Cʌntesʌntel 111
Alʌ chʼiton tsaʼ bʌ ochi i wʌyel
¡QʼUELE cu! ¿Chuqui woli ti ujti yaʼi? ¿Tsaʼ ba i wen lowo i bʌ maʼ wʌl jini alʌ chʼiton? ¡Qʼuele, junticlel jini winic woli bʌ i loqʼuel ti jini otot jiñʌch Pablo! ¿Muʼ baʼ taj a qʼuel Timoteo jaʼel? ¿Tsaʼ batica yajli jini alʌ chʼiton yaʼ ti ventana?
Cheʼʌch tsaʼ ujti bajcheʼ jini. Pablo woliʼ yʌcʼ jumpʼejl discurso yaʼ baqui añob jini xcʌntʼañob yaʼ ti Troas. Come Pablo yujil chaʼan jal maʼanic mi caj i qʼuelob, come mi caj i majlel ti barco tiʼ yijcʼʌlal. Jin chaʼan tsiʼ chʌn chaʼle tʼan cʼʌlʌl ti ojlil acʼʌlel.
Weno, jini alʌ chʼiton, i cʼabaʼ jiñʌch Eutico, yaʼ tsaʼ buchle ti ventana, i tsaʼ ochi i wʌyel. ¡Tsaʼ yajli ti uxlajm bʌ otot! Jin chaʼan jini winicob xʼixicob tsiʼ wen meleyob i pusicʼal. Cheʼ bʌ jini winicob tsiʼ techeyob jini alʌ chʼiton, tsiʼ bʌcʼñayob chaʼan tsaʼix chʌmi. ¡Jiñʌch tsaʼ bʌ ujti!
Cheʼ bʌ Pablo tsiʼ qʼuele chʌmenix jini alʌ chʼiton, tsaʼ pʌcle tiʼ pam yicʼot tsiʼ meqʼue. Cheʼ jini tsiʼ yʌlʌ: ‹Mach laʼ mel laʼ pusicʼal. ¡Cuxulto!›. ¡Melelʌch! ¡Jumpʼejlʌch milagro! ¡Pablo tsiʼ tejchesa chʼojyel! Tsiʼ yubiyob cabʌl i tijicñʌyel winicob xʼixicob.
Tsaʼ chaʼ letsiyob majlel tiʼ pejtelelob i tsaʼ uchʼiyob. Pablo tsiʼ chʌn chaʼle tʼan cʼʌlʌl ti sʌcʼan. ¡Pero mi lac ñaʼtan chaʼan Eutico maʼanix tsaʼ chaʼ ochi i wʌyel! Cheʼ jini, Pablo, Timoteo yicʼot jini woli bʌ i tsajcañob majlel tsaʼ cʼʌjquiyob ti barco. ¿Awujil ba baqui tsaʼ majliyob?
Pablo woli i yujtesan i yusujtelel i xʌmbal ti subtʼan. Yaʼ ti tejclum i cʼabaʼ Éfeso tsaʼ jale uxpʼejl jab. Jin chaʼan tsaʼ ñumen jale, mach cheʼic bajcheʼ tsiʼ chaʼ sujtelel i xʌmbal.
Cheʼ bʌ tsaʼ loqʼuiyob ti Troas, jini barco tsaʼ waʼle ti Mileto. Come maʼanix wen ñajt an jini congregación chaʼan Éfeso, Pablo tsiʼ choco tsiʼ pʌyol jini winicob añobix bʌ i jabilel, chaʼan miʼ majlelob ti Mileto, come cojix mi caj i pejcañob. Ti wiʼil, cheʼ bʌ tsaʼ majli jini barco, ¡wen chʼijiyem tsiʼ yubiyob cheʼ bʌ tsiʼ qʼueleyob woliyix i majlel Pablo!
Jini barco tsaʼ cʼoti ti Cesarea. Cheʼ bʌ jini Pablo tsaʼ cʼoti yaʼi, tsaʼ jijli tiʼ yotot jini xcʌntʼan i cʼabaʼ Felipe, jini xʼaltʼan Ágabo tsiʼ yʌlʌ cheʼ baqui ora miʼ cʼotel Pablo ti Jerusalén, mi caj i yotsʌntel ti mʌjquibʌl. Cheʼʌch tsaʼ ujti bajcheʼ tsiʼ yʌlʌ Ágabo. Cheʼ bʌ Pablo anix chaʼpʼejl jab i yochel ti mʌjquibʌl yaʼ ti Cesarea, tsaʼ chojqui majlel ti Roma, chaʼan miʼ mejlel tiʼ tojlel César, yumʌl bʌ ti Roma. Laʼ laj qʼuel chuqui tsaʼ ujti cheʼ bʌ tsaʼ majli ti Roma.
Hechos, capítulo 19 cʼʌlʌl 26.