʼajal i chaʼan cheʼ bʌ alob to tsiʼ chaʼle ñajal baqui tsaʼ tiliyob i lijchocoñob i bʌ i yʌscuñob tiʼ tojlel. ¿Cʼajal ba a chaʼan cheʼ bʌ tsaʼ pejca jini? Jini chaʼan José mi qʼuel chaʼan jiñʌch Dios tsiʼ choco majlel yaʼ ti Egipto, yicʼot mach toʼolic jach. ¿Chuqui tsiʼ mele José maʼ wʌl? Laʼ laj qʼuel.

Génesis 41:1-57; 42:1-8; 50:20.