¿BAJCHEʼ MIʼ MEJLEL LAC JISAN JIÑI TSʼAʼLEYA?
3 | Locʼsan ti a pensar jiñi tsʼaʼleya
Jiñi Biblia miʼ yʌl:
«Tsijibtesan laʼ ñaʼtʌbal chaʼan mi laʼ qʼuextan laʼ bʌ, chaʼan jatetla mi laʼ qʼuel chuqui jiñi wem bʌ, utsʼat bʌ yicʼot jiñi toj bʌ muʼ bʌ i mulan Dios» (ROMANOS 12:2).
¿Chuqui yom i yʌl?
I wentajʌch Dios chuqui muʼ bʌ lac ñaʼtan (Jeremías 17:10). I sujmʌch chaʼan yomʌch mi laj cʌntan chuqui mi la cʌl yicʼot chuqui mi lac mel, pero mach jasʌlic jiñi. Come jiñi tsʼaʼleya miʼ tejchel ti lac pensar yicʼot ti lac pusicʼal, jin chaʼan yomʌch mi lac locʼsan miʼ tsʼitaʼ anto ti lac pensar. Cheʼ jach bajcheʼ jiñi miʼ caj i mejlel laj qʼuextan lac melbal i mi laj cʌy jiñi tsʼaʼleya.
Miʼ mejlel a mel iliyi:
Ñumen cʌñʌ a bʌ i wen qʼuele bajcheʼ yilal maʼ qʼuel yambʌlob o chuqui maʼ ñaʼtan tiʼ tojlelob, ñumento mi tilemob ti yambʌ tejclum o yʌñʌl bajcheʼ yilal i colorlel i pʌchʌlelob. Cʼajtiben a bʌ: «¿Bajcheʼ yilal mij qʼuelob? Cheʼ bajcheʼ yilal mij qʼuelob, ¿chaʼan ba j cʌñʌyobʌch o tiʼ cajach chuqui muʼ bʌ cubin miʼ yʌl yambʌlob?». Mach a qʼuel ti internet, ti película tac o ti yan tac bʌ muʼ bʌ i tech ti a pusicʼal chaʼan bʌ tsʼaʼleya, jatsʼ o tsʌnsa.
Jiñi i Tʼan Dios miʼ mejlel i coltañonla lac locʼ ti lac pensar yicʼot ti lac pusicʼal jiñi tsʼaʼleya.
Cheʼ bʌ joñonla woli (choncol) lac bajñel tsajin lac bʌ, wocolʌch chaʼan mi laj qʼuel mi weñʌch bajcheʼ mi lac ñaʼtan tiʼ tojlel yambʌlob o bajcheʼ yubil mi la cubin tiʼ tojlelob. Pero jiñi i Tʼan Dios miʼ coltañonla come «muʼto i mejlel i pʌs chuqui mi lac ñaʼtan yicʼot chuqui yom lac pusicʼal» (Hebreos 4:12). Jin chaʼan, cʌñʌ muʼ bʌ i yʌl jiñi Biblia i qʼuele mi jiñi muʼ bʌ a ñaʼtan lajalʌch bajcheʼ miʼ yʌl jiñi Biblia. Cheʼ jiñi, chaʼlen wersa chaʼan maʼ mel jiñi muʼ bʌ a cʌn. Jiñi i Tʼan Dios miʼ mejlel i «jem jiñi wen tsʌts tac bʌ chucul» ti lac pensar yicʼot ti lac pusicʼal, bajcheʼ jiñi tsʼaʼleya (2 Corintios 10:4, 5).