Josías wen tsiʼ yajca yamigojob

¿Cʼun ba ti melol maʼ wʌl chuqui yom Jehová?... Cabʌl miʼ ñaʼtañob chaʼan wen wocolʌch. Pero jiñi Biblia miʼ pʌs chaʼan mach cheʼiqui. Miʼ subeñonla chaʼan Josías, juntiquil chʼiton tsaʼ bʌ i chaʼle wersa i melben i yeʼtel (troñel) Jehová. Tsaʼ bʌ i colta jiñʌch cheʼ wen tsiʼ yajca yamigojob. Laʼ lac ñumen cʌn chaʼan Josías yicʼot jiñi wem bʌ yamigojob tiʼ taja.

I papá Josías jiñʌch Amón rey bʌ ti Judá. Wen jontol yicʼot tiʼ chʼujutesa dios tac mach bʌ isujmic. Cheʼ bʌ Amón tsaʼ chʌmi, Josías tsaʼ sujti ti rey chaʼan Judá. ¿A wujil ba jaypʼejl i jabilel Josías cheʼ bʌ tiʼ waʼchocoyob ti rey? ¡An jaxto 8 i jabilel! ¿Jontol ba cheʼ bajcheʼ i papá?... Maʼañic.

Cheʼ bʌ alʌ chʼiton to Josías, yom i melben i yeʼtel Jehová. Jin chaʼan tiʼ sʌcla wem bʌ yamigojob. Tsiʼ yajca muʼ bʌ i cʼuxbiñob Dios i jiñobʌch tsaʼ bʌ i colta chaʼan miʼ jacʼben i tʼan Jehová. ¿Majqui yamigojob Josías?

Juntiquil jiñʌch jiñi xʼaltʼan Sofonías. Sofonías tiʼ sube jiñi wiñicob xʼixicob (quixtañujob) yaʼ ti Judá: «Mi maʼañic mi laʼ cʌy laʼ chʼujutesan dios tac mach bʌ isujmic, mi caj laʼ taj wocol». ¿Chuqui tiʼ mele Josías? ¿Tsaʼ ba i jacʼʌ jiñi tʼan? Tsaʼʌch. Jin chaʼan, tiʼ pejtelel ora tiʼ chʼujutesa Jehová i mach jiñic jiñi dios tac mach bʌ isujmic.

Jeremías jiñʌch yambʌ yamigo Josías. Lʌcʼʌ lajalob i jabilel yicʼot wen lʌcʼʌl chumulob cheʼ bʌ chʼitoñob to. Jeremías yicʼot Josías tsiʼ coltayob i bʌ tiʼ melol i yeʼtel Jehová. Come wen yamigojob i bʌ, cheʼ bʌ Josías tsaʼ chʌmi, Jeremías tsiʼ mele jumpʼejl cʼay baʼ ti yʌlʌ chaʼan wen chʼijiyem ti yubi i bʌ.

¿Mach ba melel chaʼan cabʌl chuqui miʼ mejlel laj cʌn tiʼ tojlel Josías?... Cheʼ bʌ alʌ chʼiton to tiʼ mulaj i jacʼben i tʼan Dios. Pero chaʼan miʼ mejlel i mel, tsiʼ yajca tiʼ yamigo muʼ bʌ i cʼuxbiñob Jehová. Jatet a wom a melben i yeʼtel Jehová jaʼel, ¿ñomach? Jin chaʼan, wen i cʼʌjñibal cheʼ maʼ sʌclan ti a wamigo muʼ bʌ i cʼuxbiñob Jehová.