Cʌntesʌntel 81
Tsiʼ ñopoyob chaʼan Dios mi caj i coltañob
BAJCʼɅL winicob xʼixicob tsiʼ chaʼleyob ñajt bʌ xʌmbal, jini tsaʼ bʌ loqʼuiyob ti Babilonia chaʼan miʼ majlelob ti Jerusalén. Pero cheʼ bʌ tsaʼ cʼotiyob ti Jerusalén, jilemix jini tejclum. Maʼanix majqui yaʼ chumul. Jini israelob tsaʼ cajiʼ chaʼ melob tiʼ pejtelel.
Jini ñaxan bʌ tsiʼ meleyob jiñʌch jumpʼejl pulʌntib. Iliyi jiñʌch i yajñib baqui miʼ mejlel i pulob añimal tac chaʼan i majtan Jioba. Mach cabʌlic uw tsaʼ ñumi, jini israelob tsaʼ caji i chaʼ tech i melob jini templo. Pero jini i contrajob yaʼ bʌ chumulob tiʼ tʼejl i tejclumob, tsiʼ ñopo i bʌcʼtesañob chaʼan miʼ cʌy i melob jini eʼtel woli bʌ i melob. Pero ti wiʼil jini i contrajob Israel tsiʼ subeyob jini tsijiʼ bʌ rey yaʼ ti Persia chaʼan mi mel jumpʼejl mandar baqui mi yʌl chaʼan miʼ waʼchocontel jini eʼtel.
Tsaʼ ñumi cabʌl jabil. Anix wuclujumpʼejl (17) jab i loqʼuelob majlel jini israelob yaʼ ti Babilonia. Dios tsiʼ choco majlel Hageo yicʼot Zacarías, xʼaltʼañob i chaʼan, chaʼan miʼ subeñob jini winicob xʼixicob miʼ chaʼ tech i melob jini templo. Jini winicob xʼixicob tsiʼ jacʼʌyob yicʼot tsiʼ ñopoyob chaʼan Diosʌch mi caj i coltañob. Tsiʼ chaʼ meleyob, anquese jumpʼejl mandar woli yʌl chaʼan maʼanic.
Jini chaʼan, juntiquil ñuc bʌ yeʼtel ti soldadojob chʼoyol bʌ ti Persia i cʼabaʼ Tatnai, tsaʼ majli i cʼajtibeñob jini israelob chaʼan majqui tsiʼ subeyob chaʼan miʼ chaʼ melob jini templo. Jini israelob tsaʼ yʌlʌyob chaʼan jini Ciro, rey bʌ ti Babilonia, tsiʼ yʌlʌ: ‹Cucula ti Jerusalén, chaʼ melbenla i templo laʼ Dios Jioba›.
Tatnai tsiʼ choco majlel jumpʼejl carta yaʼ ti Babilonia, baqui tsiʼ cʼajti miʼ sujmʌch Ciro tsiʼ yʌlʌ iliyi, cheʼ bʌ cuxulto. Mach jalic tsiʼ choco majlel jumpʼejl carta jini tsijiʼ bʌ rey ti Persia. Baqui tsiʼ yʌlʌ chaʼan melelʌch. Jin chaʼan tsiʼ tsʼijbu jini rey: ‹Cʌyʌla chaʼan jini israelob miʼ melbeñob i templo chaʼan bʌ i Dios. Mic subeñetla chaʼan mi laʼ coltañob›. Wen tijicñayob jini israelob, come tsaʼ ujti i melob jini templo ti chʌmpʼejl jab.
Cabʌl jabil tsaʼ ñumi. Ti jimbʌ ora lʌcʼʌ anix bolompʼejl i chaʼcʼal (48) jab tsaʼ ujti ti mejlel jini templo. Jini winicob xʼixicob yaʼ ti Jerusalén maʼañobic cabʌl i taqʼuin, jin chaʼan jini tejclum yicʼot i templo Dios mach wen i tʼojol jax. Yaʼ ti Babilonia, jini Esdras chʼoyol bʌ ti Israel, tsiʼ ñaʼta chaʼan yom miʼ tojʼesʌntel jini i templo Dios. Jin chaʼan, ¿awujil ba chuqui tsiʼ mele?
Esdras tsaʼ majli i pejcan Artajerjes, rey bʌ ti Persia, ili mach bʌ jontol rey tsiʼ yʌqʼue yonlel i majtan jini Esdras chaʼan miʼ chʼʌm majlel yaʼ ti Jerusalén. Esdras tsiʼ sube jini israelob yaʼ bʌ añob ti Babilonia, chaʼan miʼ coltañob, wʌcpʼejl mil tsiʼ yʌlʌyob chaʼan mi caj i majlelob. Tsiʼ chʼʌmʌyob majlel cabʌl plata yicʼot oro yicʼot yan tac bʌ i tʼojol jax bʌ.
Esdras tsiʼ mele i pusicʼal, come yaʼ ti bij an jontol bʌ winicob. Tajol jini jontol bʌ winicob miʼ xujchʼiñob jini plata yicʼot oro woli bʌ i chʼʌmob majlel yicʼot miʼ tsʌnsʌntelob. Jini chaʼan Esdras tsiʼ tempa jini winicob xʼixicob, cheʼ bajcheʼ maʼ qʼuel yaʼ ti dibujo. Cheʼ jini tsiʼ chaʼleyob oración chaʼan mi cʌntʌntelob majlel, cheʼ woliyob ti chaʼ sujtel ti Jerusalén.
Jioba tsaʼʌch i cʌntayob. Cheʼ baʼ ora anix chʌmpʼejl uw i cajelob ti xʌmbal, wen tsaʼ cʼotiyob ti Jerusalén. ¿Mach ba anic miʼ pʌsbeñonla iliyi, chaʼan Jioba mucʼʌch i cʌntan jini muʼ bʌ i ñopob?
Esdras, capítulo 2 cʼʌlʌl ti 8.