Cʌntesʌntel 98
Yaʼ ti Olivo wits
YAʼ bʌ maʼ qʼuel ti dibujo jiñʌch Jesús, yaʼ an ti Olivo wits. Jini chʌntiquil winicob yaʼ bʌ añob i yicʼot, jiñobʌch i apóstolob. Jiñʌch Andrés yicʼot Pedro, i yʌscuñob i bʌ, yaʼañob jaʼel Jacobo yicʼot Juan i yʌscuñob i bʌ jaʼel. Jini otot yaʼ bʌ maʼ taj a qʼuel yaʼ ti dibujo, jiñʌch i templo Dios yaʼ ti Jerusalén.
Anix ñumen chaʼpʼejl qʼuin cheʼ bʌ Jesús cʼʌchʌl tsaʼ ochi majlel ti juncojt burro yaʼ ti Jerusalén. Martesix. Ti jini qʼuin, Jesús ñaxan tsajnix yaʼ ti templo. Jini motomajob tsiʼ ñopo i chucob chaʼan miʼ tsʌnsañob. Pero tsiʼ bʌcʼñayob, come jini winicob xʼixicob tsiʼ qʼueleyob ti ñuc jini Jesús.
‹¡Lajaletla bajcheʼ yalobil lucum!› Cheʼ tsaʼ subentiyob ti Jesús jini ñaxam bʌ mi yʌcʼob i bʌ ti ñopbalʌl. Cheʼ jini, Dios tsiʼ sube chaʼan mi caj yʌqʼueñob i tojob i mul tiʼ caj jini mach bʌ wenic melbil i chaʼañob. Ti wiʼil, Jesús tsaʼ letsi majlel yaʼ ti Olivo wits, cheʼ jini, chʌntiquil i apóstolob tsaʼ caji i melbeñob cʼajtiya tac. ¿Awujil ba chuqui tsiʼ cʼajtiyob?
Jini apóstolob tsiʼ cʼajtiyob chuqui mi caj ti ujtel ti talto bʌ qʼuin. Yujilob chaʼan Jesús mi caj i jisan jini jontolil wʌʼ ti Pañimil. Pero yom i ñaʼtañob jala mi caj ti ujtel iliyi. ¿Jala mi caj i chaʼ tilel Jesús chaʼan miʼ chaʼlen yumʌntel bajcheʼ Rey?
Jesús yujil chaʼan jini woli bʌ i tsajcañob majlel ila ti Pañimil maʼanic mi caj i mejlel i qʼuelob cheʼ bʌ mi caj i chaʼ tilel. Ili yom yʌl chaʼan jini Jesús yaʼʌch mi caj i yajñel ti panchan, jin chaʼan maʼanic miʼ mejlel ti qʼuejlel. Jin chaʼan, Jesús tsiʼ sube i apóstolob muʼ bʌ caj i yujtel ti Pañimil cheʼ bʌ woliyix ti yumʌntel yaʼ ti panchan. ¿Baqui tac bʌ jini?
Jesús tsiʼ yʌlʌ chaʼan miʼ cajel guerra tac, mi caj i wen cʼamʼan winicob xʼixicob, tal wiʼñal, miʼ cajel cabʌl tsʌnsa yicʼot yujquel lum. Cheʼ jaʼel, tsiʼ yʌlʌ chaʼan jini wen tʼan chaʼan i yumʌntel Dios mi caj i sujbel tiʼ pejtelel Pañimil. ¿Qʼuelbil ba lac chaʼan ili ora tiʼ pejtelel iliyi? ¡Cheʼʌchi! Miʼ mejlel lac cʌl chaʼan Jesús woliyix ti yumʌntel yaʼ ti panchan. Mach jalix mi caj i jisʌntel jini jontolil ila ti Pañimil.
Mateo 21:46; 23:1-39; 24:1-14; Marcos 13:3-10.