Cʌntesʌntel 61
David tsaʼ ochi ti rey
SAÚL tsiʼ chaʼ ñopo i chuc David. Tsiʼ pʌyʌ majlel uxpʼejl mil i soldadojob wen yujiloʼ bʌ guerra chaʼan miʼ sʌclañob David. Cheʼ bʌ tsiʼ ñaʼta David iliyi, tsiʼ choco majlel xqʼuelojelob chaʼan miʼ ñaʼtan baqui tsaʼ jijli Saúl ti jini acʼʌlel. Cheʼ jini, David tsiʼ cʼajtibe jini chaʼtiquil i winicob: ‹¿Majqui yom majlel quicʼot yaʼ baqui jijlem Saúl?›.
‹Joñon mic majlel›, cheʼen Abisai. Abisai jiñʌch i yalobil Seruya, i yijtiʼan David. Cheʼ bʌ jini Saúl wʌyʌl to, i cheʼ jaʼel i winicob, tsaʼ mucul ochiyob David yicʼot Abisai yaʼ baqui jijlemob. Tsiʼ chʼʌmbeyob majlel i lanza yicʼot i buxil i yaʼal Saúl am bʌ tiʼ tʼejl i jol. Maʼanic majqui tsiʼ qʼueleyob mi anic majqui tsiʼ yubiyob come laj wʌyʌlob.
Qʼuele wʌle, David yicʼot Abisai. Tsaʼ putsʼiyob, i tsaʼ letsiyob tiʼ pam wits. David tsiʼ pejca ti cʼam bʌ tʼan jini i yum bʌ soldadojob chaʼan Israel: ‹Abner, ¿chucoch maʼanic tsaʼ wen cʌnta a yum, jini rey? ¡Qʼuele cu! ¿Baqui an i lanza yicʼot i buxil i yaʼal?›.
Saúl tsaʼ cajñi i wut. Tsiʼ cʌmbe i tʼan David, i tsiʼ cʼajtibe: ‹¿Jatet ba, David?›. ¿Muʼ baʼ taj a qʼuel Saúl yicʼot Abner yaʼ ti entʌl?
‹Joñon cu, c yum c reyet bʌ›, cheʼen David. David tsiʼ cʼajtibe, Saúl: ‹¿Chucoch a wom a chucon? ¿Chuqui jontol tsac melbeyet? Um baʼan a lanza, reyet bʌ. Laʼ tilic juntiquil chaʼan miʼ chʼʌmbeñet majlel›.
Saúl tsiʼ yʌlʌ: ‹Tsaʼix c chaʼle mulil. Tonto jax chuqui tsac mele›. Cheʼ tsaʼix majli David, Saúl tsaʼ sujti tiʼ yotot. Pero David tsaʼ caji i yʌl tiʼ pusicʼal: ‹Tajol ti jumpʼejl bʌ qʼuin, Saúl miʼ caj i tsʌnsañon. Yom mic majlel ti putsʼel baqui an i tejclum filisteojob›. Cheʼʌch tsiʼ mele. David tsaʼ mejli i lotin jini filisteojob, i tsiʼ yʌqʼue i ñaʼtañob chaʼan i yamigojobix i bʌ wʌle.
Cheʼ bʌ tsaʼ ñumi cabʌl qʼuin, jini filisteojob tsaʼ majli i contrajiñob Israel. Saúl yicʼot Jonatán tsaʼ chʌmiyob ti jini guerra. David tsiʼ wen taja i chʼijiyemlel, jin chaʼan tiʼ tsʼijbu jini wen utsʼatax bʌ cʼay, baqui tsiʼ cʼʌyi: ‹Wen chʼijiyem jax c pusicʼal, cʼuxbibil bʌ quermaño, Jonatán. ¡Tsac wen cʼuxbiyet!›.
Cheʼ bʌ tsaʼ ujti i yʌl David iliyi tsaʼix chaʼ majli ti Israel, yaʼ ti tejclum i cʼabaʼ Hebrón. Yaʼi woliyob ti guerra jini winicob muʼ bʌ i yajcañob Isboset, i yalobil Saúl chaʼan mi yochel ti rey, yicʼot jini yambʌ winicob yomoʼ bʌ chaʼan David mi yochel ti rey. Pero tsaʼ mʌjliyob i chaʼan i winicob David. Anix lujumpʼejl i chaʼcʼal (30) i jabilel David cheʼ tsaʼ ochi ti rey. Wucpʼejl jab yicʼot ojlil tsiʼ chaʼle yumʌntel ti Hebrón. Lamital i yalobilob David tsaʼ bʌ i yilayob pañimil yaʼi, jiñobʌch Amnón, Absalón yicʼot Adonías.
Ti wiʼil, David yicʼot i winicob tsaʼ majli i chʼʌmob jini utsʼatax bʌ tejclum i cʼabaʼ Jerusalén. Seruya i yijtiʼan bʌ David an yambʌ yalobil i cʼabaʼ Joab, jiñʌch tsaʼ bʌ i chʼʌmʌ tiʼ wenta jini guerra. Jin chaʼan David tsiʼ waʼchoco tiʼ yum soldadojob. Wʌle tsaʼ caji i chaʼlen yumʌntel David yaʼ tiʼ tejclum Jerusalén.
1 Samuel 26:1-25; 27:1-7; 31:1-6; 2 Samuel 1:26; 3:1-21; 5:1-10; 1 Crónicas 11:1-9.