Jiñi chʼujutesaya wem bʌ miʼ qʼuel Dios

1. ¿Baqui bʌ bendición mi caj lac taj cheʼ mucʼʌch lac chʼujutesan Dios cheʼ bajcheʼ yom?

JEHOVÁ DIOS miʼ wen cʼuxbiñonla. Jin chaʼan, miʼ mulan i cʌntesañonla chaʼan mi lac taj lac wenlel. Cheʼ mucʼʌch lac chʼujutesan Jehová cheʼ bajcheʼ yom, tijicña mi caj la cajñel yicʼot mi caj i coltañonla chaʼan maʼañic mi la cotsan lac bʌ ti cabʌl wocol tac. Cheʼ jaʼel mi caj i yʌqʼueñonla bendición tac yicʼot mi caj i coltañonla (Isaías 48:17). Pero an cabʌl ñopbalʌl ti pañimil (mulawil). Anquese jiñi yan tac bʌ ñopbalʌl miʼ yʌlob chaʼan isujmʌch muʼ bʌ i yʌlob, pero yʌñʌl miʼ ñaʼtañob majqui Jehová yicʼot chuqui yom tiʼ tojlelob.

2. ¿Chuqui yom maʼ mel jatet chaʼan maʼ cʌn bajcheʼ yom miʼ chʼujutesʌntel Jehová, i baqui bʌ lajiya miʼ mejlel a wʌl?

² ¿Bajcheʼ miʼ mejlel a cʌn jatet chaʼan bajcheʼ yom miʼ chʼujutesʌntel Jehová? Mach cʼʌñʌlic maʼ laj cʌmben i cʌntesa ti jujunchajp jiñi ñopbalʌl tac. Cojach yom maʼ cʌn chuqui miʼ cʌntesañonla tiʼ sujmlel jiñi Biblia chaʼan jiñi isujm bʌ chʼujutesaya. Laʼ la cʌl jumpʼejl lajiya. Cheʼ bajcheʼ cʌmbilix a chaʼan, ti cabʌl país an cabʌl taqʼuin mach bʌ isujmic. Ñaʼtancu cheʼ muqʼuic a subentel a yajcan jiñi isujm bʌ taqʼuin yicʼot mach bʌ isujmic. ¿Bajcheʼ mi caj a ñaʼtan baqui bʌ jiñi isujm bʌ yicʼot mach bʌ isujmic? ¿Muʼ ba caj mejlel a wotsan ti a jol bajcheʼ yilal jujunwejl jiñi taqʼuin mach bʌ isujmic? ¿Mach ba ñumen weñic cheʼ maʼ ñaxan wen tsajin bajcheʼ yilal jiñi isujmʌch bʌ taqʼuin? Cheʼ tsaʼix a wen cʌñʌ jiñi taqʼuin, mi caj i mejlel a cʌn baqui bʌ jiñi mach bʌ isujmic. Cheʼ lajal jaʼel, cheʼ bʌ tsaʼix laj cʌñʌ bajcheʼ yilal jiñi isujm bʌ ñopbalʌl, mach wocolic mi caj laj cʌn jiñi mach bʌ isujmic.

3. Cheʼ bajcheʼ tsiʼ yʌlʌ Jesús, ¿chuqui yom mi lac mel chaʼan miʼ chʼʌm Dios jiñi lac chʼujutesaya?

³ Cheʼ bʌ mi lac chʼujutesan Jehová cheʼ bajcheʼ yom, wen ñucʌch i cʼʌjñibal. Cabʌl wiñicob xʼixicob (quixtañujob) miʼ yʌlob chaʼan weñʌch miʼ qʼuel Dios tiʼ pejtelel jiñi ñopbalʌl tac, pero mach cheʼic mi yʌl jiñi Biblia. Cheʼ jaʼel mach cojic jach yom mi yʌl juntiquil chaʼan xñoptʼañʌch, come Jesús tsiʼ yʌlʌ: «Mach ti pejtelobic muʼ bʌ i pejcañoñob tiʼ yum mi caj i yochelob tiʼ yumʌntel jiñi am bʌ ti panchan. Jiñi jach muʼ bʌ i melob bajcheʼ yom c Tat ti panchan mi caj i yochelob». Jin chaʼan, Dios cojach mi caj i chʼʌm jiñi lac chʼujutesaya mi mucʼʌch laj cʌn chuqui miʼ cʼajtibeñonla yicʼot mi mucʼʌch lac mel cheʼ bajcheʼ mi yʌl. Jiñi maʼañic bʌ miʼ melob chuqui yom Dios, Jesús tsiʼ sube: «Jatetla muʼ bʌ laʼ chaʼlen jontolil» (Mateo 7:21-23). Jiñi ñopbalʌl mach bʌ isujmic lajalʌch bajcheʼ jiñi taqʼuin mach bʌ isujmic come maʼañic i cʼʌjñibal mi cheʼic to wistʌl. Cheʼ to jaʼel miʼ chʼʌm tilel cabʌl wocol.

4. ¿Chuqui yom i yʌl jiñi chaʼpʼejl bij tsaʼ bʌ i taja ti tʼan Jesús, i baqui miʼ pʌyonla majlel jiñi jujumpʼejl bij?

⁴ Jehová woli (choncol) i yʌqʼuen i yorajlel chaʼan tiʼ pejtelel jiñi quixtañu miʼ chaʼleñob wersa chaʼan miʼ tajob i cuxtʌlel mach bʌ añic miʼ jilel. Pero chaʼan mi lac mejlel ti chumtʌl tiʼ pejtelel ora ti Paraíso, yom mi lac chʼujutesan yicʼot yom an wem bʌ lac melbal cheʼ bajcheʼ miʼ mulan Jehová. Yonlel mach yomic i melob iliyi, jin chaʼan Jesús tsiʼ yʌlʌ: «Ochenla ti chʼoʼchʼoc bʌ i tiʼ, come colem i tiʼ, ñuc i bijlel muʼ bʌ i majlel ti tojmulil. Cabʌlob miʼ yochelob yaʼi. Come chʼoʼchʼoc i tiʼ, chʼoʼchʼoc i bijlel baʼ mi laʼ taj laʼ cuxtʌlel. Tsʼitaʼ jax jiñi muʼ bʌ i yochelob i taj i cuxtʌlel» (Mateo 7:13, 14). Cheʼ bajcheʼ tsaʼ laj cʌñʌ, jiñi isujm bʌ ñopbalʌl miʼ pʌyonla majlel ti laj cuxtʌlel pero jiñi mach bʌ isujmic miʼ pʌyonla majlel ti chʌmel. Jehová mach yomic mi juntiquilic quixtañu miʼ jisʌntel, jin chaʼan woli (yʌquel) i yʌqʼuen i yorajlel chaʼan jiñi quixtañujob miʼ cʌñob Jehová (2 Pedro 3:9). Cheʼ mi la cʌl tiʼ sujm, jiñi lac chʼujutesaya woli bʌ lac mel tiʼ tojlel Dios miʼ mejlel i yʌqʼueñonla laj cuxtʌlel o miʼ mejlel i yʌqʼueñonla lac sʌt.

¿BAJCHEʼ MIʼ MEJLEL LAJ CɅN BAQUI BɅ JIÑI ISUJM BɅ ÑOPBALɅL?

5. ¿Bajcheʼ miʼ mejlel laj cʌn jiñi añoʼ bʌ tiʼ sujm bʌ ñopbalʌl?

⁵ ¿Bajcheʼ miʼ mejlel lac taj jiñi ‹bij baʼ mi lac taj laj cuxtʌlel›? Jesús tsiʼ yʌlʌ chaʼan maʼañic wocol mi caj laj cʌn jiñi añoʼ bʌ tiʼ sujm bʌ ñopbalʌl cheʼ mucʼʌch lac wen qʼuel bajcheʼ yilal i melbalob. Jesús tsiʼ yʌlʌ: «Tiʼ wut jach mi laʼ cʌn», come «pejtelel utsʼat bʌ teʼ miʼ yʌcʼ utsʼat bʌ i wut» (Mateo 7:16, 17). Jin chaʼan, jiñi añoʼ bʌ tiʼ sujm bʌ ñopbalʌl wen cʌmbilob tiʼ cʌntesa yicʼot tiʼ melbalob. Anquese xmulilob, pero miʼ chaʼleñob wersa i melbeñob i yeʼtel Dios. Laʼ laj qʼuel wʌcchajp bajcheʼ miʼ mejlel laj cʌn jiñi añoʼ bʌ tiʼ sujm bʌ chʼujutesaya.

6, 7. Jiñi i wiñicob Dios, ¿bajcheʼ yilal miʼ qʼuelob jiñi Biblia, i bajcheʼ tsiʼ pʌsʌ Jesús jiñi ejemplo chaʼan jiñi?

⁶ Jiñi i cʌntesa i wiñicob Dios loqʼuem ti Biblia. Jiñi i Tʼan Dios mi yʌl: «Chʼoyol ti Dios pejtelel i Tsʼijbujel. An i cʼʌjñibal ti cʌntesa chaʼan lac ticʼol yicʼot chaʼan lac tojʼesʌntel, chaʼan mi lac mel chuqui toj, chaʼan chajpʌbil i wiñic Dios ti pejtelel chuqui wen, chaʼan utsʼat miʼ mel i yeʼtel ti pejtelel» (2 Timoteo 3:16, 17). Jiñi apóstol Pablo tsiʼ tsʼijbu ili tʼan tiʼ tojlel jiñi xñoptʼañob: «Come cheʼ bʌ tsaʼ laʼ ñopo i tʼan Dios, tsaʼ bʌ laʼ wubi tic tojlel lojon, tsaʼ laʼ ñopo mach i tʼañic wiñicob, pero i tʼañʌch Dios» (1 Tesalonicenses 2:13). Jin chaʼan, jiñi i cʌntesajob yicʼot chuqui tac miʼ melob jiñi yaʼ bʌ añob ti isujm bʌ ñopbalʌl mach loqʼuemic tiʼ cʌntesa quixtañujob. Yaʼʌch chʼoyol tiʼ Tʼan Dios.

⁷ Jesucristo tsiʼ yʌcʼʌ jiñi ejemplo come jiñi i cʌntesa yaʼʌch tsiʼ locʼsa tiʼ Tʼan Dios. Cheʼ bʌ tsiʼ pejca i Tat am bʌ ti panchan ti jumpʼejl oración, tsiʼ yʌlʌ: «Isujmʌch jiñi a tʼan» (Juan 17:17). Jesús tsiʼ jacʼbe i Tʼan Dios yicʼot tiʼ pejtelel jiñi tsaʼ bʌ i yʌlʌ tiʼ cʌntesa yaʼ locʼsʌbil tiʼ Tsʼijbujel Dios. Cheʼ bʌ tsiʼ taja ti tʼan jumpʼejl texto loqʼuem bʌ ti Biblia, tiʼ pejtelel ora tsiʼ yʌlʌ: «Tsʼijbubil» (Mateo 4:4, 7, 10). Cheʼ jaʼel jiñi i wiñicob Dios ti ili ora mach i bajñel tʼañic miʼ subob. Miʼ ñopob chaʼan jiñi Biblia jiñʌch i Tʼan Dios yicʼot yaʼʌch loqʼuem jiñi i cʌntesajob.

8. ¿Chuqui yambʌ miʼ mejlel ti melol cheʼ bʌ miʼ chʼujutesʌntel Jehová?

⁸ Jiñi wiñicob xʼixicob añoʼ bʌ tiʼ sujm bʌ ñopbalʌl cojach miʼ chʼujutesañob Jehová yicʼot miʼ yʌcʼob ti cʌñol i cʼabaʼ. Jesús tsiʼ yʌlʌ ili cʌntesa: «Yom maʼ chʼujutesan a Yum Dios [Jehová]. Cojach jiñi yom maʼ yuman» (Mateo 4:10). Jin chaʼan, jiñi i wiñicob Dios cojach miʼ chʼujutesañob Jehová. Cheʼ miʼ yʌcʼob ti cʌñol i cʼabaʼ jiñi isujm bʌ Dios yicʼot miʼ yʌcʼob ti cʌñol i melbal tac, yaʼ ochem jaʼel i chʼujutesʌntel. Jiñi Biblia mi yʌl: «Laʼ i cʌñob chaʼan a cʼabaʼ jiñʌch Jehová, come jatet jach jiñi Cʼax ñuquet bʌ tiʼ pejtelel Pañimil» (Salmo 83:18, TNM). Jiñi xñoptʼañob woli i lajiñob Jesús cheʼ miʼ coltañob jiñi quixtañujob chaʼan miʼ cʌñob Dios. Jiñʌch tsiʼ sube i Tat cheʼ bʌ tsiʼ yʌlʌ ili tʼan: «Tsac tsictesʌbeyob a cʼabaʼ jiñi wiñicob tsaʼ bʌ a wʌqʼueyon ti pañimil» (Juan 17:6). Ti ili ora jaʼel, jiñi isujm bʌ i wiñicob Dios miʼ cʌntesan i piʼʌlob chaʼan miʼ cʌmbeñob i cʼabaʼ Dios, chuqui ñaʼtʌbil i chaʼan yicʼot i melbal tac.

9, 10. ¿Bajcheʼ miʼ pʌsbeñob i bʌ cʼuxbiya jiñi isujm bʌ xñoptʼañob?

⁹ Jiñi i wiñicob Dios miʼ cʼuxbiñob i bʌ tiʼ sujm. Jesús tsiʼ yʌlʌ: «Cheʼ jiñi, pejtelel wiñicob mi caj i ñaʼtañob xcʌntʼañetla c chaʼan cheʼ mi laʼ cʼuxbin laʼ bʌ» (Juan 13:35). Cheʼʌch tsiʼ cʼuxbiyob i bʌ jiñi ñaxam bʌ xñoptʼañob ti wajali. Jiñi i wiñicob Dios añob i cʼuxbiya i maʼañic miʼ wajleñob jiñi mach bʌ lajalobic i colorlel i pʌchʌlel yicʼot jiñi tilemoʼ bʌ ti yan tac bʌ país, cheʼ jaʼel wen temel añob tiʼ pejtelel i pusicʼalob bajcheʼ i yermañojob i bʌ (pejcan Colosenses 3:14). Jiñi yaʼ bʌ añob ti mach bʌ isujmic ñopbalʌl mach cheʼic miʼ cʼuxbiñob i bʌ bajcheʼ jiñi. Cheʼ añobic i cʼuxbiya, maʼañic miʼ tsʌnsañob i bʌ tiʼ caj chaʼan mach lajalic bʌ país tilemob o tiʼ caj chaʼan mach lajalic i colorlel i pʌchʌlelob. Jiñi isujm bʌ xñoptʼañob maʼañic miʼ tsʌnsan i yermañojob mi jiñic to yambʌ wiñicob xʼixicob. Jiñi Biblia mi yʌl: «Cheʼ jiñi, tsiquil majqui i yalobilob Dios yicʼot majqui i yalobilob xiba. Jiñi mach bʌ añic miʼ chaʼlen chuqui toj, mach i chaʼañic Dios. Cheʼ jaʼel jiñi mach bʌ añic miʼ cʼuxbin i yermaño, mach i chaʼañic Dios. [...] Yom mi laj cʼuxbin lac bʌ ti lac pejtelel. Mach yomic lajalonla bajcheʼ Caín tsaʼ bʌ i tsʌnsa i yijtsʼin» (1 Juan 3:10-12; 4:20, 21).

¹⁰ Wen tsiquilʌch cheʼ an laj cʼuxbiya, come maʼañic mi lac tsʌnsan lac piʼʌlob, pero mach cojic jach jiñi. Jiñi isujm bʌ xñoptʼañob miʼ yʌqʼueñob i bʌ i yorajlel, miʼ cʼʌñob i pʼʌtʌlel yicʼot miʼ yʌqʼueñob i bʌ cheʼ bajcheʼ i taqʼuiñob o i chubʌʼañob chaʼan miʼ coltañob i bʌ (Hebreos 10:24, 25). Cheʼ woliʼ ñusañob wocol miʼ coltañob i bʌ, i maʼañic miʼ chʼʌmob i chaʼan bʌ yambʌ i piʼʌlob. Cheʼ jaʼel, miʼ jacʼob jiñi ticʼojel am bʌ ti Biblia baqui mi yʌl «laʼ laj coltan pejtelel wiñicob cheʼ i yorajlel to» (Gálatas 6:10).

11. ¿Chucoch wen ñuc i cʼʌjñibal mi lac ñop Jesucristo chaʼan jiñʌch muʼ bʌ i cʼʌn Dios chaʼan miʼ coltañonla?

¹¹ Jiñi isujm bʌ xñoptʼañob miʼ ñopob Jesucristo bajcheʼ jiñi muʼ bʌ i cʼʌn Dios chaʼan miʼ coltañob. Jiñi Biblia mi yʌl: «Machʼan yambʌ baʼ chʼujbi lac tyaj laj contyʌntyel. Dios maʼ ti yʌcʼonla yambʌ ti pejtelel mulawil baʼ mi lac tyajeʼ laj contyʌntel. Cojach ti Jesús» (Hechos 4:12, Jini wen bʌ tʼan). Cheʼ bajcheʼ tsaʼ laj cʌñʌ yaʼ ti cʌntesʌntel 5, Jesús tsiʼ yʌcʼʌ i cuxtʌlel chaʼan miʼ coltan jiñi quixtañu muʼ bʌ i jacʼbeñob i tʼan (Mateo 20:28). Cheʼ jaʼel, Jehová tsiʼ waʼchoco Jesús bajcheʼ Rey yaʼ ti Yumʌntel ti panchan chaʼan miʼ yuman jiñi Pañimil. Jin chaʼan, Dios yom chaʼan mi lac jacʼben i tʼan Jesús yicʼot chaʼan mi lac lajiben i cʌntesa tac. Cojach bajcheʼ jiñi mi caj lac mejlel ti chumtʌl tiʼ pejtelel ora. Jin chaʼan jiñi Biblia mi yʌl: «Jiñi muʼ bʌ i ñop i Yalobil Dios, an i chaʼan i cuxtʌlel mach bʌ añic miʼ jilel. Jiñi mach bʌ añic miʼ ñop i Yalobil Dios mach mejlic i yʌqʼuentel i cuxtʌlel» (Juan 3:36).

12. ¿Chucoch maʼañic miʼ yotsañob i bʌ tiʼ chaʼan bʌ ili pañimil jiñi i wiñicob Dios?

¹² Jiñi isujm bʌ i wiñicob Dios maʼañic miʼ yotsañob i bʌ tiʼ chaʼan bʌ ili pañimil. Cheʼ bʌ Jesús yaʼan tiʼ tojlel jiñi yumʌl bʌ ti Roma i cʼabaʼ Pilato chaʼan miʼ mel i bʌ, tsiʼ yʌlʌ: «Mach wʌʼic chʼoyol c yumʌntel ti pañimil» (Juan 18:36). Jin chaʼan, jiñi isujm bʌ xñoptʼañob i chaʼan Jesús jiñʌch miʼ ñopob jiñi Yumʌntel am bʌ ti panchan, anquese mach lajalic bʌ país baʼ chʼoyolob. Jiñi isujm bʌ xñoptʼañob maʼañic miʼ wis otsañob i bʌ ti política miʼ muqʼuic to i yotsañob i bʌ tiʼ wocol tac ili pañimil. Cheʼ jaʼel, maʼañic mi caj i ticʼob jiñi yambʌ quixtañujob yom bʌ i chaʼleñob votar o yom bʌ i yotsañob i bʌ ti política chaʼan miʼ tajob i yeʼtel bajcheʼ gobernador o presidente ti jumpʼejl tejclum o ti jumpʼejl país. Anquese maʼañic miʼ yotsañob i bʌ ti política, pero mucʼʌch i jacʼbeñob i mandar tac jiñi yumʌlob ti pañimil. ¿Chucoch? Come i Tʼan Dios mi yʌl: «Jacʼbenla i tʼan jiñi añoʼ bʌ i yeʼtel ti pañimil». Ili yom yʌl chaʼan jiñi xñoptʼan yom miʼ jacʼbeñob i tʼan jiñi yumʌlob (Romanos 13:1). Pero mi jiñi yumʌlob ti pañimil miʼ chaʼleñob xicʼoñel tiʼ melol am bʌ tiʼ contra i mandar Dios, jiñi isujm bʌ xñoptʼañob miʼ lajibeñob i ejemplo jiñi apóstolob, baqui tsiʼ yʌlʌyob: «Wersa mic jacʼben lojon i mandar Dios anquese miʼ ñusʌntel i mandar wiñicob» (Hechos 5:29; Marcos 12:17).

13. ¿Chuqui miʼ ñopob jiñi isujm bʌ xñoptʼañob i chaʼan Jesús chaʼan jiñi i Yumʌntel Dios, i chuqui woliʼ melob?

¹³ Jiñi isujm bʌ xcʌntʼañob i chaʼan Jesús miʼ subob ñumel chaʼan cojach yaʼan i pijtayajob jiñi quixtañu yaʼ tiʼ Yumʌntel Dios. Jesús tsiʼ wʌn alʌ: «Jiñi wen tʼan chaʼan i yumʌntel Dios mi caj i sujbel ti pejtelel pañimil chaʼan miʼ yubintel ti pejtelel pañimil. Ti jimbʌ ora mi caj i tilel i jilibal» (Mateo 24:14). Jiñi isujm bʌ xñoptʼañob woli bʌ i tsajcañob Jesucristo maʼañic miʼ subeñob jiñi wiñicob xʼixicob chaʼan miʼ ñopob chaʼan jiñi yumʌlob wʌʼ ti Pañimil mi caj i tojʼesañob jiñi wocol tac. Muʼ bʌ i tsictesañob jiñʌch chaʼan i pijtaya jiñi quixtañujob cojach an yaʼ tiʼ Yumʌntel Dios (Salmo 146:3). Jesús tsiʼ cʌntesayonla chaʼan yom mi laj cʼajtin ti oración chaʼan miʼ tilel jiñi toj bʌ yumʌl, come tsiʼ yʌlʌ: «Laʼ tilic a yumʌntel. Laʼ mejlic chuqui a wom ti pañimil cheʼ bajcheʼ ti panchan» (Mateo 6:10). Jiñi Biblia miʼ wʌn al chaʼan jiñi i Yumʌntel Dios «mi caj i laj jisan pejtel jiñi yumʌlob. Mi caj i yajñel ti pejtelel ora» (Daniel 2:44; Apocalipsis 16:14; 19:19-21).

14. ¿Baqui bʌ ñopbalʌl maʼ wʌl jatet muʼ bʌ i yʌcʼ i bʌ ti cʌñol chaʼan jiñʌch isujm bʌ ñopbalʌl?

¹⁴ Ti jiñi wʌcchajp tsaʼix bʌ laj qʼuele, cʼajtiben a bʌ: «¿Baqui bʌ jiñi ñopbalʌl chucul i cʌntesa yaʼ ti Biblia i miʼ yʌcʼ ti cʌñol chaʼan i cʼabaʼ Dios jiñʌch Jehová? ¿Baqui bʌ jiñi ñopbalʌl muʼ bʌ i pʌsbeñob i bʌ i cʼuxbiya, muʼ bʌ i pʌsob chaʼan ñopolob i chaʼan Jesús, maʼañic miʼ yotsañob i bʌ tiʼ chaʼan bʌ ili pañimil, i cheʼ jaʼel miʼ tsictesañob chaʼan jiñi wiñicob xʼixicob cojach yaʼañob i pijtaya yaʼ tiʼ Yumʌntel Dios? Tiʼ pejtelel jiñi ñopbalʌl am bʌ wʌʼ ti Pañimil, ¿baqui bʌ jiñi ñopbalʌl muʼ bʌ i tsʼʌctesan tiʼ wʌcchajplel jiñi tsaʼ bʌ ujti laj qʼuel?». Jiñi tsaʼ bʌ laj cʌñʌ miʼ pʌsbeñonla chaʼan jiñʌch i testigojob Jehová (pejcan Isaías 43:10-12).

¿CHUQUI MI CAJ A MEL JATET?

15. Anquese mucʼʌch lac ñop chaʼan añʌch Dios, ¿chuqui to yambʌ yom mi lac mel?

¹⁵ Chaʼan wen mi laj cajñel tiʼ tojlel Dios, mach cojic jach yom mi laj cʌl chaʼan mucʼʌch lac ñop, anto yambʌ chuqui yom bʌ mi lac mel. Jiñi Biblia mi yʌl chaʼan jiñi xibajob miʼ ñopob jaʼel chaʼan añʌch Dios (Santiago 2:19). Pero jiñi xibajob maʼañic miʼ melob chuqui yom bʌ Jehová mi muqʼuic to i chʼʌjmelob ti ñuc tiʼ tojlel Jehová. Chaʼan mi lac tijicñesʌben i pusicʼal Dios, mach jasʌlic jach mi la cʌl chaʼan mucʼʌch lac ñop, yom mi lac mel jaʼel i yeʼtel (troñel). Yicʼot jaʼel, yom mi lac loqʼuel ti jiñi ñopbalʌl mach bʌ isujmic i yom mi la cochel ti jiñi isujm bʌ ñopbalʌl.

16. ¿Chuqui yom mi lac mel chaʼan maʼañic mi la cotsan lac bʌ ti jiñi mach bʌ isujmic ñopbalʌl?

¹⁶ Jiñi apóstol Pablo tsiʼ pʌsʌ chaʼan mach yomic mi la cotsan lac bʌ ti jiñi mach bʌ isujmic ñopbalʌl. Pablo tiʼ tsʼijbu: «Loqʼuenla tiʼ tojlel mach bʌ añic miʼ ñopob. Tʌtsʼʌ laʼ bʌ baʼ añob», cheʼen lac Yum [Jehová]. «Mach mi laʼ ñochtan chuqui tac bibiʼ. Mi caj c pʌyetla tilel baʼ añon» (2 Corintios 6:17; Isaías 52:11). Jin chaʼan, jiñi isujm bʌ xñoptʼañob maʼañic miʼ wis otsañob i bʌ ti jiñi ñopbalʌl mach bʌ isujmic.

17, 18. ¿Chuqui jiñi «ÑUC BɅ BABILONIA», i chucoch yom ti ora maʼ ‹loqʼuel yaʼi›?

¹⁷ Jiñi Biblia mi yʌl chaʼan jiñi ñopbalʌl tac mach bʌ isujmic jiñʌch jiñi «ÑUC BɅ BABILONIA» (Apocalipsis [Revelación] 17:5).a Ili cʼabaʼʌl miʼ cʼajtesʌbeñonla jiñi tejclum Babilonia ti wajali, yaʼ baqui tsaʼ tejchi jiñi mach bʌ isujmic ñopbalʌl cheʼ bʌ tsaʼ ñumi jiñi ñuc bʌ Butʼjaʼ cheʼ tiʼ yorajlel Noé. Jiñi cʌntesa tac yicʼot melbalʌl tac am bʌ i chaʼan wʌle ora jiñi mach bʌ isujmic bʌ ñopbalʌl yaʼ tsaʼ tejchi tilel wajali yaʼ ti Babilonia. Ti wajali, yaʼ ti Babilonia tsiʼ chʼujutesayob uxtiquil bʌ dios. Ili ora jaʼel, i cʌntesa jiñi cabʌl ñopbalʌl jiñʌch cheʼ an uxtiquil dios. Pero jiñi Biblia toj jamʌl mi yʌl chaʼan juntiquil jach isujm bʌ Dios, jiñʌch Jehová, i jiñi Jesucristo jiñʌch i Yalobil (Juan 17:3). Jiñi yaʼ bʌ chumulob ti Babilonia ti wajali tsiʼ ñopoyob jaʼel chaʼan cheʼ bʌ miʼ chʌmel juntiquil quixtañu anto chuqui cuxul miʼ cʌytʌl tiʼ malil yicʼot chaʼan mucʼ abi mejlel i yilañob wocol ti cʼajc. Ili ora jaʼel, yonlel ñopbalʌl tac miʼ yʌlob tiʼ cʌntesajob chaʼan cheʼ an majqui miʼ chʌmel, anto bi chuqui cuxul miʼ cʌytʌlob i chaʼan tiʼ malil yicʼot muʼ bi majlel i tojob i mul ti cʼajc.

¹⁸ Jiñi ñopbalʌl am bʌ yaʼ ti Babilonia ti wajali tsaʼ pujqui tiʼ pejtelel Pañimil. Jin chaʼan, miʼ mejlel laj cʌl ili ora chaʼan jiñi Ñuc bʌ Babilonia jiñʌch yom i yʌl: Yumʌl i chaʼan jiñi mach bʌ isujmic ñopbalʌl tiʼ pejtelel pañimil. Dios wʌn albilix i chaʼan, jiñʌch yumʌl i chaʼan jiñi ñopbalʌl mach bʌ isujmic mach yʌxʌl i yo mi caj i tilel i jisʌntel. ¿Muʼ baʼ chʼʌmben isujm jatet chucoch wen ñuc i cʼʌjñibal maʼ loqʼuel yaʼ ti Ñuc bʌ Babilonia? Jehová Dios yom chaʼan ti ora maʼ ‹loqʼuel yaʼi›, come i yorajlel to añet chaʼan maʼ loqʼuel (pejcan Apocalipsis 18:4, 8).

19. ¿Chuqui mi caj a taj cheʼ maʼ melben i yeʼtel Jehová?

¹⁹ Cheʼ bʌ maʼ cʌy jiñi mach bʌ isujmic ñopbalʌl, tajol an wiñicob xʼixicob maʼañix bʌ mi caj i pejcañetob. Pero cheʼ mi caj a chʼujutesan Jehová yicʼot i tejclum, ñumen to cabʌl chuqui mi caj a taj i mach lajalic bajcheʼ muʼ bʌ i mejlel a sʌt. Cheʼʌch miʼ cajel ti ujtel ti a tojlel jaʼel bajcheʼ jiñi tsaʼ bʌ ujti tiʼ tojlel jiñi ñaxam bʌ xcʌntʼañob i chaʼan Jesús come tsiʼ cʌyʌyob i yeʼtel chaʼan tsiʼ tsajcayob majlel: Tiʼ tejclum Jehová mi caj a taj cabʌl a wermañojob. Mi caj a wochel ti jumpʼejl familia am bʌ tiʼ pejtelel pañimil, baqui mi caj a taj cabʌl millón isujm bʌ xñoptʼañob muʼ bʌ caj i cʼuxbiñetob tiʼ sujm. Yicʼot mi caj a mejlel ti chumtʌl tiʼ pejtelel ora ti «tal to bʌ ora» (pejcan Marcos 10:28-30). Cheʼ jaʼel, jiñi quixtañujob maʼañix bʌ mi caj i pejcañetob chaʼan mach lajalix laʼ ñopbal yicʼotob, tajol miʼ mejlel i cʌñob jaʼel ti wiʼil chuqui muʼ bʌ i cʌntesañonla jiñi Biblia, i miʼ sujtelob tiʼ wiñicob Jehová.

20. ¿Chuqui mi caj i tajob ti talto bʌ qʼuin jiñi yaʼ bʌ añob ti isujm bʌ ñopbalʌl?

²⁰ Jiñi Biblia miʼ subeñonla chaʼan Dios mach jalix mi caj i jisan ili jontol bʌ pañimil yicʼot mi caj i chʼʌm tilel i Yumʌntel chaʼan miʼ yuman jiñi pañimil (2 Pedro 3:9, 13). ¡Wen utsʼatax mi cajel jiñi tsijiʼ bʌ pañimil! Jumpʼejl jachix ñopbalʌl mi cajel yaʼi yicʼot cojach bʌ isujm bʌ chʼujutesaya. ¿Mach ba i yorajlelix chaʼan maʼ tech a tempan a bʌ a wicʼotob jiñi isujm bʌ i wiñicob Dios?