Cʌntesʌntel 80
Israel tsaʼ loqʼui yaʼ ti Babilonia
LɅCʼɅ chaʼpʼejlix jab tsaʼ ñumi cheʼ tsaʼ chʼʌjmi Babilonia ti medojob yicʼot ti persiajob. ¡Qʼuele jini woli bʌ ti ujtel wʌle! Isujmʌch, jini israelob woliyob ti loqʼuel ti Babilonia. ¿Bajcheʼ tsaʼ mejliyob ti loqʼuel? ¿Majqui tsiʼ yʌcʼʌyob ti loqʼuel?
Ciro, jiñʌch rey bʌ ti Persia. Cheʼ jalto mi caj i yilan pañimil jini Ciro, Jioba tsiʼ sube jini xʼaltʼan i chaʼan i cʼabaʼ Isaías, chaʼan miʼ tsʼijban ili tʼan tiʼ tojlel: ‹Mi caj a mel, com bʌ chaʼan maʼ mel. Jini puerta tac jamʌl mi caj a cʌybentel chaʼan maʼ chʼʌm jini tejclum›. Ciro jiñʌch tsaʼ bʌ i yʌcʼʌ i bʌ ti ñaxan, cheʼ tsaʼ chʼʌjmi Babilonia. Jini medojob yicʼot persiajob tsaʼ ochiyob ti acʼʌlel yaʼ ti tejclum, come jamʌl tsaʼ cʌle jini puerta tac.
Pero jini Isaías, xʼaltʼan i chaʼan Jioba, tsiʼ yʌlʌ tiʼ tojlel Ciro chaʼan jiñʌch muʼ bʌ caj i chaʼ tojʼesan Jerusalén yicʼot cheʼ mi chaʼ mejlel jini templo. ¿Jimba Ciro tsiʼ yʌcʼʌ ili mandar? Jincuyi. Jiñʌch tsaʼ bʌ i subeyob jini israelob iliyi: ‹Cucula ti Jerusalén, chaʼ melbenla i templo laʼ Dios Jioba›. Iliyi jiñʌch muʼ bʌ caj i melob jini israelob.
Pero mach tiʼ pejtelelobic jini israelob yaʼ bʌ añob ti Babilonia tsaʼ mejliyob ti ñajt bʌ xʌmbal chaʼan miʼ majlelob yaʼ ti Jerusalén. An israelob wen ñoxobix bʌ yicʼot cʼamoʼ bʌ, jini chaʼan maʼanix miʼ mejlelob ti ñajt bʌ xʌmbal, come i ñajtlel jiñʌch 800 kilómetros. Mach cojicach jini. Pero jini mach bʌ anic tsaʼ majliyob, Ciro tsiʼ subeyob: ‹Aqʼueñob plata yicʼot oro yicʼot yan tac bʌ majtañʌl jini muʼ bʌ caj i chaʼ majlelob, chaʼan miʼ chaʼ melob jini Jerusalén yicʼot jini templo›.
Jin chaʼan, jini israelob tsaʼ bʌ chaʼ sujtiyob majlel ti Jerusalén, tsaʼ aqʼuentiyob cabʌl majtañʌl. Cheʼ jaʼel, Ciro tsiʼ chaʼ sutqʼuibeyob majlel jini colem taza tac yicʼot vaso tac tsaʼ bʌ i chʼʌmʌ jini rey Nabucodonosor yaʼ tiʼ templo Jioba, cheʼ bʌ tsiʼ jisa Jerusalén. Cabʌl chubʌʼañʌl woliʼ chʼʌmob majlel jini tsaʼ bʌ chaʼ sujtiyob majlel yaʼ ti Jerusalén.
Cheʼ bʌ anix chʌmpʼejl uw i cajelob ti xʌmbal jini israelob, pʼis i yorajlel tsaʼ cʼotiyob ti Jerusalén. Ti jimbʌ ora tsaʼ tsʼʌctiyi lujumpʼejl i chaʼcʼal (70) jab, cheʼ bʌ tsaʼ jisʌnti jini tejclum yicʼot cheʼ bʌ maʼanix xchumtʌl tsaʼ cʌle. Anquese tsaʼʌch chaʼ sujtiyob majlel jini israelob tiʼ tejclumob, tsiʼ yilayob cabʌl wocol, cheʼ bajcheʼ mi caj laj qʼuel.
Isaías 44:28; 45:1-4; Esdras 1:1-11.