Jesús miʼ chaʼ majlel ti panchan

Jesús tsiʼ tempayob jiñi xcʌntʼañob yaʼ ti Galilea. Tsiʼ yʌqʼueyob wen ñuc bʌ mandar: «Cucula i sujtesanla ti xcʌntʼan jiñi wiñicob xʼixicob tiʼ pejtelel pañimil. Pʌsbenla tiʼ pejtelel tsaʼ bʌ c pʌsbeyetla yicʼot acʼʌyoʼla ti chʼʌmjaʼ». Cheʼ jiñi, Jesús tsiʼ yʌlʌ: «Cʼajtesanla, tiʼ pejtelel ora miʼ cajñel quicʼotetla».

Cheʼ bʌ tsaʼix chaʼ tejchi Jesús, 40 qʼuin tsiʼ pʌsbe i bʌ jiñi xcʌntʼañob i chaʼan yaʼ ti Galilea yicʼot ti Jerusalén. Tsiʼ chaʼle cʌntesa yicʼot tsiʼ mele milagro tac. Ti wiʼil, tsiʼ tempayob i bʌ yicʼot jiñi apóstolob yaʼ ti Olivo wits. Jesús tsiʼ yʌlʌ: «Mach laʼ cʌy Jerusalén. Pijtanla jiñi tsaʼ bʌ i wʌn subeyetla c Tat».

Jiñi apóstolob maʼañic tsiʼ chʼʌmbeyob isujm chuqui tsiʼ yʌlʌ Jesús, jin chaʼan tsiʼ cʼajtibeyob: «¿Muʼ ba caj a sujtel tiʼ rey Israel?». Jesús tsiʼ jacʼʌ: «Jehová maxto yomic chaʼan mic sujtel ti rey. Pero mach jalix yom chaʼan mi laʼ wʌqʼuentel chʼujul bʌ espíritu muʼ bʌ caj i yʌqʼueñetla laʼ pʼʌtʌlel, i mi caj laʼ sujtel ti c testigo. Jin chaʼan, cucula ti subtʼan ti Jerusalén, ti Judea, ti Samaria yicʼot tiʼ ñajtlel pañimil».

Cheʼ jiñi, Jesús tsaʼ letsi majlel ti panchan i jumpʼejl tocal tsiʼ mʌcʌ. Jiñi xcʌntʼañob maʼañic tsiʼ cʌyʌ i qʼuelob jiñi panchan, pero Jesús tsaʼ sʌc sajti.

Jiñi xcʌntʼañob tsaʼ loqʼuiyob yaʼ ti Olivo wits i tsaʼ majliyob ti Jerusalén. Ñʌmʌl i tempañob i bʌ yaʼi yicʼot i melob oración tiʼ chañelal jumpʼejl otot. Tsiʼ pijtayob mi anto chuqui mi caj i bej subentelob ti Jesús.