Cʌntesʌntel 73
Cojix bʌ rey mach bʌ jontolic yaʼ ti Israel
JOSÍAS an jaxto i chaʼan waxʌcpʼejl jab cheʼ tsaʼ ochi bajcheʼ rey yaʼ ti chaʼmojt winicob xʼixicob ti sur, yaʼ ti Israel. Maxto cabʌlic i jabilel chaʼan miʼ yochel bajcheʼ rey. Jin chaʼan, cheʼ ti ñaxan jini winicob anix bʌ i jabilelob tsiʼ coltayob chaʼan miʼ chaʼlen yumʌntel ti wen yaʼ ti tejclum.
Cheʼ bʌ Josías anix wucpʼejl jab i cajel ti rey, tsaʼ caji i sajcan Jioba. Tsaʼ caji i lajin majlel jini mach bʌ jontolobic rey cheʼ bajcheʼ David, Josafat yicʼot Ezequías. Anquese chʼiton winic jaxto, an chuqui tsiʼ mele baqui tsiʼ pʌsʌ i chʼejlel.
Yonlel israelob tsiʼ wen meleyob jontolil ti cabʌl jabil. Tsiʼ chʼujutesayob dios tac mach bʌ isujmic. Miʼ ñoctʌlob tiʼ tojlel diosteʼ tac. Jin chaʼan, Josías yicʼot i winicob, tsaʼ caji i jisañob jini chʼujutesaya mach bʌ isujmic yaʼ ti tejclum. Ñuc bʌ eʼtel iliyi, come yonlel winicob xʼixicob miʼ chʼujutesañob dios tac mach bʌ isujmic. Ila ti dibujo miʼ mejlel a qʼuel Josías yicʼot i winicob, woliʼ topʼob jini diosteʼ tac.
Ti wiʼil, Josías tsiʼ waʼchoco uxtiquil winicob, chaʼan miʼ tojʼesʌbeñob i templo Jioba. Tsaʼ tempʌnti taqʼuin yaʼ ti tejclum chaʼan miʼ yʌqʼuentelob ili winicob chaʼan i tojolob ti yeʼtel. Cheʼ woliyoʼ to ti eʼtel yaʼ ti templo jini ñuc bʌ motomaj i cʼabaʼ Hilcías, an chuqui tsiʼ taja wen an bʌ i cʼʌjñibal: jiñʌch libro i chaʼan jini mandar tsaʼ bʌ subenti wajali Moisés ti Jioba chaʼan miʼ tsʼijbun, pero cabʌl jabil tsaʼ cʌn sajti ili libro.
Cheʼ bʌ tsaʼ chʼʌmbenti majlel Josías jini libro, tsiʼ yʌlʌ chaʼan miʼ pejcʌbentel. Cheʼ bʌ tsaʼ yubi jini tsaʼ bʌ pejcʌbenti, Josías tsaʼ cʼoti i ñaʼtan chaʼan jini tejclum, maʼanic woliʼ lotbeñob i mandar Jioba. Tsiʼ taja i chʼijiyemlel, jin chaʼan tiʼ tsili i pislel, cheʼ bajcheʼ maʼ qʼuel yaʼ ti dibujo. Josías tsiʼ yʌlʌ: ‹Jioba woliʼ wen michʼleñonla, come lac ñojteʼelob maʼanic tsiʼ jacʼʌyob jini mandar tac tsʼijbubil bʌ ti ili libro›.
Josías tsiʼ sube jini ñuc bʌ motomaj i cʼabaʼ Hilcías, chaʼan miʼ majlel i yubin chuqui mi caj i melbentel ti Jioba jini tejclum. Hilcías tsaʼ majli i qʼuel jini xʼaltʼan bʌ xʼixic i cʼabaʼ Hulda, i tsiʼ cʼajtibe jini. Tsiʼ sube ili tʼan tilem bʌ ti Jioba, chaʼan miʼ majlel i suben Josías: ‹Jerusalén yicʼot tiʼ pejtelel xtejclumob mi caj yʌqʼuentelob cabʌl wocol come tsiʼ chʼujutesayob dios tac mach bʌ isujmic, jini Pañimil tsaʼ bujtʼi ti jontolil. Come jatet, Josías, tsaʼ mele chuqui wen bʌ, ili wocol maʼanic caj i tilel cheʼ cuxulet to›.
2 Crónicas 34:1-28.