Cʌntesʌntel 91
Jesús tsiʼ chaʼle cʌntesa ti wits
QʼUELE yaʼ buchul Jesús. Woliʼ cʌntesan winicob xʼixicob yaʼ ti jumpʼejl wits ti Galilea. Yaʼ bʌ añob tiʼ tʼejl jiñobʌch xcʌntʼañob i chaʼan. Tiʼ yajca lajchʌntiquil (12) chaʼan miʼ sujtel bajcheʼ i apóstolob. Jini apóstolob ñucoʼ bʌ xcʌntʼañob i chaʼan Jesús. ¿Awujil ba chuqui i cʼabaʼob?
Ñaxam bʌ, Simón Pedro yicʼot i yermaño i cʼabaʼ Andrés. Cheʼ jini, Santiago yicʼot Juan, i yermañojob i bʌ jaʼel. I cʼabaʼ jini yambʌ apóstol jiñʌch Santiago jaʼel, jini yambʌ i cʼabaʼ Simón jaʼel. Chaʼtiquil apóstolob i cʼabaʼob jiñʌch Judas. Juntiquil jiñʌch Judas Iscariote, jini yambʌ Judas miʼ subentel jaʼel bajcheʼ Tadeo. Yaʼan jaʼel Felipe yicʼot Natanael (muʼ bʌ i subentel jaʼel bajcheʼ Bartolomé), yaʼan jaʼel Mateo yicʼot Tomás.
Cheʼ bʌ Jesús tsaʼ loqʼui majlel ti Samaria, tsiʼ chaʼle ñaxan bʌ subtʼan: ‹Jini yumʌntel am bʌ ti panchan lʌcʼʌlix›. ¿Awujil ba chuqui jini yumʌntel? Jiñʌch isujm bʌ yumʌntel i chaʼan Dios. Jesús jiñʌch rey. Mi caj i chaʼlen yumʌntel ti panchan yicʼot mi caj i chʼʌmtilel ñʌchʼtʌlel ila ti Pañimil. Jini i yumʌntel Dios mi caj i sujtesan ti jumpʼejl paraíso jini Pañimil.
Jesús mi laj qʼuel ila ti dibujo woliʼ cʌntesan jini winicob xʼixicob chaʼan i yumʌntel Dios. ‹Cheʼ yom mi laʼ chaʼlen oración›, cheʼ tsiʼ yʌlʌ Jesús. ‹C Tac lojon añet bʌ ti panchan, laʼ chʼujutesʌntic a cʼabaʼ. Laʼ tilic a yumʌntel. Laʼ mejlic chuqui a wom ti Pañimil, cheʼ bajcheʼ ti panchan.› Yonlel winicob xʼixicob mi yʌlob chaʼan ili oración jiñʌch ‹I yoración lac Yum›. Yambʌ mi yʌlob, jiñʌch ‹Padrenuestro›. ¿Muʼ ba mejlel a wʌl jini oración tiʼ pejtelel?
Jesús tsiʼ cʌntesa jaʼel jini winicob xʼixicob chaʼan bajcheʼ yom mi qʼuelob i bʌ ti jujuntiquil. Tsiʼ yʌlʌ: ‹Melben yañoʼ bʌ a wom bʌ miʼ melbeñetob a jaʼel›. ¿Mach ba wenic maʼ qʼuel cheʼ bʌ jini yañoʼ bʌ miʼ pʌsbeñetob i yutslel i pusicʼal ti a tojlel? Jin chaʼan uts yom mi lac mel lac bʌ tiʼ tojlel yañoʼ bʌ. ¡Wen tijicña mi caj la cajñel yaʼ ti paraíso cheʼ mi lac mel ti lac pejtelel iliyi! ¿ñomach?
Mateo, capítulo 5 cʼʌlʌl 7;Mt 10:1-4.