Cʌntesʌntel 10
Melbalʌl tac muʼ bʌ i tsʼaʼlen Dios
¿Bajcheʼ yilal yom maʼ qʼuel jatet jini mach bʌ wentaquic miʼ qʼuel Dios? (1)
¿Baqui tac bʌ jini tsʼiʼlel? (2)
¿Bajcheʼ yilal yom miʼ qʼuelob xñoptʼañob jini lot? (3)
¿Jini alas tac chaʼan tiʼ tajol taqʼuin? (3)
¿Jini xujchʼ? (3)
¿Jini jatsʼ? (4)
¿Tiʼ pejcʌntel espíritujob? (5)
¿Jini yʌcʼajel? (6)
¿Bajcheʼ mi mejlel lac loqʼuel ti libre ti jini melbalʌl tac mach bʌ wenic? (7)
1. Jini xñoptʼañob i chaʼan Dios miʼ cʼuxbiñob chuqui wen, pero yom jaʼel miʼ cʌn i tsʼaʼleñob chuqui mach wen (Salmo 97:10). Jini yom i yʌl chaʼan mi lac tsʼaʼlen chuqui miʼ tsʼaʼlen Dios. ¿Baqui tac bʌ lamital jini?
2. Tsʼiʼlel: Jini muʼ bʌ i piʼleñob i bʌ cheʼ maxto i chaʼleyob ñujpuñijel, yicʼot jini muʼ bʌ i taj i yixic, yicʼot jini muʼ bʌ i piʼlen animal tac, yicʼot jini muʼ bʌ i chaʼ pʌyob i bʌ chaʼ jiñob jach bʌ tiʼ yotot, yicʼot jini winicob muʼ bʌ i wʌlʌc piʼleñob i bʌ, jiñʌch mulil wen tsʌts tac bʌ tiʼ contra Dios (Levítico 18:6; Romanos 1:26, 27; 1 Corintios 6:9, 10). Mi juntiquil winic yicʼot juntiquil xʼixic chumulobix, pero mach ñujpuñemobic, yom miʼ cʌyob bʌ o miʼ ñujpuñijelob ti juez (Hebreos 13:4).
3. Lot, alas chaʼan tiʼ tajol taqʼuin, xujchʼ: Jehová Dios mach yujilic lot (Tito 1:2). Jini chaʼan, yomoʼ bʌ chaʼan utsʼat miʼ qʼuejlelob ti Dios, mach yomic miʼ chaʼleñob lot (Proverbios 6:16-19; Colosenses 3:9, 10). Pejtelel jini alas tac chaʼan mi lac taj taqʼuin miʼ yʌqʼueñonla lac ñumen mulan taqʼuin. Jin chaʼan jini xñoptʼañob maʼanic miʼ yotsañob i bʌ ti alas chaʼan lotería mi muqʼuic i yʌcʼob taqʼuin cheʼ miʼ chaʼlen ajñel caballo o yan tac bʌ (Efesios 5:3-5). Maʼanic mucʼo ti xujchʼ jaʼel, yicʼot maʼanic miʼ mʌñob chuqui xujchʼibil tac bʌ, yicʼot maʼanic chuqui miʼ chʼʌmob majlel cheʼ maxto i cʼajtibeyob i yum (Éxodo 20:15; Efesios 4:28).
4. Ora bʌ michʼajel, jatsʼ: Cheʼ maʼanic mi lac ticʼ lac michʼajel miʼ mejlel yʌcʼonla ti jatsʼ o tsʌnsa (Génesis 4:5-8). Jini xjatsʼob maʼanic miʼ mejlelob ti sujtel tiʼ yamigo Dios (Salmo 11:5; Proverbios 22:24, 25). Mach wenic mi laj qʼuextan, o mi lac chaʼ sutqʼuin cheʼ an majqui miʼ melbeñonla chuqui mach wen (Proverbios 24:29; Romanos 12:17-21).
5. Xticʼlayajoʼ bʌ yicʼot muʼ bʌ i pejcañob espíritujob: Lamital winicob xʼixicob miʼ pejcañob jini espíritujob, chaʼan miʼ cʼajtiñob i coltʌntel chaʼan miʼ lajmel i cʼamʌjelob. Yañoʼ bʌ miʼ ticʼlañob i contrajob chaʼan miʼ cʼamʼañob i chaʼan miʼ tsʌnsañob. Tiʼ pejtelel ili mach bʌ wentaquic tiʼ melol, yaʼan Satanás tiʼ pat. Jini chaʼan jini xñoptʼañob mach yomic miʼ wis melob jini (Deuteronomio 18:9-13). Baʼ miʼ mejlel lac taj laj coltʌntel chaʼan jini xticʼlayajob, jiñʌch cheʼ lʌcʼʌl mi la cajñel tiʼ tʼejl Jehová (Proverbios 18:10).
6. Yʌcʼʌjel: Tiʼ japol tsʼita vino, cerveza o yan tac bʌ mach lecojic (Salmo 104:15; 1 Timoteo 5:23). Pero Dios mach utsʼatic miʼ qʼuel cheʼ miʼ jajpel ti pejtel ora o cheʼ miʼ yʌcʼañob (1 Corintios 5:11-13; 1 Timoteo 3:8). Tiʼ cʌlʌx japol miʼ mejlel i cʼamʼesañonla o miʼ jem lac chaʼañoʼ bʌ. Yicʼot jaʼel, bʌbʌqʼuen maʼ yajlel ti orajach ti yan tac bʌ mulil (Proverbios 23:20, 21, 29-35).
7. Jini winicob xʼixicob muʼ bʌ i melob mach bʌ utsʼatic miʼ qʼuel Dios, «maʼanic miʼ cajel i yochelob tiʼ yumʌntel Dios» (Gálatas 5:19-21). Mi jatet mucʼʌch a cʼuxbin Dios tiʼ isujm yicʼot a wom a tijicñesʌben i pusicʼal, mi caj i mejlel a cʌy tiʼ melol chuqui tac mach wen (1 Juan 5:3). Cʌñʌ a tsʼaʼlen muʼ bʌ i yʌl Dios mach wenic (Romanos 12:9). Ñochtan jini winicob xʼixicob weñoʼ bʌ i melbal (Proverbios 13:20). Jini lac piʼʌlob ti ñoptʼan wen añobix bʌ i ñaʼtʌbal muqʼuix mejlel i coltañonla (Santiago 5:14). Yicʼot jaʼel añʌch yambʌ a coltʌntel, jiñʌch oración ti Dios (Salmo 55:22).
[Dibujo yaʼ ti iyopol 20, 21]
Dios miʼ tsʼaʼlen jini yʌcʼʌjel, xujchʼ, alas chaʼan tiʼ tajol taqʼuin yicʼot michʼajel muʼ bʌ yʌcʼonla ti jatsʼ o tsʌnsa