Cʌntesʌntel 113
Pablo yaʼan ti Roma
QʼUELE cu, Pablo cʌchʌl i cʼʌb tiʼ cadena yicʼot jini soldado chʼoyol bʌ ti Roma woli bʌ i cʌntan. Pablo juntiquilʌch xcʌjchel yaʼ ti Roma. Woliʼ pijtan chaʼan chuqui mi caj i subentel ti jini yumʌl bʌ yaʼ ti Roma. Cheʼ bʌ yaʼ to an ti mʌjquibʌl, miʼ mejlel i julaʼtañob.
Cheʼ anix uxpʼejl qʼuin i cʼotel ti Roma, Pablo tsiʼ choco ti pʌyol jini ñucoʼ bʌ judíojob chaʼan miʼ majlel i qʼuelob. Jin chaʼan, jini judíojob yaʼ bʌ chumulob ti Roma tsaʼ majliyob i julaʼtan Pablo. Tsaʼ subentiyob jini wen tʼan chaʼan Jesús yicʼot i yumʌntel Dios. Lamital tsaʼ sujtiyob ti xcʌntʼañob, pero yañoʼ bʌ maʼanic.
Pablo tsiʼ sube jini wen tʼan tac jini soldadojob woli bʌ i cʌntañob. Jini chaʼpʼejl jab tsaʼ bʌ jalʼa ti mʌjquibʌl, Pablo tsiʼ chaʼle subtʼan tiʼ tojlel majqui jach tsiʼ taja. Come tsiʼ mele Pablo bajcheʼ iliyi, jin to tiʼ yotot jini yumʌl bʌ ti Roma tsiʼ yubiyob jini wen tʼan chaʼan jini Yumʌntel, cheʼ jini lamital tsaʼ sujtiyob ti xñoptʼañob.
Pero, ¿majqui jini yaʼ bʌ woli ti tsʼijb? ¿Awujil ba majqui jini? Jiñʌch Timoteo. Tsaʼ otsʌnti jaʼel ti mʌjquibʌl chaʼan i subtʼan chaʼan jini i yumʌntel Dios, pero ti jini ora tsaʼix locʼsʌnti ti mʌjquibʌl. Tsaʼ cʼoti i coltan Pablo. ¿Awujil ba chuqui woliʼ tsʼijbun? Laʼ laj qʼuel.
¿Cʼajal baʼ chaʼan jini tejclum Filipos yicʼot Éfeso yaʼ ti Cʌntesʌntel 110? Pablo tsiʼ chaʼle coltaya yaʼi chaʼan miʼ mejlel congregación tac. Ti jini bʌ ora, cheʼ bʌ Pablo ochem to ti mʌjquibʌl, tsiʼ tsʼijbu carta tac chaʼan jini xñoptʼañob. Jini carta tac, i cʼabaʼ Efesios yicʼot Filipenses, yaʼan ti Biblia. Pablo tsiʼ sube Timoteo chaʼan miʼ tsʼijbuben jini xñoptʼañob añoʼ bʌ ti Filipos.
Jini chʼoyoloʼ bʌ ti Filipos tsiʼ wen pʌsʌyob i yutslel i pusicʼal tiʼ tojlel Pablo. Tsiʼ chocbeyob majlel jumpʼejl majtañʌl yaʼ ti mʌjquibʌl, jin chaʼan Pablo woliʼ subeñob chaʼan wocolix i yʌlʌyob chaʼan jini majtañʌl. Epafrodito jiñʌch tsaʼ bʌ i chʼʌmʌ majlel jini majtañʌl. Pero cheʼ bʌ ora jini tsaʼ wen cʼamʼa, tsʼitaʼ jachix maʼanic tsaʼ chʌmi. Pero tsaʼ lajmi i cʼamʌjel, i muqʼuix i mejlel ti majlel tiʼ tejclum. Jiñʌch muʼ bʌ caj i chʼʌm majlel jini carta i chaʼan Pablo yicʼot Timoteo cheʼ bʌ miʼ chaʼ majlel ti Filipos.
Yaʼ ti mʌjquibʌl, Pablo tiʼ tsʼijbu yambʌ chaʼpʼejl carta yaʼ bʌ mi lac taj ti Biblia. Jumpʼejl, jiñʌch i chaʼan jini xñoptʼañob yaʼ bʌ añob ti tejclum i cʼabaʼ Colosas. ¿Awujil ba bajcheʼ i cʼabaʼ jini carta? Jiñʌch Colosenses. Jini yambʌ carta tsiʼ chocbe majlel i yamigo i cʼabaʼ Filemón, yaʼ bʌ chumul ti tejclum i cʼabaʼ Colosas. Ti jini carta miʼ tajtʌl ti tʼan jini Onésimo, i yaj eʼtel Filemón.
Onésimo tsaʼ putsʼi loqʼuel tiʼ yotot Filemón, i tsaʼ majli ti Roma. Onésimo tsaʼ cʼoti i ñaʼtan chaʼan Pablo ochen ti mʌjquibʌl yaʼ ti Roma. Tsiʼ julaʼta, Pablo tsiʼ sube jini wen tʼan. Mach cabʌlic ora tsaʼ ñumi, Onésimo tsaʼ sujti jaʼel ti juntiquil xñoptʼan. Cheʼ jini, Onésimo tsaʼ caji i cʼojoʼtan chaʼan tsaʼ putsʼi. Jin chaʼan, ¿awujil ba chuqui tiʼ tsʼijbu Pablo yaʼ ti carta tsaʼ bʌ i chocbe majlel Filemón?
Pablo tsiʼ sube Filemón chaʼan yom miʼ ñusʌben tsaʼ bʌ i mele Onésimo. ‹Mic chaʼ chocbeñet tilel›, cheʼ tsiʼ tsʼijbu Pablo. ‹Pero mach a yaj eʼtel jachix. Come tsaʼix sujti ti xñoptʼan.› Cheʼ bʌ Onésimo ti chaʼ sujti majlel yaʼ ti tejclum i cʼabaʼ Colosas, tsiʼ chʼʌmʌ majlel jini chaʼpʼejl carta, jumpʼejl i chaʼan jini xñoptʼañob yaʼ bʌ chumulob ti tejclum i cʼabaʼ Colosas yicʼot jini yambʌ i chaʼan Filemón. ¡Ñaʼtancu bajcheʼ yubil tsaʼ yubi i tijicñʌyel jini Filemón, cheʼ bʌ tsiʼ ñaʼta chaʼan jini i yaj eʼtel i cʼabaʼ Onésimo, tsaʼix sujti ti xñoptʼan jaʼel!
Cheʼ bʌ Pablo tiʼ tsʼijbu jini carta chaʼan jini xñoptʼañob yaʼ bʌ chumulob ti Filipos yicʼot i chaʼan jini Filemón, cabʌl wem bʌ tʼan tiʼ tsʼijbu majlel. ‹Mic chocbeñetla majlel Timoteo›, cheʼ tsiʼ sube Pablo jini yaʼ bʌ chumulob ti tejclum i cʼabaʼ Filipos. ‹Pero mach jalix mi caj cʼotel jaʼel baʼañetla.› Pero Filemón tsaʼ subenti: ‹Chajpʌbeñon cajñib baʼ mic jijlel›.
Cheʼ bʌ tsaʼ locʼsʌnti yaʼ ti mʌjquibʌl, Pablo tsaʼ caji i julaʼtan i yermañojob ti yan tac bʌ tejclum. Pero ti wiʼil, Pablo tsaʼ chaʼ otsʌnti ti mʌjquibʌl yaʼ ti Roma. Pero ti jimbʌ ora, yujilix chaʼan mi caj i tsʌnsañob. Jin chaʼan, orajach tsiʼ xiqʼui ti pʌyol Timoteo. Pablo tsiʼ tsʼijbu: ‹Xucʼul tsaʼ ajñiyon tiʼ tojlel Dios yicʼot mi caj i yʌqʼueñon c majtan›. Cheʼ bʌ maxto cabʌl jabil i chʌmel Pablo, jini romanojob tsiʼ chaʼ jisayob Jerusalén.
Pero yaʼ ti Biblia an to chuqui yambʌ miʼ mejlel laj cʌn. Jioba tsiʼ sube jini apóstol Juan chaʼan miʼ tsʼijbun jini cojix tac bʌ libro, i jumpʼejlel jiñʌch Apocalipsis. Jini libro mi yʌl chuqui miʼ caj ti ujtel ti talto bʌ qʼuin. Laʼ laj cʌn chuqui miʼ cajel ti ujtel ti wiʼil.
Hechos 28:16-31; Filipenses 1:13; 2:19-30; 4:18-23; Hebreos 13:23; Filemón 1-25; Colosenses 4:7-9; 2 Timoteo 4:7-9.