I murojlel Jerusalén

Laʼ lac chaʼ cʼajtesan añix bʌ chaʼpʼejl uxpʼejl jab tsaʼ ujti. Nehemías jiñʌch juntiquil Israel tsaʼ bʌ chumle ti Susa, yaʼ ti tejclum Persia. xYaj eʼtel (troñel) i chaʼan jiñi rey Artajerjes. Ti jumpʼejl bʌ qʼuin, i yijtsʼin Nehemías, tilem bʌ ti Judá, tsaʼ cʼoti i suben mach bʌ weñic: «Jiñi israelob tsaʼ bʌ chaʼ majliyob ti Jerusalén, mach wen cʌntʌbilobic. I murojlel yicʼot i puertajlel jiñi tejclum tsaʼ bʌ i jisa jiñi babiloniojob maxto tojʼesʌbil». Nehemías wen chʼijiyem tsaʼ yubi. Yom i coltañob, jin chaʼan tsiʼ pejca Dios chaʼan jiñi rey miʼ yʌcʼ majlel ti Jerusalén.

Cheʼ bʌ tsaʼ ñumi qʼuin tac, jiñi rey tsiʼ cʌñʌ chaʼan chʼijiyem Nehemías. Tiʼ sube: «Maʼañic baʼ j qʼueleyet bajcheʼ jiñi. ¿Chuqui maʼ wubin?». Nehemías tsiʼ jacʼʌ: «C tejclum, Jerusalén, mach weñic an, ¿bajcheʼ maʼañic mi caj cubin c chʼijiyemlel chaʼan jiñi?». Jiñi rey tsiʼ cʼajtibe: «¿Bajcheʼ miʼ mejlel j coltañet?». Ti jiñi bʌ ora, Nehemías tsiʼ mucu pejca Jehová. Cheʼ jiñi tsiʼ yʌlʌ: «A wocolic, acʼʌyon majlel ti Jerusalén chaʼan mic chaʼ tojʼesan jiñi muro». Jiñi rey Artajerjes tsaʼʌch i yʌcʼʌ majlel. Tsiʼ yʌqʼue i cʌntʌntel jaʼel chaʼan maʼañic chuqui miʼ yujtel tiʼ tojlel yaʼ ti bij. Cheʼ jaʼel, tsiʼ waʼchoco bajcheʼ gobernador ti Judá yicʼot tsaʼ yʌqʼue teʼ tac chaʼan miʼ melben i puertajlel jiñi tejclum.

Cheʼ bʌ Nehemías tsaʼ cʼoti ti Jerusalén, tsaʼ majli i qʼuel jiñi muro. Cheʼ jiñi, tsiʼ tempa motomajob yicʼot gobernadorob, i tiʼ subeyob: «Wen asiyemix. Yom mi lac chaʼ tech lac mel». Tsaʼʌch i jacʼʌyob i tsaʼ caji i tojʼesañob jiñi muro.

Jiñi i contrajoʼ bʌ israelob tsaʼ caji i wajleñob i tsiʼ yʌlʌyob: «Juncojt jachix xwax miʼ mejlel i jem jiñi muro woli bʌ la mel». Pero jiñi xʼeʼtelob maʼañic tsaʼ yʌcʼʌyob ti ñuc i tsaʼ bej cajiyob ti eʼtel. Ñumen chan yicʼot ñumen tsʌts tsaʼ caji i melob jiñi muro.

Cheʼ jiñi, i contrajob chʼoyoloʼ bʌ ti yan tac bʌ tejclum tsiʼ comol alʌyob chaʼan miʼ majlel i contrajiñob Jerusalén. Cheʼ bʌ jiñi judíojob tsaʼ cʼoti i yubiñob jiñi, tsaʼ cajiyob ti wen bʌqʼuen. Pero Nehemías tsiʼ yʌlʌ: «Mach laʼ chaʼlen bʌqʼuen. Wʌʼʌch an la quicʼot Jehová». Tsiʼ waʼchoco xcʌntayob chaʼan miʼ cʌntañob jiñi xʼeʼtelob. Jiñi i contrajob maʼañic tsaʼ mejli i ticʼlañob.

Jiñi muro yicʼot jiñi puerta tac tsaʼ ujti ti melol ti 52 qʼuin. Nehemías tsiʼ pʌyʌ tilel levitajob yaʼ ti Jerusalén chaʼan miʼ melbeñob i qʼuiñilel jiñi eʼtel tsaʼix bʌ ujti. Tsiʼ chajpa chaʼmojt xcʼayob. Esdras tsaʼ majli yicʼot junmojt, i Nehemías tsaʼ majli yicʼot yambʌ. Tsaʼ letsiyob yaʼ ti escalera tac am bʌ yaʼ tiʼ tiʼ Cuxul bʌ jaʼ. Ti wiʼil, jujunmojt tsaʼ cajiyob ti xʌmbal ñumel yaʼ tiʼ pam i murojlel jiñi tejclum. Tsiʼ ñijcayob majlel trompeta, címbalo, arpa yicʼot tsiʼ cʼʌyʌyob Jehová, cʼʌlʌl tsaʼ cʼoti i tempañob i bʌ yaʼ ti templo. Jiñi wiñicob, xʼixicob yicʼot chʼitoñob tsiʼ yʌqʼueyob pulbil bʌ i majtan Jehová i tsiʼ meleyob jiñi qʼuiñijel. Wen ñajt tsiquilob i tʼan come wen tijicñayob.