Cʌntesʌntel 96

Jesús tsiʼ cʼoqʼuesa cʼamoʼ bʌ

CHEʼ bʌ Jesús woliʼ ñumel majlel yaʼ ti tejclum tac, tsiʼ cʼoqʼuesa jini cʼamoʼ bʌ. Tsaʼ cʼoti ti ñaʼtʌntel ti yan tac bʌ tejclum chaʼan Jesús woliʼ mel milagro tac. Jin chaʼan, jini winicob xʼixicob tsiʼ pʌyʌyob majlel mach bʌ anic miʼ ñijcañob i bʌ, xpojtsʼob, mach bʌ weñobic i yoc yicʼot yan tac bʌ xcʼamʌjelob. Jesús tsiʼ cʼoqʼuesa tiʼ pejtelelob.

Anix ñumen uxpʼejl jab cheʼ bʌ Juan tsiʼ yʌqʼue i chʼʌm jaʼ Jesús. Jesús tsiʼ sube i apóstolob chaʼan lʌcʼʌlix i yorajlel chaʼan miʼ majlel ti Jerusalén, baqui mi caj i tsʌnsañob yicʼot mi caj i tejchel chʼojyel. Pero cheʼ bʌ maxto cʼotem i yorajlel jini, woli to i cʼoqʼuesan cʼamoʼ bʌ.

Jumpʼejl bʌ qʼuin, Jesús woliʼ chaʼlen cʌntesa ti sábado. Jiñʌch jumpʼejl bʌ qʼuin muʼ bʌ i cʼʌñob jini judíojob chaʼan miʼ cʼajob i yo. Jini xʼixic muʼ bʌ laj qʼuel yaʼ ti dibujo anix waxʌclujumpʼejl (18) jab maʼanic miʼ mejlel ti waʼtʌl ti toj. Jin chaʼan Jesús tsiʼ chucbe i quejlab, i jini xʼixic tsaʼ tojʼa i pat. ¡Cʼoqʼuix!

Jiñʌch tsaʼ bʌ i yʌcʼʌ ti michʼan jini ñaxam bʌ miʼ yʌcʼob i bʌ ti ñopbalʌl. ‹An wʌcpʼejl qʼuin chaʼan mi lac chaʼlen eʼtel›, cheʼ tsiʼ yʌlʌ juntiquil, tiʼ tojlel winicob xʼixicob. ‹¡Ti jimbʌ ora yom mi laʼ tilel chaʼan mi laʼ lajmesʌntel, i mach ti sábado jic!›

Pero Jesús tsiʼ jacʼʌ: ‹¡Jontoletla! Pero jateticla mi laʼ tic majlel laʼ burro chaʼan mi la pʌy majlel ti jap jaʼ anquese sábado. Jin chaʼan, ¿mach ba yomic miʼ cʼoqʼuesʌntel ili xʼixic anix bʌ waxʌclujumpʼejl (18) jab i cajel ti cʼamʼan?›. Tsiʼ chaʼleyob quisin jini jontoloʼ bʌ winicob cheʼ bʌ tsiʼ jacʼʌ Jesús bajcheʼ jini.

Ti wiʼil Jesús yicʼot i apóstolob, tsaʼ majliyob ti Jerusalén. Cheʼ bʌ woliyix i cʼotelob yaʼ tiʼ tejclum Jericó, chaʼtiquil xpojtsʼob pʼumpʼuñoʼ bʌ, cʼam tsiʼ chaʼleyob tʼan: ‹Jesús, coltañon lojon›.

Jesús tsiʼ pʌyʌ jini xpojtsʼob, i tsiʼ cʼajtibeyob: ‹¿Chuqui laʼ wom mic tumbeñetla?›. Tsiʼ jacʼʌyob: ‹C Yum, com lojon miʼ cʼotel c wut›. Jesús tsiʼ tʌlbeyob i wut, ¡ti jimbʌ ora tsiʼ taja i qʼuelob pañimil! ¿Awujil ba chucoch Jesús tsiʼ mele jini milagro tac? Come miʼ wen cʼuxbin winicob xʼixicob yicʼot yom chaʼan miʼ ñopob. Ili miʼ cʌntesañonla chaʼan cheʼ bʌ yumʌlix Jesús wʌʼ ti pañimil, maʼanix majqui miʼ cajel ti cʼamʼan.

Mateo 15:30, 31; Lucas 13:10-17; Mateo 20:29-34.