Jesús miʼ yajcan 12 apóstolob

Cheʼ bʌ Jesús añix lʌcʼʌ jumpʼejl jab yicʼot ojlil i cajel ti subtʼan, an chuqui tsaʼ caji i ñaʼtan. ¿Majqui mi caj i yajcañob chaʼan miʼ coltañob ti eʼtel (troñel) yicʼot chaʼan miʼ yʌlob chuqui yom miʼ mejlel yaʼ ti congregación? Cheʼ bʌ muʼto caj i mel (chaʼlen) jiñi, Jesús tsiʼ cʼajtibe i coltaya Jehová. Tsaʼ bajñel majli ti jumpʼejl wits i jumpʼejl acʼʌlel tsiʼ chaʼle oración. Cheʼ tiʼ sʌcʼan, Jesús tsiʼ tempa lamital xcʌntʼañob i chaʼan i tsiʼ yajca jiñi 12 apóstolob. ¿Am ba a cʌmbe bʌ i cʼabaʼ? Jiñobʌch Pedro, Andrés, Santiago, Juan, Felipe, Bartolomé, Tomás, Mateo, Santiago i yalobil Alfeo, Tadeo, Simón yicʼot Judas Iscariote.

Tsiʼ chaʼle xʌmbal Jesús yicʼot jiñi 12 apóstolob. Tsiʼ pʌsbeñob bajcheʼ yom miʼ chaʼleñob subtʼan, i ti wiʼil i bajñelix tsiʼ chocoyob majlel. Cheʼ jaʼel, Jehová tsiʼ yʌqʼueyob i pʼʌtʌlel chaʼan miʼ locʼsañob xiba yicʼot chaʼan miʼ tsʼʌcan jiñi cʼamoʼ bʌ.

Jesús tsiʼ qʼuele jiñi 12 apóstolob bajcheʼ i yamigojob i tsaʼ mejli i yʌqʼueñob i tʼan. Jiñi fariseojob tsiʼ ñaʼtayob chaʼan mach ñucobic i cʼʌjñibal jiñi apóstolob yicʼot chaʼan maʼañic chuqui yujilob. Pero Jesús mach cheʼic tsiʼ qʼueleyob bajcheʼ jiñi. Tsiʼ wen chajpayob chaʼan miʼ melob jiñi eʼtel. Mi caj i yajñel yicʼotob Jesús cheʼ bʌ miʼ yujtel ñuc tac bʌ i cʼʌjñibal tiʼ cuxtʌlel. Junchajp jiñʌch cheʼ bʌ mi caj i yajñel yicʼotob cheʼ bʌ muʼto caj i chʌmel yicʼot cheʼ bʌ miʼ chaʼ chʼojyel. An chʼoyoloʼ bʌ ti Galilea, cheʼ bajcheʼ Jesús. Lamital añobix i yijñam.

Mach tojobic jaʼel jiñi apóstolob, jin chaʼan tsaʼʌch ñajayiyob. An tajol maʼañic tsiʼ ñaxan ñaʼtayob bajcheʼ yom miʼ chaʼleñob tʼan yicʼot tsiʼ meleyob mach bʌ weñic. An tajol ora tsaʼ michʼayob. Tsaʼ to i techeyob tʼan chaʼan majqui jiñi ñumen ñuc bʌ apóstol. Pero utsobʌch i pusicʼal come tsiʼ cʼuxbiyob Jehová. Jiñʌch tsiʼ coltayob jiñi congregación cheʼ bʌ maʼañix wʌʼan Jesús.