Cʌntesʌntel 97
Jesús woliʼ cʼotel cheʼ bajcheʼ Rey
CHEʼ bʌ maxto jali i cʼoqʼuesa Jesús jini chaʼtiquil xpojtsʼob pʼumpʼuñoʼ bʌ, tsaʼ cʼoti ti jumpʼejl tejclum tiʼ tʼejl Jerusalén. Tsiʼ sube chaʼtiquil xcʌntʼañob i chaʼan: ‹Cucula ti tejclum, yaʼ mi caj laʼ taj juncojt burro. Jitila tilel›.
Cheʼ bʌ tsiʼ pʌybeyob cʼotel jini burro, Jesús tsaʼ cʼʌchle. Cheʼ jini cʼʌchʌl tsaʼ majli ti Jerusalén, mach ñajtix an yaʼi. Cheʼ lʌcʼʌlix mi cʼotel yaʼ tiʼ tejclum, cabʌl winicob xʼixicob tsaʼ loqʼui i tajob. Cabʌl winicob xʼixicob tsiʼ tiʼchʼiyob pisil yaʼ ti bij. Yañoʼ bʌ tsiʼ yʌcʼʌyob i yopol chʼib yaʼ ti bij, cʼam tsiʼ chaʼleyob tʼan: ‹¡Laʼ ñuqʼuesʌntic jini rey woli bʌ i tilel tiʼ cʼabaʼ Jioba!›.
Ti wajali, yaʼ ti Israel, jini tsaʼ jax to bʌ ochiyob bajcheʼ rey, cʼʌchʌlob ti burro miʼ yochelob yaʼ ti Jerusalén chaʼan miʼ qʼuejlelob ti winicob xʼixicob. Jiñʌch tsaʼ bʌ i mele Jesús jaʼel iliyi. Jini winicob xʼixicob woliʼ pʌsob chaʼan yomobʌch chaʼan Jesús miʼ yumañob. Pero mach tiʼ pejtelelobic yomob. Miʼ mejlel lac ñaʼtan chaʼan cheʼʌch bajcheʼ ili, cheʼ bʌ Jesús tsaʼ majli yaʼ ti templo.
Jesús tsiʼ cʼoqʼuesa pojtsʼoʼ bʌ yicʼot mach bʌ anic miʼ ñijcañob i bʌ. Cheʼ bʌ jini alʌlob tsiʼ qʼueleyob jini, tsaʼ cajiyob ti cʼay tiʼ tojlel Jesús. Iliyi tsaʼ yʌcʼʌyob ti michʼan jini motomajob, i tsiʼ subeyob Jesús: ‹¿Muʼ baʼ wubin woli bʌ i yʌlob jini alʌlob?›.
‹Woliyʌch›, cheʼen Jesús. ‹¿Maʼanic ba pejcʌbil laʼ chaʼan yaʼ ti Biblia baqui mi yʌl: «Yaʼ tiʼ yej alobob yicʼot tiʼ yej jini woliyoʼ bʌ ti chuʼ, tsiʼ wen tsictesa i ñuclel Dios?».› Jini alʌlob tsaʼ caji i chʌn chaʼleñob cʼay tiʼ tojlel jini rey acʼbil bʌ i chaʼan Dios.
Com lac mel lac bʌ bajcheʼ jini alʌlob, ¿ñomach? Tajol an winicob xʼixicob mach bʌ yomobic chaʼan mi lac chaʼlen cʌntesa chaʼan i yumʌntel Dios. Pero joñonla maʼanic mi caj laj cʌy lac sub jini wen tac bʌ muʼ bʌ caj i mel Jesús tiʼ tojlel winicob xʼixicob.
Cheʼ bʌ Jesús wʌʼ to an ti Pañimil, maxto i yorajlel chaʼan miʼ chaʼlen yumʌntel. ¿Jala mi caj i cʼotel i yorajlel? Jiñʌch yom bʌ i ñaʼtañob jini xcʌntʼañob jaʼel. Laʼ lac pejcan chuqui tsaʼ ujti.