Cʌntesʌntel 83

Jini muro tac yaʼ ti Jerusalén

¡QʼUELE ila ti dibujo, woliyob ti tsʌts bʌ eʼtel! Jini israelob woliʼ chaʼ melob jini tsʼajc tac tiʼ joytilel Jerusalén. Tsaʼix ñumi jumpʼejl i waxʌcʼal (152) jab, cheʼ bʌ Nabucodonosor tsiʼ jisa Jerusalén, tsiʼ jeme jini tsʼajc tac yicʼot tsiʼ pulbe i puertajlel tac jini tejclum. Cheʼ tsaʼ loqʼuiyob majlel jini israelob yaʼ ti Babilonia, mach jinicach cheʼ tsaʼ cʼotiyob ti Jerusalén tsaʼ cajiʼ chaʼ melob jini tsʼajc tac.

Cheʼ baʼ ora tsaʼ chumleyob, cabʌl jabil maʼanic i tsʼajc tac jini tejclum, ¿bajcheʼ yubil tsiʼ yubiyob maʼ wʌl? Tsiʼ chʌn chaʼleyob bʌqʼuen ti pejtelel ora. Mach wocolic miʼ mejlelob ti ochel jini i contrajob. Pero mi laj qʼuel jaʼel Nehemías woliʼ coltan jini winicob xʼixicob chaʼan miʼ tem melob jini tsʼajc tac am bʌ tiʼ joytilel Jerusalén. ¿Awujil ba majqui jini Nehemías?

Nehemías chʼoyol ti Israel, tilem bʌ ti tejclum i cʼabaʼ Susa, yaʼ baqui chumul Mardoqueo yicʼot Ester. Nehemías tiʼ chaʼle eʼtel yaʼ tiʼ yotot jini rey, tajol tsaʼ sujti ti wem bʌ yamigo jini Mardoqueo yicʼot Ester. Pero jini Biblia maʼanic mi yʌl mi Nehemías tsiʼ melbe i yeʼtel i ñoxiʼal Ester, jini rey Asuero. Tsiʼ chaʼle eʼtel tiʼ tojlel jini yambʌ rey, i cʼabaʼ Artajerjes.

Yom cʼajal a chaʼan, Artajerjes jiñʌch utsʼat bʌ rey, tsaʼ bʌ i yʌqʼue jini Esdras pejtelel jini taqʼuin chaʼan miʼ chʼʌm majlel yaʼ ti Jerusalén, chaʼan miʼ chaʼ wen melben i templo Jioba. Pero, Esdras mach jinic tsaʼ bʌ i mele jini tsʼajc tac am bʌ yaʼ ti tejclum. Laʼ laj qʼuel bajcheʼ tsaʼ ujti chaʼan miʼ mel Nehemías ili eʼtel.

Tsaʼ ñumi uxlujumpʼejl (13) jab cheʼ bʌ Artajerjes tsiʼ yʌqʼue taqʼuin jini Esdras chaʼan miʼ chaʼ wen mel jini templo yaʼ ti Jerusalén. Ti wiʼil Nehemías tsaʼ ochi ti ñuc bʌ xñusa vino i chaʼan jini rey. Jiñʌch muʼ bʌ i jeben vino jini rey yicʼot miʼ ñaxan wen qʼuel mi maʼanic i venenojlel. Jiñʌch ñuc bʌ eʼtel.

Jumpʼejl bʌ qʼuin jini Hanani i yeran Nehemías, yicʼot yambʌ winicob chʼoyoloʼ bʌ ti Israel tsaʼ cʼoti i julaʼtañob Nehemías. Tsiʼ tsictesʌbeyob chʼoyoloʼ bʌ ti Israel jini Nehemías, chaʼan maxto anic melbilob i chaʼan jini tsʼajc tac am bʌ yaʼ ti Jerusalén. Wen chʼijiyem tsaʼ cʌle jini Nehemías, tsaʼ caji i suben Jioba ti oración jini wocol tsaʼ bʌ subenti.

Jumpʼejl bʌ qʼuin, jini rey tsiʼ qʼuele wen chʼijiyem jax jini Nehemías, tsiʼ cʼajtibe: ‹¿Chucoch chʼijiyemet?›. Nehemías tsiʼ sube chaʼan tiʼ caj jini wocol am bʌ ti Jerusalén yicʼot chaʼan maxto chaʼ melbilic jini tsʼajc tac. ‹¿Chuqui a wom?›, cheʼ tsiʼ cʼajtibe jini rey.

‹A wocolic laʼ majlicon yaʼ ti Jerusalén›, cheʼ tsiʼ yʌlʌ Nehemías, ‹chaʼan mic chaʼ mel jini tsʼajc am bʌ tiʼ joytilel›. Artajerjes wen uts i pusicʼal. Tsiʼ sube chaʼan mucʼʌch i mejlel ti majlel, tsiʼ colta i sʌclan teʼ chaʼan miʼ chaʼ melob jini eʼtel. Cheʼ maxto cabʌlic qʼuin i cʼotel Nehemías yaʼ ti Jerusalén, tsaʼ cajiʼ suben jini xchumtʌlob jini woli bʌ i ñaʼtan i mel. Weñʌch tsiʼ yubiyob, jin chaʼan tsiʼ yʌlʌyob: ‹Mi caj lac tech lac mel›.

Cheʼ baʼ ora i contrajob jini Israel tsiʼ qʼueleyob wolix ti chaʼ mejlel jini tsʼajc tac, tsiʼ yʌlʌyob: ‹Mi caj lac majlel, mi ca lac tsʌnsañob yicʼot mi caj lac waʼchocon jini eʼtel›. Cheʼ bʌ tsiʼ yubi Nehemías jini woli bʌ ti ajlel, tsaʼ yʌqʼue espada tac yicʼot lanza tac jini xʼeʼtelob, tsiʼ subeyob: ‹Mach laʼ bʌcʼñañob. Chaʼlenla wersa ti guerra chaʼan mi laʼ coltan laʼ piʼʌlob yicʼot laʼ walobilob yicʼot laʼ wijñam yicʼot laʼ wotot›.

Jini xchumtʌlob wen añob i chʼejlel. Cheʼ woliyob ti eʼtel, an yicʼotob eʼtijib chaʼan guerra. Jin chaʼan, ti lajchʌmpʼejl i yuxcʼal (52) qʼuin tsaʼ ujti i chaʼ melob jini tsʼajc tac. Cheʼ bʌ ora jini maʼanix tsiʼ chaʼleyob bʌqʼuen yaʼ ti tejclum. Nehemías yicʼot Esdras tsaʼ cajiʼ cʌntesañob jini xchumtʌlob tiʼ mandar tac Dios yicʼot wen tijicñayobix.

Pero jini tejclum maxto cheʼic yilal cheʼ bʌ maxto cʌjchemob majlel jini israelob yaʼ ti Babilonia. Jini tejclum tsiʼ melbe i yeʼtel jini rey chaʼan bʌ Persia, come jin woli ti yumʌntel. Pero Jioba tsiʼ yʌcʼʌ i tʼan chaʼan mi caj i choc tilel yambʌ rey, muʼ bʌ caj i yʌqʼuen i tijicñʌyel jini tejclum. ¿Majqui jini rey? ¿Bajcheʼ mi caj i chʼʌm tilel tijicñʌyel wʌʼ ti Pañimil? Tsaʼ ñumi yuxcʼal i chaʼbajcʼ (450) jab cheʼ bʌ tsaʼ ñumen ñaʼtʌnti chaʼan iliyi. An juntiquil wen ñuc bʌ mi caj i yilan pañimil. Pero jini woli bʌ ti ajlel muʼto caj laj cʌn.

Nehemías, capítulo 1 cʼʌlʌl ti 6.