Cʌntesʌntel 107
Tsiʼ juluyob ti xajlel Esteban
JINI winic yaʼ bʌ ñocol jiñʌch Esteban. Jiñʌch xucʼul bʌ xcʌntʼan i chaʼan Jesús. ¡Pero qʼuele cu chuqui woli ti ujtel tiʼ tojlel! Jini winicob yaʼ bʌ añob woliʼ julob ti colem tac bʌ xajlel. ¿Chucoch miʼ wen tsʼaʼleñob jini Esteban chaʼan miʼ melbeñob bajcheʼ iliyi? Laʼ laj qʼuel.
Dios tsiʼ colta Esteban chaʼan miʼ mel cabʌl milagro tac. Jini winicob maʼanic miʼ mulañob bajcheʼ iliyi, i tsiʼ yʌʼleyob chaʼan tsiʼ cʌntesa winicob xʼixicob. Pero Dios tsiʼ yʌqʼue cabʌl i ñaʼtʌbal jini Esteban, i tsiʼ yʌlʌ chaʼan ili winicob tsiʼ chaʼleyob cʌntesa mach bʌ tojic. Ili tsiʼ ñumen michʼesayob, jin chaʼan tsiʼ chucuyob yicʼot tsiʼ pʌyʌyob winicob xʼixicob chaʼan miʼ yʌlob chuqui mach bʌ isujmic tiʼ tojlel Esteban.
Jini ñuc bʌ motomaj tsiʼ cʼajtibe Esteban: ‹¿Isujm ba jini woli bʌ i yʌlob?›. Esteban tsiʼ jacʼʌ yicʼot jumpʼejl wem bʌ cʌntesʌntel loqʼuem bʌ ti Biblia. Cheʼ tiʼ yujtibal i cʌntesa tsiʼ yʌlʌ chaʼan jontoloʼ bʌ winicob tsiʼ tsʼaʼleyob jini xʼaltʼañob i chaʼan Dios ti wajali. Tsiʼ chaʼ alʌ: ‹Lajaletla bajcheʼ jini tsaʼ bʌ i tsʌnsayob Jesús, i winic bʌ Dios, i maʼanic tsi laʼ jacʼbe i mandar Dios›.
¡Ili tsiʼ wen michʼesayob jini ñaxam bʌ mi yʌcʼob i bʌ ti ñopbalʌl! Tsiʼ cʼuxuyob i bʌquel i yej tiʼ caj i michʼajelob. Pero cheʼ bʌ Esteban tsiʼ letsa i wut ti panchan, tsiʼ yʌlʌ: ‹¡Awilan! Wolij qʼuel yaʼ waʼal Jesús tiʼ ñoj Dios yaʼ ti panchan›, ili winicob tsiʼ mʌcʌyob i chiquin i tsiʼ chucuyob Esteban. Tsiʼ tujcʼayob majlel yaʼ tiʼ tiʼ tejclum.
Tsiʼ jochoyob i bujc tam bʌ i cʼʌb i tsaʼ yʌcʼʌyob baqui an jini Saulo chaʼan miʼ cʌntan. ¿Woli baʼ qʼuel baqui an jini Saulo? Cheʼ jini, chaʼtiquil uxtiquil winicob tsaʼ caji i julob ti xajlel Esteban. Tsaʼ ñocle, cheʼ bajcheʼ maʼ qʼuel yaʼ ti dibujo, i tsaʼ caji i pejcan Dios ti oración: ‹Jioba, mach a wʌqʼueñob tiʼ wenta ili mulil›. Yujil chaʼan jini lamitalob tsaʼ lotintiyob ti jini ñaxam bʌ mi yʌcʼob i bʌ ti ñopbalʌl. Cheʼ bʌ tsaʼ ujti ti oración tsaʼ chʌmi Esteban.
Cheʼ bʌ an majqui miʼ melbeñet jontolil ti a tojlel, ¿muʼ baʼ melben bajcheʼ tsiʼ melbeyet, o maʼ cʼajtiben Dios chaʼan mi yʌqʼuen wocol? Mi jinic to Esteban yicʼot mi jinic to Jesús tsiʼ meleyob bajcheʼ jini. Tsiʼ meleyob chuqui wem bʌ tiʼ tojlel jini tsaʼ bʌ i yʌcʼʌyob ti wocol. Cheʼ yom mi lac mel jaʼel.