Cʌntesʌntel 13
Bajcheʼ mi mejlel a taj jini isujm bʌ ñopbalʌl
¿Muʼ ba i mulan Dios tiʼ pejtelel jini ñopbalʌl, o cojach jumpʼejl? (1)
¿Chucoch an cabʌl ñopbalʌl muʼ bʌ i lon alob xñoptʼañobʌch? (2)
¿Bajcheʼ mi mejlel a cʌn jatet jini isujm bʌ xñoptʼañob? (3-7)
1. Jesús tsiʼ yʌqʼue i tejchibal jini isujm bʌ ñopbalʌl. Ti ili qʼuin wʌle cojach an junmujchʼ xchʼujutesayajob i sujmleloʼ bʌ i chaʼan Jehová Dios (Juan 4:23, 24; Efesios 4:4, 5). Jini Biblia miʼ yʌl chaʼan tsʼitaʼob jach woli bʌ i xʌñob majlel ti chʼoʼchʼoc bʌ bij majlem bʌ ti laj cuxtʌlel (Mateo 7:13, 14).
2. Jini Biblia tsiʼ wʌn alʌ, cheʼ tsaʼ laj chʌmiyob jini apóstolob tsaʼ caji ti cʼunteʼ ochel yaʼ ti congregación cʌntesʌntel mach bʌ isujmic, yicʼot leco tac bʌ melbalʌl. Winicob tsaʼ bʌ caji i pʌyob loqʼuel xñoptʼañob chaʼan miʼ cʌy i tsajcañob Cristo (Mateo 7:15, 21-23; Hechos 20:29, 30). Jin chaʼan mi laj qʼuel yonlel ñopbalʌl tac muʼ bʌ i lon aloʼ xñoptʼañobʌch. ¿Bajcheʼ miʼ mejlel laj cʌn jini isujm bʌ xñoptʼañob?
3. Jini wen cʌmbil bʌ tiʼ tojlel jini isujm bʌ xñoptʼañob, jiñʌch cheʼ miʼ wen cʼuxbiñob i bʌ tiʼ isujm (Juan 13:34, 35). Maʼanic cʌntesʌbilob, chaʼan ñumen ñuc miʼ qʼuelob i bʌ tiʼ tojlel yambʌ winicob xʼixicob, añoʼ bʌ ti yambʌ tejclum o chaʼan qʼuexel i colorlel i pʌchʌlelob. Yicʼot maʼanic cʌntesʌbilob chaʼan miʼ tsʼaʼleñob winicob xʼixicob añoʼ bʌ ti yambʌ tejclum (Hechos 10:34, 35). Cheʼ jaʼel maʼanic mi yotsañob i bʌ ti guerra. Jini isujm bʌ xñoptʼañob miʼ qʼuelob i bʌ cheʼ bajcheʼ i yerañob i bʌ (1 Juan 4:20, 21).
4. Yambʌ marca bajcheʼ mi mejlel a cʌn jini isujm bʌ ñopbalʌl, jiñʌch cheʼ maʼ qʼuel jini winicob xʼixicob muʼ bʌ i majlelob yaʼi, miʼ wen chʼʌmob ti ñuc jini Biblia. Miʼ qʼuelob bajcheʼ i tʼañʌch Dios yicʼot miʼ ñopob chuqui miʼ yʌl (Juan 17:17; 2 Timoteo 3:16, 17). Tiʼ tojlelob jini i Tʼan Dios ñumen an i cʼʌjñibalob i chaʼan, cheʼ bajcheʼ jach ñaʼtʌbalʌl o costumbre tac i chaʼañoʼ bʌ winicob xʼixicob ila ti pañimil (Mateo 15:1-3, 7-9). Ti pejtelel qʼuin miʼ chaʼleñob wersa chaʼan miʼ yajñelob bajcheʼ mi yʌl jini Biblia. Maʼanic chuqui mi subob mach bʌ muqʼuic i melob (Tito 1:15, 16).
5. Jini muʼ bʌ i majlelob yaʼ ti isujm bʌ ñopbalʌl yomʌch miʼ ñuqʼuesʌbeñob i cʼabaʼ Dios jaʼel (Mateo 6:9). Jesús tsi yʌcʼʌ ti cʌjñel i cʼabaʼ Dios, Jehová, cheʼ yom miʼ melob jaʼel jini isujm bʌ xñoptʼañob. ¿Majquiyob jini muʼ bʌ i subob i cʼabaʼ Dios yaʼ baqui chumulet?
6. Jini isujm bʌ xñoptʼañob yomʌch miʼ subob i Yumʌntel Dios. Jesús cheʼʌch tsiʼ mele. Jesús tsiʼ chʌn subu jini i Yumʌntel Dios (Lucas 8:1). Yicʼot jaʼel, tsiʼ choco majlel jini xcʌntʼañob i chaʼan, chaʼan miʼ majlel i subob jini jach bʌ wen tʼan tiʼ petol Pañimil (Mateo 24:14; 28:19, 20). Jini isujm bʌ xñoptʼañob miʼ ñopob chaʼan muʼ bʌ caj i chʼʌm tilel i ñʌchʼtilel pañimil cojach jini i Yumʌntel Dios (Salmo 146:3-5).
7. Jini xcʌntʼañob i chaʼan Jesús mach i chaʼañobic ili jontol bʌ pañimil (Juan 17:16). Maʼanic mi yotsañob i bʌ yicʼot chuqui miʼ melob yumʌlob i maʼanic miʼ chʼicob i bʌ ti leto ila ti pañimil. Maʼanic leco bʌ i melbalob, melbalʌl tac mach bʌ utsʼatic miʼ mel ili pañimil (Santiago 1:27; 4:4). ¿A cʌñʌ ba jatet jumpʼejl ñopbalʌl yaʼ baqui chumulet, an tac bʌ i chaʼañob ili marca isujm bʌ xñoptʼañob?
[Dibujo yaʼ ti iyopol 26, 27]
Jini isujm bʌ xñoptʼañob miʼ cʼuxbiñob i bʌ, miʼ wen chʼʌmob ti ñuc jini Biblia yicʼot miʼ subob i Yumʌntel Dios