Cʌntesʌntel 14

Jini yamigojob Dios maʼanic miʼ melob mach bʌ wenic

Satanás miʼ yilʌbeñonla lac pusicʼal chaʼan mi lac mel chuqui mach wenic. Mi la com cheʼ yamigojonla Dios, yom mi lac tsʼaʼlen jini muʼ bʌ i tsʼaʼlen Jehová (Salmo 97:10). Jin tac ili lamital mach bʌ yomic miʼ melob jini i yamigojob Dios:

Mulil jini tsʼiʼlel. «Mach a chaʼlen tsʼiʼlel.» (Éxodo 20:14.) Mach wenic jaʼel cheʼ juntiquil winic yicʼot xʼixic mi piʼleñob i bʌ cheʼ maxto ñujpuñemobic (1 Corintios 6:18).

Yʌcʼajel. Jini «xyʌcʼʌjelob [...] [maʼanic] mi caj i yochelob tiʼ yumʌntel Dios» (1 Corintios 6:10).

Tsʌnsa, yicʼot muʼ bʌ i tsʌnsan alʌl maxto bʌ yila pañimil. «Mach a chaʼlen tsʌnsa.» (Éxodo 20:13.)

Xujchʼ. «Mach a chaʼlen xujchʼ.» (Éxodo 20:15.)

Lot. Jehová miʼ tsʼaʼlen «jini muʼ bʌ i chaʼlen lot» (Proverbios 6:17).

Jontolil yicʼot michʼajel mach bʌ anic miʼ ticʼ i bʌ. Jehová «miʼ tsʼaʼlen jini muʼ bʌ i lon mulan jisaya» (Salmo 11:5). Yicʼot «tsiquil i mul lac tsucul pusicʼal» yaʼan jaʼel «michʼajel yicʼot aʼleya» (Gálatas 5:19, 20).

Alas chaʼan taqʼuin. «Mach mi laʼ ñochtan mi juntiquilic [...], mi woliʼ [...] miʼ an i chʌclel.» (1 Corintios 5:11.)

I tsʼaʼlentel añoʼ bʌ ti yambʌ tejclum tac. «Cʼuxbin laʼ contrajob. Tajala ti oración jini muʼ bʌ i contrajiñetla.» (Mateo 5:43, 44.)

Dios miʼ subeñonla ti pejtelel ili chaʼañʌch lac wenlel. Mach tiʼ pejtelelic ora cʼun ti cʌyol ti melol chuqui mach wenic, pero yicʼot i coltaya Jehová yicʼot i Testigojob, jatet miʼ mejlel a cʌy a mel mach bʌ muqʼuic i mulan Dios (Isaías 48:17; 2 Corintios 4:7; Hebreos 10:24, 25).