Cʌntesʌntel 87
Jini chʼiton Jesús yaʼan ti templo
QʼUELE jini chʼiton woli bʌ i pejcan jini winicob añobix bʌ i jabilel. xCʌntesa mandarob yaʼ tiʼ templo Dios am bʌ ti Jerusalén. Jini chʼiton jiñʌch Jesús. Chʼitonix. Anix lajchʌmpʼejl (12) i jabilel.
Jini xcʌntesajob tsaʼ toj sajtiyob i pusicʼal cheʼ bʌ tsiʼ qʼueleyob Jesús chaʼan wen yujil i chaʼan bʌ Dios yicʼot tsʼijbubil bʌ yaʼ ti Biblia. Pero, ¿chucoch maʼanic yaʼañob José yicʼot María yaʼ baqui an Jesús? ¿Baqui añob? Laʼ laj qʼuel majlel.
Ti jujumpʼejl jab José miʼ pʌy majlel i familia yaʼ ti Jerusalén chaʼan jini wen ñuc bʌ qʼuiñijel i cʼabaʼ Pascua. Ñajt bʌ xʌmbal yaʼ ti Nazaret cʼʌlʌl ti Jerusalén. Maʼanic majqui an i carro mi jinic avión. Maxto anic cheʼ bʌ ora jini. Yonlel winicob xʼixicob miʼ chaʼleñob xʌmbal uxpʼejl qʼuin tiʼ yoc chaʼan miʼ cʼotelob ti Jerusalén.
Pero cheʼ bʌ ora jini, José, cabʌlix i yalobil. Jin chaʼan yom miʼ cʌntan jini yambʌ yalobilob i yerañob Jesús. Ti jini jabil José, María yicʼot i yalobilob woliyix i chaʼ sujtelob majlel ti Nazaret. Tsiʼ ñaʼtayob chaʼan Jesús yaʼʌch majlel jaʼel yaʼ baqui majlel jini winicob xʼixicob. Pero cheʼ bʌ tsiʼ cʼajayob i yo ti ochʼajel qʼuin, maʼanic tsiʼ tajayob Jesús. ¡Tsaʼ caji i sʌclañob baʼan i familiajob yicʼot baʼan i yamigojob, pero maʼanic tsiquil Jesús. Tsaʼ chaʼ majliyob ti Jerusalén chaʼan miʼ sʌclañob.
Tsiʼ tajayob yaʼ ti templo. Woliʼ ñichʼtan xcʌntesajob yicʼot woliʼ mel i cʼajtiya tac jaʼel. Tsaʼ toj sajtiyob i pusicʼal jini winicob xʼixicob, chaʼan cabʌl i ñaʼtʌbal jini chʼiton. Pero María tsiʼ sube: ‹Calobil, ¿chucoch cheʼ tsaʼ melbeyon lojon bajcheʼ ili? Jini a tat yicʼot joñon tiʼ chʼijiyemlel c pusicʼal lojon tsac sʌclayet lojon›.
‹¿Chucoch tsaʼ laʼ sʌclayon?›, cheʼ tsiʼ jacʼʌ Jesús. ‹¿Mach ba laʼ wujilic chaʼan yom mi cajñel tiʼ yotot c Tat?›
Jesús miʼ mulan ajñel yaʼ baqui miʼ cʌn i chaʼan bʌ Dios. Cheʼ yom mi lac mel jaʼel, ¿mach baʼ isujmic? Yaʼ ti Nazaret, Jesús miʼ majlel ti tempa bʌ chaʼan chʼujutesaya ti jujumpʼejl semana. Come tiʼ pejtelel ora miʼ wen chʼʌm ti ñuc muʼ bʌ i cʌn yicʼot cabʌl chuqui tsiʼ cʌñʌ loqʼuem bʌ ti Biblia. Laʼ lac lajiben chuqui tsiʼ mele Jesús.
Lucas 2:41-52; Mateo 13:53-56.