Cʌntesʌntel 45
Miʼ cʼaxelob ti jini Jordán jaʼ
¡Q’UELE cu! ¡Jini israelob woliʼ cʼaxelob yaʼ ti Jordán jaʼ! Pero ¿baqui an jini jaʼ? Come ti jim bʌ ora miʼ wen yajlel jaʼal, cheʼ mach jalix mi caj i cʼotelob jini israelob yaʼi wen butʼul jini colem jaʼ. ¡Pero wʌle jini jaʼ tsaʼix sajpʼij! ¡Jini israelob woliʼ cʼaxelob ti tiquin bʌ lum cheʼ bajcheʼ tsaʼ cʼaxiyob ti Chʌchʌc bʌ ñajb! ¿Baqui tsaʼ laj majli jini jaʼ? Laʼ laj qʼuel.
Cheʼ bʌ tsaʼ cʼoti i yorajlel chaʼan miʼ cʼaxelob yaʼ ti Jordán jaʼ jini israelob, jiñʌch tsaʼ bʌ i yʌlʌ Jioba iliyi chaʼan Josué mi suben jini tejclum: ‹Jini motomajob yom miʼ qʼuechob jini arca chaʼan bʌ trato yicʼot ñaxan yom miʼ majlelob ti lac tojlel. Cheʼ mi yotsañob i yoc yaʼ ti Jordán jaʼ, jini jaʼ miʼ cʌy xʌmbal›.
Jini chaʼan, jini motomajob miʼ qʼuechob jini arca chaʼan bʌ trato yicʼot ñaxan miʼ majlelob yicʼotob tiʼ tojel jini winicob xʼixicob. Cheʼ miʼ cʼotelob yaʼ ti Jordán jaʼ, jini motomajob mi yochelob yaʼ ti jaʼ. Jini colem jaʼ pʼʌtʌl woli ti xʌmbal yicʼot wen tam i yebal. ¡Pero ti jim bʌ ora cheʼ miʼ tsʼajcuyelob i yoc yaʼ ti jaʼ, jini jaʼ miʼ cʌy xʌmbal! ¡Jiñʌch jumpʼejl milagro! Jini colem jaʼ am bʌ ti chan, Jioba tsaʼix i mʌcta chaʼan maʼanic miʼ chaʼlen xʌmbal jini jaʼ. ¡Jini colem jaʼ miʼ tiquin!
Jini motomajob woli bʌ i qʼuechob majlel jini arca chaʼan bʌ trato, miʼ cʼaxelob majlel yaʼ ti tiquin bʌ lum tiʼ yojlil jini colem jaʼ. ¿Muʼ ba a taj a qʼuelob yaʼ ti dibujo? ¡Cheʼ yaʼ waʼalob jini motomajob tiʼ yojlil, pejtel jini israelob miʼ laj cʼaxelob yaʼ ti Jordán jaʼ cheʼ bajcheʼ ti tiquin bʌ lum!
Cheʼ bʌ tsaʼix laj cʼaxiyob, Jioba tsiʼ sube Josué chaʼan miʼ suben lajchʌntiquil winicob chʼejloʼ bʌ: ‹Cucula ti ojlil Jordán jaʼ baʼan jini motomajob yicʼot jini arca chaʼan bʌ trato. Chʼʌmʌla lajchʌmpʼejl xajlel yicʼot juʼsanla cʌytʌl yaʼ baʼ mi laʼ jijlel laʼ ñusan acʼʌlel. Chaʼan cheʼ jini, mi caj laʼ suben laʼ walobilob cheʼ miʼ cʼajtiñob chucoch jini xajlel, yom mi laʼ suben chaʼan jini jaʼ tsiʼ cʌyʌ xʌmbal cheʼ bʌ jini arca chaʼan bʌ trato tsaʼ cʼaxi yaʼ ti Jordán jaʼ. ¡Jini xajlel tac mi caj i cʼajtesʌbeñob ili milagro!› Josué tsiʼ loto jaʼel lajchʌmpʼejl xajlel yaʼ baqui tsaʼ waʼleyob jini motomajob ti ojlil jini colem jaʼ.
Cheʼ jini, Josué tsiʼ subeyob jini motomajob qʼuechel bʌ i chaʼañob jini arca chaʼan bʌ trato: ‹Loqʼuenla yaʼ ti Jordán jaʼ›. Cheʼ bʌ tsaʼ cʼotiyob baʼ tiquin bʌ lum, ti ora tsaʼ chaʼ caji ti bujtʼel jini colem jaʼ.
Josué 3:1-17; 4:1-18.